Gereformeerde Kerk Centurion

Die webtuiste vir die Gereformeerde Kerk Centurion.

Kategorie: Nuwe Testament (Page 109 of 130)

Ons was Vyande, ons is Verander, ons staan Vas vorentoe

Augustus 3, 2019 /

Skriflesing: Kol 1:14-23
Teksvers: Kol 1:21-23

Jy het verander. Dit hoor mens gewoonlik na ‘n lang tyd van geleidelike verandering, wanneer iemand skielik besef dat jy nie meer dieselfde persoon is nie. Nadat jy ander gewoontes en ander maniere aangeleer het, dan eers verander jou status in iemand se oë.

Met die Here werk dit anders. Jy word nie verander deur iets wat jy doen nie, maar jy word deur Jesus verander na iets heeltemal anders toe. Dan sit ons wel in die ongemaklike plek dat ons gewoontes moet opvang by dit wat ons werklik is.

Daarom ervaar ons wrywing in ons geloofslewe, omdat Jesus ons verander het vanaf ‘n vyand na ‘n heilige toe.

(Weens tegniese probleme is die opname dalk nie volledig nie)

Laai af

Goeie werke: Sodat… of … Omdat?

Julie 19, 2019 /

Skriflesing: Titus 3
Teksvers: Titus 3:4,5 (8b)

In Luther se groot-word-jare het die Roomse Kerk, destyds die enigste kerk, doodgewoon met vrees regeer. As jy sonde sou doen was dit sonde teen die kerk. Om dit reg te maak het die kerklike amptenary dan ernstige strawwe opgelê. Dinge wat jy moes doen om alles weer goed te maak. Goeie werke. Goeie dade. Solank jy net nie in onguns by die kerk sou kom nie! Dus was dit ‘n tyd dat dominees/priesters en biskoppe en pouse gevrees is, en daarom is God ook met ‘n onheilige vrees bejeën.

Vandat Luther egter monnik geword het en in die sombere klooster van Erfurt studeer het, het hy begin twyfel of God so ongenadig en kil en hard kan wees. En dan vind hy hierdie liefdevolle God van ons teks. Hy vind dit wel eers in Romeine 1:17, maar as jy mooi lees staan dit in byna elke geskrif van die apostel Paulus.

Die vraag vandag is: Doen jy goeie werke sodat…., of omdat?

Laai af

Verdorde hand of verdorde hart?

Junie 28, 2019 /

Skriflesing: Matteus 12 en Markus 3; Lukas 6
Teksverse: Lukas 6:6-11

Het jy al nagedink oor die verandering, vernuwing en geloofsgroei in jou eie lewe? Verandering kom nie sommer nie. Dit is maar net as die Heilige Gees jou oortuig dat daar vernuwing by jou kan plaasvind. Die Fariseërs het aan ‘n manier van versoening, tussen hulle en God, deur wetsonderhouding vasgehou. Hulle wou eerder hulle eie siening en verdienste as weg tot saligheid navolg as om die genade in en deur Jesus Christus hulle eie te maak. Daarom dan vandag die vraag ook aan jou: Bring die besef van jou eie verdorwenheid jou by Jesus Chrisuts uit of is jy verhard in jou eie selfgekose manier van lewe? Verdorde hand of verdorde hart?

Laai af

Van superhero tot zero

Junie 28, 2019 /

Skriflesing: Johannes 6
Teksvers: Johannes 6:14,15

As Jesus in sy bediening van drie jaar op aarde wonderwerke doen, is dit nie om ons te leer dat ons elkeen geregtig is op ‘n paar wonderwerke nie. Pasop vir die leraars wat uitroep: “Name it and claim it”.

Waarskynlik is dit die soort Jesus wat meeste mense vandag wil hê. Ek sou nogal dink dat dit ‘n yslike belediging vir Jesus Christus self moet wees. Hy is immers God Almagtig. Hy kan baie meer as dit doen. Miskien het ons ook ‘n skewe beeld van wie die Jesus Christus van die Skrif nou eintlik is. Miskien het ons baie verwronge idees oor die nagmaal en die kerk wat aan Hom behoort.

Laat ons versigtig wees om Hom nie nog weer te verneder nie!

Laai af

Wedergebore in Christus deur sy Gees en Woord

Junie 28, 2019 /

Skriflesing: Titus 3
Teksvers: Titus 3:4-7
DL: Hoofstuk 5. Artikel 1-3

God se goedheid het aan die mens sigbaar geword deur die menswording van ons Verlosser, Jesus Christus. God se goedheid het verder sigbaar geword deur sy besondere liefde vir die mens. Ons is nie verlos deur iets wat ons vir ons vryspraak gedoen het nie, maar ons is alleen verlos op grond van God eie ontferming in Christus Jesus.

Die wedergeboorte wat Christus deur die Heilige Gees en die Woord bewerkstellig, het aan ons ‘n nuwe lewe gee. Die wedergeboorte maak dit sigbaar dat God die Heilige Gees oorvloedig op ons uitgestort het deur Jesus Christus ons Verlosser. Die wedergeboorte bring mee dat ons bely dat ons uit genade vrygespreek is en so erfgename geword het van die ewige lewe.

Laai af

Erken julle voorgangers, wat Jesus Christus verkondig

Junie 28, 2019 /

Skriflesing: Heb 13:1-24
Teksvers: Heb 13:7,8,17,24

Onthou, gehoorsaam en groet julle voorgangers want hulle is diensknegte wat Jesus Christus verkondig.

Watter plek neem die voorgangers van die gemeente in jou lewe in? Hoe belangrik is die dominee, ouderling of diaken in jou lewe? ‘n Voorganger is iemand wat voor stap, nie volgens sy eie wil nie, maar soos wat sy Koning en Leier, Jesus Christus hom beveel. ‘n Voorganger, of godsdienstige leier, word minder sodat Jesus Christus as Koning en ons Leier meer kan word. Hoe tree ons op en dink ons oor ons voorgangers?

Ons gaan na die volgende drie hoofpunte kyk:

  • Onthou julle voorgangers. v7-9
  • Gehoorsaam julle voorgangers. v17
  • Groet julle voorgangers. v24

Laai af

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑