Etiket: Sondag 15

Die enigste uitweg, God se oordeel word voltrek

Junie 15, 2026 / admin

Skriflesing: Matteus 27:11-56 (1953)
Teksvers: Matteus 27:46
HK: Sondag 15

Ons HERE Jesus, is die Christus. Hy is die Gesalfde van God. Hy is vol van genade en waarheid. Die afdruksel van die wese van God. Hy is alle lof waardig. Maar tog as ons na Hom kyk sien ons een wat onder die hand van mense en God ly.

Sondag 15 beskryf hierdie lyding as die toorn van God wat Christus as regverdige oordeel, in ons plek moes dra. Hy dra dit, vasgenael aan die vervloekte boom. Daar word God se oordeel voltrek en roep Hy uit: “My God, my God waarom het u my verlaat?”.

Dit is die enigste uitweg uit die ewige verdoemenis. Glo jy dit?

Die kruisiging van Jesus Christus is die spilpunt van ons verlossing

April 14, 2025 / admin

Skriflesing: 1 Kor 2: 1-5 (2020)
Teksvers: 1 Kor 2:2

In ons Christelike geloofslewe beklee die kruisiging van Jesus Christus ‘n baie sentrale plek. Inderdaad is die kruisiging van Jesus Christus die spilpunt waarom ons verlossing draai. Sonder die kruisiging, die dood, die oordeel, die vloek en straf wat Jesus Christus op Hom geneem het, sou daar geen troos of hoop vir ons gewees het nie.

Mag jy weer nadink oor die rede waarom Jesus gekruisig is en gesterf het. Mag jy by hernuwing dankbaar wees dat die Here dit beskik het, en dat Jesus Christus vrywillige gewillig was, om die verlatenheid van God en mense aan die kruis deur te gaan. So alleen kan ons verseker wees dat Hy die straf en oordeel wat ons moes toekom, op Hom geneem het en aan ons die sekerheid kom gee het dat God ons nooit sal verlaat nie.

Jesus drink die oordeelsbeker uit die hand van sy Vader

Augustus 28, 2023 / admin

Skriflesing: Psalm 75:1-11; Matteus 27:32-52 (2020)
Teksvers: Psalm 75:9
HK: Sondag 15-16

Die lyding van ons Here Jesus Christus is iets wat baie moeilik in woorde beskryf kan word. Tog is sy hele lewe een groot lyding. Van sy menswording en deur sy aardse omwandeling tot aan die kruis.

Hierdie lyding word ook in die Skrif aan ons verduidelik by wyse van ‘n beeld. Die beker van God se oordeel.

Ons gaan vanaand stilstaan by Psalm 75 waar die oordeelsbeker van God beskryf word met die oog op Christus se lyding.

Getsemane, Gabatta, Golgota

Mei 23, 2022 / admin

Skriflesing: Markus 14:32-36, 15:1-34
Teksvers: Markus 15: 26
HK Sondag 15

Die lyding van die Galileër gaan van Getsemane, na Gabatta, na Golgota. Hier sien ons die progressie in die diepte van die Christus se smart, maar terselfde tyd die vervulling van God se geregtigheid in die dra van God se toorn, Sy oordeel en Sy vloek.

Ons staan vanaand stil by Sondag 15 van die Heidelberger waarin hierdie dieptepunt van die lyding so duidelik uitgespel word.

Sondelose, as sondaar behandel, sodat sondaars kan lewe

September 20, 2021 / admin

Skriflesing: 2 Kor 4:16-5:21
Teksvers: 2 Kor 5:21
HK Sondag 15 + 16 Vr en antwe. 37,40,42

Die boodskap van versoening dui die grond van ons verlossing aan. Jesus Christus het ons met God versoen deur die toorn van God oor die sonde in ons plek te dra. Dit is die boodskap wat vir ons verlossing bring. Jesus se versoeningsdaad is die rede hoekom Hy vir ons betaal het sodat ons die ewige lewe kan hê.

Jesus Christus was en is sonder sonde.
Jesus Christus is as sondaar behandel.
Jesus Christus is die rede hoekom ons kan lewe

Die klein woordjie van die onderwyser?

Mei 15, 2020 / admin

Skriflesing: Psalm 22 en Jesaja 53
Teksvers: Jesaja 53:4
HK: Sondag 15

Ek onthou uit my kinderdae dat my katkisasiemeester ons geleer het dat die VRAE by die Heidelbergse Kategismus NETSO belangrik is as die ANTWOORDE! Kyk jy na die oorspronklike skrywers se kommentaar op die Kategismus (vgl. Het Schatboek, deur Zacharias Ursinus) dan is die vraag is ook deel van die belydenis. Toets dit maar self met die heel eerste vraag na jou “enigste troos”… Dit veronderstel ‘n vreeslike probleem en dat daar net één antwoord is! Ek hoop u volg my argument. Ek wens u lees sommer weer die Heidelberger met nuwe oë.

Vanaand moet u goed oplet. Sondag 15 handel oor Jesus se swaarkry, lyding, veroordeling en vervloeking. Hy het ‘n bittere, bittere lydensweg geloop! Sy hele aardse lewe eintlik ‘n Via Dolorosa (pad van trane)!

En kyk dan nou na die vraagstelling van Sondag 15, waar die onderwyser na hierdie lyding met ‘n verkleinwoordjie verwys- “Wat verstaan jy onder die woordjie : gely? In Nederlands gebruik hy “woordeke”. Is dit nou nie sleg as hy so ‘verkleinerend’ oor ons Verlosser se lyde praat nie?

Laai af