Kategorie: Preke (Page 2 of 193)

Wees Voorstanders van Goeie Werke

Oktober 12, 2026 / admin

Skriflesing: Titus 2:11-3:11 (2020)
Teksvers: Titus 3:8
HK: Sondag 32

Goeie werke het ewigheidswaarde. Nie omdat ons deur goeie werke gered word nie, maar ook nie dat ons daarsonder gered word nie.

Jakobus getuig immers dat geloof sigbaar word in die werke van die mens. As jy iemand se geloof wil sien, sal dit sigbaar word in die werke wat daardie persoon doen.

So getuig die apostel Paulus ook teenoor Titus, dat Christus ‘n volk vir Homself verkry wat ywerig is in goeie werke. Daartoe moet alle gelowiges bereid wees tot goeie werke, en sorg dra om goeie werke voor te staan, dit is immers wat goed en nuttig is vir die mense.

Jesus op die stembrief!

Oktober 12, 2026 / admin

Skriflesing: Matteus 26:47-56; 27:11-31; Josua 24; Psalm 27:10 (1983)
Teksvers: Matteus 27:17

Barábbas is ‘n figuur waarvan ons eintlik omtrent niks weet nie en tog speel hy ‘n belangrike rol in die diepe lyde van Jesus Christus.

Net soos by Josua 24 word die volk voor ‘n keuse gestel en die naam ‘Jesus’ kom letterlik tweemaal op dieselfde stembrief!

Ons daaglikse lewe en al ons doen en late draai meesal rondom keuses. Ons maak goeie én slegte keuses. Mag die Here met sy Gees ons in elke besluit lei, sodat ons hele lewe Hom alleen kan verheerlik.

“Aan Hom behoort die heerlikheid tot in alle ewigheid”

Wat is jóú nalatenskap?

Oktober 5, 2026 / admin

Skriflesing: 2 Kon. 13:14-21; 2 Kon. 2:5-25; Hebreërs 11:1-4; Efesiërs 1:8-20 (1983)
Teksvers: 2 Konings 13:21

Na die kragtige bediening van 60 jaar sterf die profeet Elisa en word hy soos ‘n gewone Israeliet begrawe.

Alhoewel hy waarskynlik groter dinge vermag het as sy voorganger, Elia, vaar Elisa dus nie op na die hemel in die heerlikheid van vurige strydwaens nie.

En tog is daar ná sy dood troos aan die volk in die vreemde gebeure wat by die graftombe van die profeet plaasvind!

Dink bietjie na wat hierdie gebeure vir my en jou kan beteken en hoe dit selfs heenwys na die graftombe van ons Here Jesus!

As my hart beswyk

Oktober 5, 2026 / admin

Skriflesing: Ps. 61 (2020)
Teksvers: Ps. 61:3

Dawid is in groot benoudheid. Hy voel homself aan die einde van die aarde.

Wat staan hom te doen? Hy bid. Hy roep God aan in die nood. As sy hart beswyk, as sy moed hom begewe en hy geen Antwoord of hoop het nie, dan neem hy sy toevlug na God.

In sy nood besef Dawid hy het ‘n stewige fundament nodig om op te staan, ‘n rots. Maar die rots moet ook bo hom wees, dit moet hoër wees as hy, sodat die rots hom kan help met wysheid en insig.

Laastens besef Dawid ook dat hy self nie die rots kan vind as God hom nie daarheen lei nie.

Bly getrou aan God, selfs onder groot druk

September 28, 2026 / admin

Skriflesing: 1 Konings 21 (2020)
Teksvers: 1 Konings 21:2,3

Uit die geskiedenis van Nabot se wingerd leer ons wat geloof, integriteit en gehoorsaamheid aan die Here inhou. Nabot by getrou en gehoorsaam aan die Here, al het hy gesterf vir sy geloofsoortuiging. Ons leer uit hierdie geskiedenis dat ons deur die werk van die Heilige Gees aan God getrou sal kan bly, selfs al sou ons doodgemaak word. Getrouheid aan God se Woord bo menslike vrees is dalk juis in ons tyd so nodig.

Nabot was nie sommer net koppig of sentimenteel oor die grond wat hy besit het nie. Sy optrede kan ons verstaan as ons na Levitikus 25:23 kyk. Nabot het God se opdragte hoër geag as die wil van ‘n magtige aardse koning.

Mag jy getrou bly aan die Here se wil, al is daar geweldige druk om toe te gee aan mense en moondhede wat sterker en magtiger as jy hier op aarde is.

Waar is my eer?

September 28, 2026 / admin

Skriflesing: Daniël 7; Esegiël 1; Op 1,4,5 (1983)
Teksvers: Daniël 7:9,10

Meeste mense ken die basiese storie van die profeet Daniël, die man wat die Here so getrou gedien het, ja selfs daar in die vreemde land van die ballingskap, vér van huis en haard. Hy eet net rein kos, bid op gereelde tye en beland selfs in die leeukuil.

Die profetiese apokaliptiese deel van die boek Daniël is egter minder bekend. Daar sien die profeet die hemele geopen in visioene van Hom wat die toekoms van die mens en die aarde en die kerk bepaal!

Kom ons nader nog ‘n slag hierdie troonvisoene deur die oog van God se profete, en bepaal en vergelyk dan óns eerbetoning en aanbidding van Hom wat op die troon sit en alles in sy heilige almag regeer!