Kategorie: Preke (Page 44 of 187)

Geraamtes in die kas?

Desember 11, 2023 / admin

Skriflesing: Matteus 1; Fil 3:5-14; Joh 1:12; 2 Kor 5:17 (1983)
Teksvers: Matteus, 1:1,16

Elke mens het ‘n storie. Jou lewensverhaal. Hoogte-en laagtepunte. Jy skryf maar daagliks aan jou eie reputasie.

Mense is geneig om baie ongenadiglik gereeld jou skuldverlede op te diep. Hulle verwyt en verwys na die geraamtes in jou kas. Biografiese skrywers se kos is die intriges van ander mense se lewens!

Die Here is anders. Hy vergewe dié wat by Hom skuil en gee werklik die geleentheid van ‘n nuwe begin!

Jesus was ‘n volmaakte timmerman en is ‘n volkome Verlosser

Desember 4, 2023 / admin

Skriflesing: Mark 6:1-6; Luk 2:1-10 (1983)
Teksvers: Mark 6: 3a, 4

Engele het aan ‘n timmerman Josef, wie se verloofde Maria was, die berig gebring dat sy swanger sou word, deurdat die Heilige Gees oor haar sou kom. ‘n Timmerman, wat sekerlik goed van inbors was, omdat hy getrou was aan die wet van Moses. Hy het die opdrag gekry dat die Baba wat gebore sou word, Jesus genoem moes word.

“Hy sal groot wees en die Seun van die Allerhoogste genoem word. Die Here God sal Hom die troon van sy voorvader Dawid gee, en Hy sal as koning oor die nageslag Jakob heers tot in ewigheid. Aan sy koningskap sal daar geen einde wees nie.” (Luk 1;32,33)

Hierdie Baba, sou die seun van ‘n Timmerman, Josef sy aardse pa, wees.

Wees die geskenk van dit wat jy ontvang

Desember 4, 2023 / admin

Skriflesing: Matteus 25:13-30 (2020)
Teksvers: Matteus 25: 28-30

Almal hou van geskenke. Veral as jy iets kry wat jy graag wil hê, maar dit nie self kan koop nie. In hierdie bekende gelykenis sien ons hoe verskeie persone “talente” kry.

Hierdie talente is nie soos ons dit soms wil verstaan as ‘n talent wat jy het nie, dit is ‘n verwysing na ‘n geldeenheid van omtrent 36kg goud. ‘n Talent is dus baie waardevol. Die vraag hier gaan nie oor die hoeveelheid talente wat jy ontvang nie, maar wat jy daarmee doen.

God gee aan ons gawes en talente, Hy seën ons, sodat ons tot seën sal wees. So word jy die geskenk, van dit wat jy self ontvang.

Is God se goedheid reg in jou oog?

November 27, 2023 / admin

Skriflesing: Matteus 20:1-16 (2020)
Teksvers: Matteus 20:15
HK Son 24

Elke boontjie kry sy loontjie. Of ten minste so wil ons dit graag hê. Dat elke mens hulle verdiende loon sal ontvang.

Vir die wat goed doen, behoort daar ‘n goeie loon te wees en vir die wat kwaad doen, behoort daar ook ‘n verdiende loon te wees. Waar dit hier gaan om ons geloof en die werk van die Heilige Gees, is die vraag of ons nie deur goeie werke ook onsself kan regverdig voor God nie? Kan ons nie tog iets doen om op te maak vir ons sonde nie?

Ons staan vanaand stil by die gelykenis van die loon met die oog op die Nagmaal.

Aan God al die lof en die eer!

November 27, 2023 / admin

Skriflesing: Psalm 100; Ef 1:1-14 (1983)
Teksvers: Ef 1:3,6

God is onmeetlik groot. Ons kan God nooit ten volle verstaan nie want ons is die skepping van sy hande. Tog is God se genade so groot dat Hy ons ryklik seën met al die seëninge van die Gees wat daar in die hemel is.

Hierdie seëninge is die geloof, die uitverkiesing, die heilige lewe in en deur Jesus Christus, die geestelike gawes wat ons deur die Heilige Gees ontvang. God het ons as sy kinders aangeneem deur Jesus Christus. Dit word telkemale met die gebruik van die Hielige Nagmaal opnuut aan ons verkondig.

Ons is God se kinders deur Jesus Christus. Daarom kan ons nie anders as om elke dag God te loof en te prys en te aanbid nie.

Laat dit wees volgens jou geloof

November 20, 2023 / admin

Skriflesing: Matteus 9:27-38 (2020)
Teksvers: Matteus 9:28-29
HK Son 23

Ons almal weet wat bates en laste is. ‘n Bate is iets wat waarde het, en waarde toevoeg. Dit is ‘n bate om bates te besit.

Nou vra die Heidelberger, watter bate is jou geloof? Wat is die bate wat jy besit deur te glo? Dit is ‘n merkwaardige vraag. Want dit leer ons oor die uitsonderlike waarde wat daar in geloof is. Deur sy openbare optrede het ons Here Jesus baie mense gesond gemaak en nuwe hoop gebring.

Ons staan vanaand stil by twee blinde manne wat in geloof tot Jesus nader en pleit vir genesing, waarop ons Here antwoord: laat met julle gebeur volgens dit wat julle glo!