Kategorie: Nuwe Testament (Page 5 of 112)

Blus die Gees nie uit nie

Augustus 19, 2024 / admin

Skriflesing: Handelinge 7:44-54; Efesiërs 4:17-5:2; 1 Tessalonisense 5:19 (2020)
Teksvers: Handelinge 7:30; 51-53

Die Remonstrante het in die 3de en 4de artikel van hulle leerstellings die standpunt ingeneem dat die mens se sonde nie tot die dood is nie, maar slegs ‘n ernstige aantasting van sy bestaan. Daarby het hulle ook verkondig dat die mens steeds sy vrye wil behou en nie geheel en al verdorwe is nie. So is hulle oortuig dat ‘n mens die werking van die Heilige Gees kan weerstaan, soos beskryf in Handelinge 7.

Ons kyk vanoggend na die gesamentlike antwoord vanuit die Dordtse Leerreël wat hierdie twee dwalings gesamentlik aanspreek in Hoofstuk 3/4 met die oproep om die Gees van God nie te bedroef nie.

Offer of slagoffer?

Augustus 12, 2024 / admin

Skriflesing: Markus 15:15-41 (1983)
Teksvers: Markus 15:39

Die sterwe van ons Verlosser op Golgota is nie maar net ‘n platoniese verhaal van iemand wat dood is nie.

Elke skrywer van die vier Evangelies probeer immers sy bes om een of meer van die fasette van die openbaring van wie die Christus is, te beklemtoon. Daarom moet ons by die deurgaan van hierdie dieptepunt van sy lyde by die kleinste besonderhede stilstaan.

Vanaand kyk ons aandag na die oomblik toe Hy sy laaste asem uitgeblaas het.

Heilsorde(4): Die gawe van Geloof

Augustus 5, 2024 / admin

Skriflesing: Ef 2; Filip 2:12,13 (1983)
Teksvers: Efesiërs 2:8

Die wonder van die heilsorde is daarin geleë dat dit altyd God is wat aan die werk is in mense se lewens. Sy ingrypende werk bring redding en verlossing.

Dit is egter so dat die genadige werkinge van God in ons, ons ook aan die gang sit om werksaam te raak. Ons is immers nie dooie blokke of skaakstene wat net rondgestoot of geskuif word nie. As God die geloof in ons werk, dan glo ons ook werklik. En daardie reddende geloof is die ware geloof wat die wedergebore mens nou aan Christus, as Verlosser bind.

Deur jou geloof word jy gered!

Heilsorde(3): Die wedergeboorte

Julie 29, 2024 / admin

(Last updated on Augustus 5th, 2024)

Skriflesing: Johannes 3:1-10; Rom 3:10-12; Joh 7:45-52; Joh 19:38-42 (Nikodemus) (1983)
Teksvers: Johannes 3:3

Miskien moet u weer dink oor die teks en dan eerlik vra of dit ‘n opdrag (imperatief), maw dat dit iets is wat jy moet doen…

…is dit net ‘n absolute waarheid waardeur jy moet kennis neem dat jy eintlik BAIE diep verlore is/was as daar geen die bo-natuurlike ingrype van God in jou lewe sou wees nie!!

Jesus onderstreep in hierdie antwoord aan Nikodemus ons ONMAG as sondaars en daarteenoor Sy ALMAGTIGE vermoë om sondaars uit hul ellende te red.

(Kyk elders in ons nuusbrief vir meer inligting oor die Heilsorde)

Trane sal nie help nie

Julie 29, 2024 / admin

Skriflesing: Gen 25:19-34; 27:27-41 Heb 11:20; 12:14-17 (2020)
Teksvers: Hebreërs 12:14-17

DL 1 par 15 beskryf dit so: Verder toon die heilige Skrif hierdie ewige en onverdiende genade van ons uitverkiesing baie duidelik aan en verkondig dit nadruklik aan ons. Dit getuig bowendien dat nie alle mense uitverkies is nie, maar dat sommige nie uitverkies is nie of in die ewige uitverkiesing van God verbygegaan is. God het besluit om hulle, na sy volkome vrye, regverdige, onberispelike en onveranderlike welbehae, in die gemeenskaplike ellende te laat bly. Daarin het hulle hulleself deur hulle eie skuld gestort. God het immers besluit om nie aan hulle die saligmakend~ geloof én die genade van die bekering te gee nie. Om sy geregtigheid te openbaar, het God besluit om hierdie mense aan hulleself oor te laat, hulle onder sy regverdige oordeel te laat bly en om hulle nie alleen oor hulle ongeloof nie, maar ook oor al hulle ander sondes te veroordeel en ewig te straf. Dit is die besluit van die verwerping, wat God hoegenaamd nie tot bewerker van die sonde maak nie, want dit sou ‘n godslasterlike gedagte wees. Inteendeel, dit sê juis dat God ‘n gedugte, onberispelike en regverdige Regter is wat die sonde straf.

Volg My!

Julie 22, 2024 / admin

(Last updated on Augustus 5th, 2024)

Skriflesing: Matteus 9:9-13 (2020)
Teksvers: Matteus 9:9

Roeping, roep, geroep, beroep, aanroep, uitroep, oproep, inroep. Die begrip roep of roeping is nie vir ons vreemd nie. Die meeste mense sal met oortuiging kan antwoord dat hulle ‘n lewensroeping het. Dit word dan beskryf as ‘n innerlike gevoel of drang om diensbaar te wees vir ‘n groter doel. Vir baie mense is hierdie roeping dit wat hulle sin en betekenis in die lewe gee. Maar dit is nie altyd so maklik om presies te weet wat daardie roeping in jou lewe is nie.

Mense voel soms verward en onseker oor die verhouding tussen hierdie geestelike innerlike drang na ‘n doel of betekenis (vocatio), en hulle alledaagse bestaan en beroep (professio). Gevolglik is daar verskillende verstaan en begrip oor wat roeping werklik beteken. Vereis roeping ‘n geestelike element waar jou gewone werk (beroep) opgeoffer word om iets belangriker in die koninkryk van God te verrig? Of is jou beroep deel van jou roeping? Wat van geloof? Ons staan vanaand stil by die beweegrede as God tot ons spreek: volg My!