Kategorie: Preke (Page 8 of 192)

Wag! Wat kyk jy?

Mei 18, 2026 / admin

Hemelvaart 14 Mei

Handelinge 1:1-14

Skriflesing: Ps. 47:1 en 2

Die Belofte van die Vader, is die geskenk van Christus se verdienste. As die werk van ons Here Jesus
vervul is, en Hy na die hemele opvaar, dan beveel Hy die dissipels om te wag. Daar is niks wat ‘n mens uit
eie kragte kan vermag in die koms van die koninkryk van God nie. Hulle moet wag. Die krag uit die hoogte
sal hulle toerus om die werk te doen. As Jesus dan wegvaar, en hulle staar die hemele in, vra die engele vir
hulle waarna kyk hulle so verstom! Wag, en kyk, jy sal sien.

Veilig in sy Voorsienigheid

Mei 11, 2026 / admin

Skriflesing: Psalm 34 (1983)
Teksvers: Psalm 34:8,9
HK: Sondag 10

Laat ons onthou dat ons in die aanddienste besig is in die leerprediking om die Heidelbergse Kategismus te verklaar. Vanaand kyk ons verder na die eerste sin van die Apostoliese Geloofsbelydenis: “Ek glo in God die Vader…”

Die aanddienste gee aandag aan ons gereformeerde geloofsleer en dit sal raadsaam wees om te sorg dat ook ons groter kinders saam met u saans in die aand-eredienste kom vir hierdie onderrig.

Vanaand bedink ons die Woordjie “voorsienigheid” wat God se omvattende beskikking en sorg vir sy kinders beskryf.

Hy wat in julle is, is groter as hy wat in die wêreld is

Mei 11, 2026 / admin

Skriflesing: 1 Johannes 4:1-21 (2020)
Teksvers: 1 Johannes 4:4,18

Die liefde dryf vrees buite. As die liefde van God in jou is, en jy in God leef, en Hy in jou, dan is daar geen vrees en verskrikking wat jou sal afsit om jou liefde aan God te bewys nie.

God het ons eerste liefgehad, en daarom kan ons Hom liefhê. God is liefde. En die liefde is uit God. Maar die liefde is nie God nie. Die liefde het nie goddelike status nie.

God is ook nie net liefde nie. God is ook Lig. God is Waarheid. God is Lewe. Met ander woorde, die liefde vind alleen betekenis as dit in God is.

Watter heerlike troos is daar om te weet, dat Hy wat in die gelowige sy woning maak, en sy liefde vestig, is groter as hy wat in die wêreld is.

Die voorreg van ‘n nuwe Vader

Mei 4, 2026 / admin

Skriflesing: Johannes 20; Rom 8:14-17 (1983)
Teksvers: Johannes 20:17
HK: Sondag 9

Laat ons onthou dat ons in die aanddienste besig is in die leerprediking om die Heidelbergse Kategismus te verklaar. Vanaand kyk ons na die eerste sin van die Apostoliese Geloofsbelydenis: “Ek glo in God die Vader…”

Die aanddienste gee aandag aan ons gereformeerde geloofsleer en dit sal raadsaam wees om te sorg dat ook ons groter kinders saam met u saans in die aand-eredienste kom vir hierdie onderrig.

Vanaand bedink ons die waarde daarvan om God Almagtig as ons/jou Vader te mag hê.

Geen hondelewe meer nie

Mei 4, 2026 / admin

Skriflesing: Prediker 9 (1983)
Teksvers: Pred 9:4b

Ons lewe is volgens die Prediker maar verganklik en redelik doelloos en sinloos. Hy vergelyk ons lewe eintlik met n hondelewe. Alles loop uit op die dood!

Die evangelie in Christus het hier ‘n verskil kom maak vir hulle wat in Hom glo. Met hulle wat nie glo nie moet ons eintlik simpatiseer, want alhoewel sommige vir hulleself ‘n lekker plekkie in die son hier op aarde uitgesoek het, lê hulle so ewe vals gerus in hulle tydelike geluk en voorspoed vas aan die slaap en weet nie dat hulle op ‘n vreeslike einde afstuur nie. Dan is die siniese Prediker se raad om maar net die beste te maak van ‘n slegte saak.

Met só min kan kinders van die Here nie tevrede wees nie! Kom ons kyk na die dooie leeu, dan kyk ons verder…

Belydenis is Getuienis

April 27, 2026 / admin

Skriflesing: Johannes 1:15-34 (2020)
Teksvers: Johannes 1:32-34
HK: Sondag 8

Die geloofsbelydenis is niks anders nie as ‘n bondige samevatting van alles wat ons as Christene moet glo. Dit sê nie alles van geloof nie, maar dit wat die Skrif in hoofsaak leer en wat nodig is vir ons verlossing. Die vraag ontstaan dan: hoe kom ons by hierdie belydenis en waaroor gaan dit?

Dit bring ons terug na die Persoon van God. Ons leer Hom ken as een in Wese maar drie in Persone. Dit is wat Johannes sien en getuig as hy Jesus doop by die Jordaan. Hy sien en hy getuig.

Net so word ons belydenis, ons getuienis dat ons glo.