Gereformeerde Kerk Centurion

Die webtuiste vir die Gereformeerde Kerk Centurion.

Page 61 of 331

Eer God en geniet Hom vir altyd

April 26, 2024 /

Elkeen van ons ervaar hoe lewensomstandighede bykans daagliks al hoe moeiliker word en kan nie regtig by die pas hou van hoe vinnig dinge beweeg nie. Sedert ons gesin se aankoms in die gemeente einde 2019 het so baie dinge verander. Ek onthou baie goed hoe ek deur leë strate gery het oppad na die hospitaal en my vrou, omtrent soos Raponsie, van bo uit die venster, hier van onder in die parkeer area toegewuif het.

Die vraag op my gemoed wat gedurigdeur oor en oor deur my gedagtes maal, is dit: wat het in my verander? Behalwe al die vrese wat oorkom moes word en die al die uitdagings wat ons te bowe moes kom, wonder ek steeds of ons regtig verander het. Of ons werklik iets geleer het.

So maklik vergeet ons al die lesse van die verlede. So maklik keer ons terug na die ou weë wat ons laat verdwaal in die sorge van die lewe. Dan het ons as te ware armer geword en die waarde van ons ervaringe verloor. Die gevolg is dat ons ophou om te lewe en net probeer oorleef. Ons is so haastig besig na die volgende “betaaldag” uit te sien, dat ons al die mooi van elke dag miskyk.

Dit laat my dink aan die eerste vraag en antwoord van die Westminster belydenis.

Q. 1. What is the chief and highest end of man?
A. Man’s chief and highest end is to glorify God, and fully to enjoy him forever.

Hierdie vraag herinner my telkens om verby die goed van die Vader te kyk, en die Vader self raak te sien. Ons is so geneig om ons lewensdoel op onsself te betrek, en te vergeet dat ons doel, ons hoogste doel en heerlikste taak is om vreugde in God te vind. Om ons lewe elke dag te leef tot eer van God.

Dat ons sal ophou jaag verby die goedheid van God om ‘n oomblik stil te word en God self te geniet en ons vreugde en vrede in Hom te vind.
‘n Prediker na wie ek onlangs geluister het, het opgemerk, dat die hoofsaak van ‘n huwelik kommunikasie is. As ‘n man en vrou ophou om met mekaar te praat, kom daar probleme. Hoeveel te meer as ons as bruid nie meer tyd maak om te luister na ons Bruidegom, of selfs nog meer, dat ons nie met die bruidegom praat (bid) nie. Nie om die inkopielys van ons begeertes en probleme oor te dra nie, maar om ons vreugde in God en in die heerlikheid van sy genade te deel.

Wat is jou hoogste ambisie in die lewe? Wat is jou lewensdoel? Waarna streef jy en wat is die eindpunt wat jy wil bereik?

Laat dit wees om God te eer en Hom vir altyd te geniet.

Lourens (vdm)

Voorvaders voor die Vader

April 23, 2024 /

Skriflesing: Matteus 15:1-20 (2020)
Teksvers: Matteus 15:7-8
HK: Sondag 39

Eer jou vader en moeder. Hierdie is nie onbekende, vreemde woorde nie. Tog is daar soms misverstand oor wat die gebod werklik bedoel. Sommige mense haak vas by outoriteit, veral die owerheid. Hierdie gebod is gegee bykans 400 jaar voordat daar ‘n koning in Israel of owerheid was. Die fokus lê by VADER en MOEDER. Die huisgesin is hier in die oog, nie die regering nie. Ouers moet eerwaardig optree en hulle kinders leer om met eerbied en ontsag veral vir God te leef . 

Ons kyk vanaand na Jesus se optrede as daar ‘n afvaardiging uit Jerusalem opdaag om sy werk te ondersoek. Volgens hierdie geselskap is daar geen ontsag of eerbied vir die voorvaderlike gebruike nie, maar Jesus leer ons ook die voorvaders staan voor die Vader. 

Die nuwe lewe raak sigbaar in jou beursie

April 23, 2024 /

Skriflesing: 2 Korintiërs 8 (1983)
Teksvers: 2 Korintiërs 8: 8,9

Ons sit die reeksprediking uit die Tweede Korintiërbrief voort, met die oorhoofse jaartema van “Die Nuwe Lewe in Christus” ( 2 Kor 5:17). 

Iemand het onlangs in sy preek gesê hierdie hoofstuk is nie vir die finansieel-sensitiewe lesers nie! 

Maar op die ou end praat Paulus nie oor geld nie maar oor ons houding en die gesindheid van nuwe harte. So word ons ‘n aansporing vir mekaar as ons ons geloof praktyk maak. 

Die Here gee sodat ons kan gee 

April 19, 2024 /

(Gal 6:10) 

Die werkwoord “gee” het te doen met die gawes wat ons aan ander en aan die Here bring. Die beginsel wat van Gen 14:18-20 en wat regdeur die Bybel as riglyn loop, is ʼn tiende of tien persent van alles wat jy ontvang. Wat ons het, het ons van die Here ontvang. Hy gee sodat ons kan gee. So toets Hy ons gesindheid. 

Jesus het ook nooit gehuiwer om die onderwerp van geld aan te spreek nie. Elf van sy 40 gelykenisse verwys bv na geld. Geld is immers so alledaags dat ons almal die voorbeeld daarvan kan snap. Geld is nie die probleem nie, maar wel geldgierigheid. Paulus skryf aan Timoteus: “Geldgierigheid is die wortel van alle kwaad” (1 Tim 6:10). Geld kan ʼn afgod in ons lewe raak en daarvoor waarsku Jesus in die Bergrede: “Julle kan nie God en Mammon dien nie!” 

Die Here wil egter dat die bekering van die nuwe lewe in Christus, ons tot diep in ons beursies raak. Daarom toets Hy ons vrygewigheid (2 Kor 8). 

“Bring dus die hele tiende na My voorraadkamer, sê die Here, …” anders beroof ons God (Maleagi 3:8-12). God gee aan ons, sodat ons kan gee. 

U kan benewens u kerklike bydrae en die kollektes vir die armes en barmhartigheid ook nog bydra vir die volgende en ander instansies: 

  • Teologiese skool en Studentekas 
  • Mukhanyo Theological College (waarvan ons gemeente ‘n lidkerk is) 
  • Transoranje Instituut vir Buitengewone Onderwys 
  • Bybelverspreiding en Biblos 
  • Evangelisasieprojekte en GKSA Sendingfonds 
  • Projektefonds van die Kerk 
  • Crossroads Gevangenisbediening 
  • Koningskinders 
  • Kerklike Tydskrifte, DKB, Vroueblad en Kruispad 
  • Ander verdienstelike sake of organisasies 

Oorweeg selfs een van hierdie sake in u boedel en testament. Mag die Here ons ook in die finansiële aspekte van ons geloof en godsdiens seën, en mag ons altyd waarlik dankbaar wees vir alles wat ons uit Sy hand ontvang. 

Ds Maarten 

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑