Kategorie: Preke (Page 49 of 187)

Die liturgie: Ons gebede soos wierook

Augustus 28, 2023 / admin

Skriflesing: Openbaring 8:1-5 (1983) Eksodus 40:1-5; 30:1-10,34-38
Teksvers: Openbaring 8:3,4

In die Tabernakel in die woestyn (en later in die beloofde land) staan die wierookaltaar reg voor die voorhangsel (gordyn).

Reg agter die voorhangsel staan die verbondsark met die versoendeksel en die twee gerubs daarop. Die rook van die wierrookaltaar kan eintlik nie by die verbondsark kom nie, behalwe eenkeer per jaar op die Groot Versoendag, as die hoëpriester daar ingaan namens die volk en met bloed en wierook in sy hande.

Nou het Christus die pad gebaan deur die voorhangsel heen (Heb 10:19), dit is deur sy liggaamlike offer aan die kruis. Ons gebede kan nou by die troon (verbondsark simbolies) van God uitkom. Daarom sien ons elke Sondag uit dat ons as gemeente saam kan kom bid.

Die maagdelike geboorte van Jesus Christus

Augustus 21, 2023 / admin

Skriflesing: Genesis 3; (1953) Luk 1:26-38; Matt 1:18-25; Galasiërs 3:15,16
Teksvers: Gen 3:15
HK: Sondag 14

Wat in HK Sondag 14 geleer en bely word is vir sekere mense onaanvaarbaar omdat dit alle wetenskaplike grense oorskry.

Wanneer ons egter die werklike diepte van sondeval sou begryp, dan sal jy ook verstaan dat slegs ‘n bo-menslike en bo-natuurlike ingrype, soos ‘n maagdelike geboorte (asook ‘n opstanding uit die graf en dood), die mens en hele skepping van daardie sonde-vloek kan verlos.

Die wet is ons tugmeester na Christus toe

Augustus 21, 2023 / admin

Skriflesing: Galasiërs 3:1-29 (2020)
Teksvers: Galasiërs 3:24

Die wet leer ons om te glo. Dit is in kort waarop hierdie woorde uit Galasiërs neerkom. Want u sien, die belofte van God is lank voor die wet afgekondig. Geloof kom voor die wet. Daarom begin die afkondiging van die tien gebooie met die woorde: Ek is die Here jou God wat jou verlos. Dit is op grond van die verlossing wat die wet aan die volk gegee word, nie andersom nie.

In Eksodus 19 verklaar God dat Hy van sy volk ‘n koninklike priesterdom maak. Dit strook ook met die woorde uit Openbaring 1 dat ons konings en priesters vir ons God gemaak word. So het God die wet gegee as ‘n tugmeester, as ‘n onderwyser sodat ons by Christus kan kom.

Amper Christenskap

Augustus 14, 2023 / admin

Skriflesing: Handelinge 26:1-32 (2020)
Teksvers: Handelinge 26:15-18
HK: Sondag 13

Nie minder as drie maal word die bekering van Paulus in die boek Handelinge beskryf .

Die eerste keer is die beskrywing van sy bekering, en die ander twee geleenthede is waar Paulus self verduidelik of getuig van sy bekering.

In hierdie geval, voor koning Agrippa, en daarvan sê die koning: Jy het my amper oortuig om ‘n Christen te word.

Ons staan stil by hierdie getuienis van Paulus waarin hy erken dat Jesus Christus die Here is.

Wie van harte bely sal gered word

Augustus 14, 2023 / admin

Skriflesing: Romeine 10:1-21 (1953)
Teksvers: Romeine 10:6-10

Hoe heerlik as mense saam in eenheid en liefde lewe. Meer nog as dit gebaseer is in een en dieselfde geloof en die belydenis daarvan. Daarom is die volgende hoogtepunt in die erediens-liturgie die gemeenskaplike Geloofsbelydenis.

Ek onthou dat ek en my skoonseun op 31 Oktober 2017 in die Luther-kerk in Wittenberg in ‘n erediens was (presies 500 jaar na die begin van die Groot Hervorming!), en daar doen hulle toe die Twaalf Artikels in Duits… en ons twee doen dit toe kliphard in Afrikaans… en die vreugde-trane rol, want daardie liefdevolle geloofsbande oor eeue en tale heen het ons onmiddelike eenheid en liefde laat belewe.

So kan dit elke Sondag in die erediens saam met al u medegelowiges in hierdie gemeente in Centurion gebeur.

Wie sê julle is Ek?

Augustus 7, 2023 / admin

Skriflesing: Matteus 16:13-23 (1983)
Teksvers: Matteus 16:16,17
HK: Sondag 12

Die monogram van die belydenis van Christus as ons Verlosser is redelik bekend in die vorm van ‘n VIS. Die ware monogram is egter die een wat hierbo verskyn en waarin die letters van die belydenis dat Jesus die Christus en Verlosser is, saamgevat is. Die eerste letters van die Griekse woorde vir Jesus Christus Seun van God ons Verlosser vorm saam die woord IXTHUS, in Afrikaans VIS.

Waarskynlik het die Ichthus-belydenis sy oorsprong in die belydenis van Petrus in ons teksvers en uiteindelik sal dit in die geskiedenis uitloop op die 12 Artikels van ons Christelike en apostoliese geloofsbelydenis.

Kom ons antwoord vanaand met Sondag 12 op die vraag van Jesus in Matteus 16:16 en bely dat Jesus die lank-beloofde Christus is, ons Koning en ons Verlosser.