Skrywer: admin (Page 200 of 328)
Skriflesing: Openbaring 22; I Korintiërs 16:22
Teksvers: Openbaring 22:20
HK Sondag 48
“Laat die genade kom en laat hierdie wêreld verbygaan! Amen.
Hosanna vir die Seun van Dawid!
As iemand heilig is, laat hy kom!
En as iemand onheilig is, laat hy hom bekeer!
Maranata! (I Kor 16:22) Amen”
Dié woorde kom uit die eerste eeu n.C. uit die geskrif DIDACHé as aantekening by ons teksvers Op 22:20. Byna 2000 jaar later het die Here nog nie hierdie gebed verhoor nie… wel nog nie volledig nie. Die koninkryk se koms het immers ‘n ‘reeds en ‘n nog-nie’-perspektief, want die koninkryk is hier én aan die kom, en dààrvoor leer die Here Jesus ons bid in die tweede bede. Die koms van die koninkryk geskied op verskeie wyses en ons kyk daarna onder die volgende punte:
- Die (weder)koms van Christus.
- Die koms in mense-harte.
- Die koms deur mense-hande.
- Die koms deur ons mense-stryd.
Skriflesing: 1 Kronieke 29:1-25
Teksvers: 1 Kronieke 29:17, 22
“Ek weet, my God, dat U harte toets en vreugde vind in opregtheid” Hierdie woorde sny deur die hart van die mens. Ons wat so geneig is om voor te gee wat ons nie is nie. Ons wil tog so graag “oorspronklik” wees. Maar in ons strewe na opregtheid leef ons met valse harte. Ons dra maskers wat nie ten doel het om die kieme weg te hou nie.
Ons staan vanoggend stil by die vreugde van die HERE in die opregtheid van die harte van sy kinders, as hulle Hom dien met al die skatte wat Hy self gee. Daarin sien ons ook die blydskap om te gee. Dit maak ‘n mens blyer om te gee, as om te ontvang. Amen
Ons het die afgelope jaar nogal gewoond geraak om statistieke te hoor en daarop te reageer. Veral die Covid-syfers wat elke dag uitgesaai is… en as jy nie die konteks behou nie, kan dit maklik vrees en angs by jou opwek. Dit was en is ongelukkig een van die neweeffekte van die pandemie se gereelde statistieke. Dan daal die syfers weer en die pendulum swaai oor na die ander kant. In sulke tye van verwarring vlug ons maar na die veilige arms van die troue God en Vader wat alles weet, alles in geheel sien, lei en rig.
Ander statistiek wat u dalk nooit regtig hoor of sien nie, al is u self deel daarvan, is dié van ons erediensuitsendings. Volgens ons elektroniese kommissie kan hulle presies sien en bereken hoeveel keer die video- of oudio-opnames bekyk of beluister word, hetsy in tyd of latere opnames daarvan. Net die laaste paar weke waar daar niemand toegelaat is om na die eredienste te kom nie, was dié syfers egter baie bemoedigend. Soggens was daar gereeld meer as 2000 luisteraars en saans ongeveer 700.
As u uself so bietjie in die prediker se posisie plaas om op die preekstoel te staan en daar is niemand of regtig weinig mense in die kerk (want nét die diensdoenende ampsdraers was daar vir toesig oor die woordbedienaars, soos die kerkorde dit vereis), dan raak hierdie syfers mens nogal baie. Om vir ‘n letterlik leë kerk te preek, is nie so maklik as wat dit dalk lyk nie. Ek dink die ander leraars sal saamstem dat ons nie kan wag om weer vol kerke te sien nie.
Om egter te besef dat ons in hierdie uitdagende omstandighede byna méér luisteraars na die Woordbediening trek, is ‘n riem onder die hart. Dit ‘bewys’ ook dat die omstandighede mense weer terugdwing na die Woord en na die God van die Woord. Nou is dit my stille wens dat, sodra die kerkgebou weer meer en meer oopgestel word, die gemeente in dieselfde volle krag sal optrek kerk toe.
Vergun my dus ‘n spesiale woordjie van dank aan die hele elektroniese span wat met groot toewyding deur die hele grendeltyd gesorg het dat die eredienste onverpoosd uitgesaai en op verskeie maniere beskikbaar gestel is aan die hele gemeente.
Ons sien mekaar DV binnekort in die kerkgebou vir die eredienste!
Ds Maarten