Kategorie: Nuwe Testament (Page 7 of 112)

Jou doop is ‘n begrafnis

Junie 24, 2024 / admin

Skrifgedeelte: Romeine 6:1-14
Teksverse: Vers 3 en 4

Op so baie maniere word die doop verstaan en verduidelik, dat ons soms self in verwarring raak. Jesus het sonder enige twyfel die opdrag gegee dat alle dissipels gedoop moet word en geleer moet word. Wat beteken die doop werklik? Hier in Romeine word ons geleer dat die doop ‘n begrafnis is. Ons word in die dood van Jesus gedoop. Dit beteken twee dinge. 1. Jesus Christus wat sterf in ons plek, maar ook 2. ons wat saam met Christus in die sondige mens sterf met die doel dat ons saam met Hom in ‘n nuwe lewe kan opstaan en in Hom kan lewe.

Die verhoogde Christus het alle mag in hemel en op aarde en Hy kom weer

Junie 24, 2024 / admin

Skriflesing: Matteus 25: 31-46
Teksvers: Matteus 25: 31,32

1. Christus heers as koning van die wêreld.
2. Christus seën as hoof van die kerk.
3. Christus oordeel as regter oor almal.

“Wanneer die Seun van die mens in majesteit kom en al die engele saam met Hom, sal Hy op sy koninklike troon gaan sit.

Al die volke sal voor Hom bymekaar gebring word, en Hy sal die mense van mekaar skei soos ‘n wagter die skape van die bokke skei.” Matt 25:31-32

Dra mekaar se laste en vervul so die wet van Christus

Junie 10, 2024 / admin

Skriflesing: Galasiërs 5:1-15 (2020)
Teksvers: Galasiërs 5:14; 6:2

Daar is verskeie maniere waarop ons die begrip “wet” kan verstaan. Daar is in die eerste plek die 10 Gebooie, wat ook bekend staan as die sedewet. Daarmee saam word ook die eerste 5 boeke van die Bybel die wet genoem. Daarin vind ons die seremoniële wette sowel as burgerlike wette.

Noudat ons die Kategismus behandel het oor al 10 gebooie, kom ons by die vervulling van die wet deur ons Here Jesus. Maar so word ons ook geroep om die wet te vervul.

Ons kyk in besonder na die Nagmaal en die wyse waarop ons hierdie opdrag kan nakom.

Groei jy geestelik?

Junie 10, 2024 / admin

Skriflesing: 2 Korintiërs 13 (1983)
Teksvers: 2 Korintiërs 13:9-13

So kom die reeks preke oor 2 Korintiërs tot sy einde. Mens het nogal gewonder oor Paulus se bedoelinge in hierdie skrywe. Soms was hy humoristies of sarkasties en soms selfs behoorlik vies of onthuts. In woorde was hy ook nie altyd so sag nie.

Dis nogal te verstane as mens eers sy ware doel of bedoeling snap.

Hy het volgens ons teksvers die gemeente se beste voordeel in gedagte. Hy doen sy werk al ontstel dit soms ook die luisteraars of lesers. Alles in die lyn van hulle geestelike groei tot volwassenheid. Dan kan Paulus en ook ons die sonde nie verdra of té sagkens hanteer nie.

Mag die prediking van hierdie afgelope ses maande ook bydra tot jou geestelike volwassenheid.

Ondersoek jouself, en stel jouself op die proef

Junie 3, 2024 / admin

Skriflesing: 2 Korintiërs 13:1-13 (2020)
Teksvers: 2 Korintiërs 13: 4-5

Ondersoek jouself, en stel jouself op die proef. Hierdie twee aspekte klink dieselfde maar dit is nie.

Om ondersoek te doen, is om al die besonderhede na te gaan. Dit is om na alle verskillende faktore en elemente te kyk en dan te beoordeel wat goed en wat sleg is. Dink bv. as jy ‘n nuwe voertuig koop. Jy stel ondersoek in watter modelle daar is en hoeveel hulle kos. Wat is die wringkrag en hoeveel kilometer die voertuig kan ry per liter. En dan gaan neem jy ‘n toetsrit. Jy stel die voertuig op die proef.

So moet ons ook toets of ons in die geloof is. Saam met hulle wat openlik hulle geloof bely en die wat gedoop word, berei ons ook voor vir die nagmaal met die ware selfondersoek.

Wat het ons getuies nog nodig?

Mei 27, 2024 / admin

Skriflesing: Markus 14:53-65 (2020)
Teksvers: Markus 14:55-60
HK: Sondag 43

Valse getuienis is nie heeltemal dieselfde as om te jok nie. Die negende gebod se inhoud en gewig is baie meer as net om waar en vals teenoor mekaar te stel. Met ander woorde, om nie die waarheid te praat nie is heeltemal anders as om vals te getuig.

Ons hele woordeskat is besoedel met onwaarhede. Dink maar net hoeveel keer beskryf jy dinge uit jou ervaring van die lewe, wat nie presies reg is nie. Jy het gedink dit was ‘n rooi ballon, maar dit was toe al die tyd ‘n donker pienk een. Valse getuienis is egter om doelbewus te sê die ballon was rooi terwyl jy eintlik weet dit is donker pienk.

Uit die verhoor van ons Here Jesus deur die Joodse Raad staan ons vanaand stil by die tema: wat het ons getuies nog nodig?