Die webtuiste vir die Gereformeerde Kerk Centurion.
Skriflesing: 1 Johannes 2:18-29 (2020)
Teksvers: 1 Johannes 2: 22-25
Elkeen wat uit God gebore is, se lewe getuig van God wat in hom/haar werk. Om in Hom te wees, bedoel dat jy deel het aan Christus en al sy weldade.
Tog leef ons in ‘n stukkende wêreld waar daar baie uitdagings en onsekerhede mag wees, vol dwalinge en valse idees. Daarom kom die oproep: Bly in Hom! Moenie weg van God af leef nie. Moenie Christus ontken nie, maar ken Hom.
Leef in Hom, Leef deur Hom, Leef tot Hom.
Skriflesing: Hebreërs 1:1-4; 13:8; Fil 2:5-11; Joh 1:1-3; Kol 2 (1983)
Teksvers: Hebreërs 1:1-4
Ek bepaal u aandag in die prediking steeds by die jaartema en die grootheid of gróótsheid van ons Verlosser. In sy pragtige kommentaar op Hebreërs beskryf Prof Andrie du Toit ons teksverse as een van die keurigste en diepsinnigste sinne in die hele Bybel! (p. 33)
Keurig omdat die Griekse teks 5 keer met die letter ”p“ allitereer: polumeros kai polutropos palai tois patrasin en tois profetais. As ons daaraan dink dat hierdie boek eintlik ‘n preek is wat aan die gemeente van Rome voorgelees moes word, sou jy verstaan dat by die aanhoor van hierdie keurige verse die mense se aandag dadelik gevange geneem is.
Diepsinnig omdat dit een eintlik ‘n doksologie is op die oorgang van die Ou Testament na die Nuwe Testament se verstaan oor wie die ware Verlosser van die wêreld is!
Skriflesing: Johannes 14; Openbaring 19; 2 Kor 11:2 (1983)
Teksvers: Openb 19:7,8
HK: Sondag 1
Ons begin vanaand weer met leer-prediking volgens die Heidelbergse Kategismus. Hierdie is volgens Kerkorde Art 68 ‘n opdrag aan elke gemeente en moet dus gereeld onderhou word. Mens sou hierdie sg. Kategismusprediking kon sien as voortdurende volwasse toerusting van die gemeente van die Here Jesus Christus.
Ons neem in hierdie onderrig altyd die temas uit die belydenisskrif (HBK), maar die inhoud van die prediking bly steeds die Woord van God.
Dit sal ‘n goeie wenk wees dat elkeen van ons HK Sondag 1 uit die hoof leer ken. Probeer dit gerus, want dit is ‘n baie mooi opsomming van ons geloof (jou troos).
Skriflesing: 1 Johannes 2:1-17 (2020)
Teksvers: 1 Johannes 2: 3-6
Om uit God gebore te wees, beteken tog sekerlik ook dat jy vanuit Hom voortkom. Hy is die Een wat jou maak en vorm deur die Heilige Gees wat jy is, ‘n Kind van die Allerhoogste.
Kinders vertoon nie net die eienskappe van hulle ouers nie, hulle doen ook wat hulle ouers doen. So moet ons as kinders van God, wat uit Hom gebore is, ook in sy beeld en gelykenis leef. Ons moet lyk soos Hy lyk. Ons moet leef soos Hy wil hê ons moet leef. Met ander woorde, om uit God te wees, beteken ook om IN Hom te wees.
Skriflesing: Lukas 9 (1983)
Teksvers: Luk. 9:29,30
Die bogenoemde preektema is eintlik bekende woorde, maar die impak daarvan word maklik deur ons ontken. Laasweek kon ons leer dat God ons uit liefde as sy kinders aangeneem het. Hierdie nuwe identiteit in Christus maak ons egter nie bo swaarkry verhewe nie.
Volgens die vorige paragraaf (9:23,24) moet ons juis agter Jesus aangaan… Daarom moet ons verstaan hoe die vurk in die hef steek. Ons moet begryp dat ons Koning se heerlikheid anders kom as wat deur die wêreld en sy filosofieë bedink of verwag word.
Laat ons onsself deeglik oriënteer tov die pad van stryd wat vir die gelowige in hierdie laaste dae inwag. Hy wat ons vooruit gegaan het, sal ook by ons wees.
Skriflesing: Kolossense 1 (1983)
Teksvers: Kol 1:10 (9-20)
Paulus bid vir hierdie kerkie uit die heidendom dat hulle mag groei in die geloof. Dit beteken dat hulle sal toeneem in gehoorsaamheid aan sy woord en vrugdra wat by die geloof en bekering pas.
Paulus begrond sy aansporing of vermaning in die beskrywing van die grootheid of gróótsheid van Jesus Christus, hul ewige Verlosser.
Wat is jou prentjie of idee van Christus se heerlikheid, mag en matesteit? Dit is nogal bepalend vir die erns waarmee jy jou lewe vorm na die wil van God.
© 2026 Gereformeerde Kerk Centurion
Theme by Anders Noren — Up ↑