Gereformeerde Kerk Centurion

Die webtuiste vir die Gereformeerde Kerk Centurion.

Kategorie: Nuwe Testament (Page 114 of 130)

Bedoel vir die hel, maar bestem vir die hemel!

Februarie 8, 2019 /

Skriflesing: Rom 3:10-12 en 10:18-21 (NAV); Ef 1 en 2 (OAV)
Teksvers: Efesiërs 1:3; (DL 1 art 1-6)

Pelagius kom in die 4de eeu met die leer van die vrye wil van die mens. Augustinus antwoord teen hierdie dwaalleer met die belydenis van God se genadige verkiesing. In die begin 17e eeu kom Arminius weer met die leer van Pelagius na vore en Ds Gomaris van Nederland antwoord hom met die leer van God se soewereiniteit. Die Dortse Sinode gee genadiglik amptelike uitspraak en dit word ons kerke se belydenis.

Ons bekyk vanaand hoe dit gekom het dat mense wat eintlik bedoel is om verlore te gaan, deur die genadige besluit van God (en nie ons eie besluit nie), teen alle verwagting in, tog bestem is vir die ewige lewe! As ons die wese van die mens begryp dan word die genade van God so groot dat ons saam met die apostel (en saam met alles wat asem het) net kan jubel: Aan God kom AL die lof toe!

Laai af

Jesus jubel omdat die evangelie uitgedra word

Februarie 8, 2019 /

Skriflesing: Luk 10:1-24
Teksvers: Luk 10:21; Luk 11:27-28

Jesus Christus was nie net vol blydskap soos die twee en sewentig, omdat die evangelie-sending suksesvol was nie, maar ons lees hy het deur die Heilige Gees dit UITGEJUBEL! Die uitdra van die evangelie is so ‘n belangrike saak dat Jesus van blydskap oorgeloop het. So is dit vandag nog ons opdrag om die evangelie met blydskap en dankbaarheid uit te dra. As die Satan in jou pad staan omdat jy voluit vir Jesus werk moet jy bly wees, want dan weet jy Satan beskou jou as ‘n gevaar vir hom. Daarom moet ons ambassadeurs wees wat voluit vir God werk, in sy koninkryk.

Daar is ‘n drievoudige blydskap.

1 Die vreugde lê in dienswerk. Luk 10:17-19

2 Die vreugde lê in ons verlossing. Luk 10:20

3 Die vreugde van God se soewereiniteit en genade. Luk 10:21-24

Laai af

Sola Gratia! Loof die Here!

Februarie 1, 2019 /

Skriflesing: Rom 8
Teksvers: Rom 8:28-30

Die Dortse Leerreëls (DL) is een van ons gereformeerde belyde-nisskrifte. Ek is redelik oortuig dat baie mense dit nog nooit of weinig gelees het. Dit is egter ‘n pragtige troosboek. U word aangemoedig om dit so gou moontlik deur te lees (of deur te blaai) en weer uself te vergewis waarvan daar gepraat word. (U vind dit op GKSA se webblad of op ons eie kerk se webblad of agter in jou Psalmboek)

Die DL is in 1619 gefinaliseer, dus presies 400 gelede. Die Here het by hierdie sinode die kerk op ‘n baie spesifieke manier gelei om antwoorde te gee op die destydse dwaalleer wat die kerke bedreig het. In breë trekke sien ons iets van die KETTING van goddelike genade in ons verlossing.

Vanaand begin die drie leraars met ‘n reeks oor die DL wat ten minste oor die volgende ses maande tydens die aanddienste sal strek. U wil dit nie eintlik misloop nie!

Laai af

Sien jy die Lam van God raak? Maak oop jou oë!

Januarie 26, 2019 /

Skriflesing: Joh 1:19-34; Heb 12:1-3 Op 5:1-7; Job 42:5
Teksvers: Joh 1:29

Ter voorbereiding van die Nagmaal dink ons vandag aan Jesus as ‘die Lam van God’. Soos die lam (ram) wat God vir Abraham en Isak voorsien het (Gen 22), so is Jesus die Lam wat God voorsien vir die versoening van al ons sondes.

Soos die bloed van die oggend- en aandofferlammers wat elke dag omsluit het, so is Jesus deur sy offerwerk die ‘alles’ van ons lewe. En as Johannes Hom hier by die Jordaan ontmoet en Hom as die Messias herken, dan roep hy ons almal op om van alle dinge af te sien en op Jesus ons Verlosser alleen te fokus.

So laat die Nagmaal ons uitsien na die Bruilof van die Lam…

Laai af

Vyf bestandele vir geloofsvolharding

Januarie 18, 2019 /

Skriflesing: Hebreërs 10:32-29; 12:1- 3; 4-12
Teksvers: Hebreërs 12:1-3

Die brief/preek aan die Hebreërs, die gemeente van gelowiges in Rome, is geskryf tot aanmoediging om in die geloof te volhard.

Hier neem die skrywer/prediker die beeld van ‘n wedloop. Die taak is op ons gelê om aan die wedloop deel te neem en dit te voltooi. Die veronderstelling van die teksverse is dat ons die wedloop kan en gaan voltooi. Soos ‘n goeie atleet moet ons deelneem en die regte stappe neem sodat niks ons verhinder om die wedloop te voltooi nie.

In die gedeelte word iets van ‘n wenresep deur ons Hemelse Afrigter aan ons voorgehou. Stel jouself die prentjie voor en hou by die raad van jou Afrigter, “dan sal julle nie geestelik moeg word en uitsak nie”.

Laai af

Trane word vreugde

Desember 15, 2018 /

Skriflesing: Jeremia 31 en Matteus 2
Teksvers: Jer 31:15,16 asook Matteus 2:18

In Matteus 2: 16-18 word vertel dat Herodes, toe hy agtergekom het dat die sterrekykers hom in die steek gelaat het, woedend geword het. Daarom het hy sy soldate na Betlehem en die hele omgewing gestuur om al die seuntjies van twee jaar en jonger dood te maak. So het die profesie van Jeremia 31:15 in vervulling gegaan. Daar staan dat daar ’n gekerm vanuit Rama gehoor was, ’n gehuil vol hartseer, want Ragel treur oor haar kinders, sy wil haar nie laat troos nie, want haar kinders was nie meer daar nie.

Teenoor die hartseer van Ragel het die Here egter volgens Jeremia 31:16 gesê dat die treurendes gerus maar stil kan word. Hulle hoef nie meer te huil nie en hulle hoef ook nie meer trane in hulle oë te hê nie! Die Here belowe dat daar teenoor al die swaarkry, ‘n heerlike verwagting sal wees. Die spreekwoordelike kinders van Ragel sal uit die vyand se land terugkom. Ja daar sal ’n toekoms vir haar nageslag wees.

Wat is dit wat Ragel se diep seer, wat sy in Rama ervaar het, in vreugde sal laat kan verander?

Hoe kan daar vreugde in jou lewe wees ten spyte van seer en swaar?

Laai af

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑