Gereformeerde Kerk Centurion

Die webtuiste vir die Gereformeerde Kerk Centurion.

Skrywer: admin (Page 295 of 328)

Kan jou geliefdes teen gevare beskerm word?

Oktober 19, 2018 /

Skriflesing: Job 1
Teksvers: Job 1:4 en 5

Job was in sy tyd in die destydse Ooste die belangrikste man. Verder het die Here gesê dat Job se gelyke nie op aarde gekry sal word nie: “hy was vroom en opreg, hy het die Here gedien en die kwaad vermy.” Ten spyte van sy welvaart en belangrikheid, het Job die Here vroom en opreg gedien. Hy was ‘n toegewyde pa en het telkens by die Here ingetree vir sy kinders wat dalk gesondig het.

So het dit gebeur dat Job se sewe seuns om die beurt partytjies gehou het in mekaar se huise. Dan het hulle, hulle drie susters genooi om saam met hulle fees te vier. Job het dan elke keer na so ’n reeks party- tjies sy seuns en dogters beveel om hulle vir die bring van offers te reinig. Vroeg die môre na die partytjies het Job vir hulle almal ’n brand- offer gebring. Job het dit gedoen uit vrees dat sy kinders dalk gesondig het en God in hulle gedagtes gevloek het.

Ten spyte van al Job se versoenende optrede ter wille van én in be- lang van sy kinders, het al 10 sy kinders op een slag gesterf. Was sy optrede dan nutteloos en tevergeefs? Het die offers nie gehelp nie? Wat is dan nodig om jou geliefdes teen gevare te beskerm?

Laai af

Vertrou en wag op ons Getroue Verbondsgod alleen

Oktober 19, 2018 /

Skriflesing: Jeremia 14
Teksvers: Jeremia 14:20-2

In hierdie hoofstuk kondig die Here aan dat Hy sy rug op Israel gaan keer. Hy gaan nie meer na hulle gebede en hulle smekinge luister nie. Hulle het die tyd van genade verspeel. Jeremia pleit by die Here vir sy verwerpte volk. Hy vra of die Here sy volk dan nou heel- temal verwerp het? Walg die Here as Hy aan hulle dink?

Jeremia bely dat die Here se volk opstandig was; dat hulle teen die Here gesondig het; dat selfs hulle voorvaders skuldig was.

Jeremia doen ‘n beroep bloot op die Here se Naam alleen. Hy pleit dat die Here sy volk tog nie sal verwerp nie; dat die plek, waar die Here in sy magtige teenwoordigheid regeer, nie verag sal word nie. Hy beroep Hom op die Here se verbond met hulle en dat Hy sy verbond met hulle tog nie sal prysgee nie!

Laai af

Augustinus uit Afrika

Oktober 19, 2018 /

As gelowiges bely ons dat God Drie-enig oor alles en almal beskik. Juis daarom gee Hy op spesifieke tye in sy kerke se geskiedenis besondere persone met spesiale gawes en vermoëns om sy kerk te stuur, te rig en te lei. So sal dit wees tot en met die wederkoms. Een so ‘n persoon is Aurelius Augustinus. Hy is in die Noorde van Afrika gebore in die jaar 354.

Augustinus word deur God gebruik om sy kerk by die Woord te hou en dwalinge teen te staan. Augustinus sou een van die bekendste kerkvaders word. Die kerkvaders was persone, wat deur God beskik is wat die teologie uitgebou het en oor die kerkleer ge- skryf het. Van almal sou Augustinus die belangrikste word.

Augustinus se pad met die kerk was nie vanselfsprekend nie. Van sy geboorte in 354 tot hy biskop word van die kerk in Noord-Afrika is ‘n lang en moeisame pad. Sy vader is welgesteld, ‘n man van aansien, bekend en gewild, maar van godsdiens wil hy niks weet nie. Inteendeel hy is ‘n uitgesproke heiden wat godsdiens verag het.

Augustinus se moeder daarenteen was ‘n opregte kind van die Here. Sy bely Christus openlik en haar grootste begeerte was dat haar man en seun ook Christene sou word.

Augustinus het as jongman ‘n sedelose lewe gelei ver van God en sy Woord af. Hy maak ‘n draai in Rome waar hy in kontak kom met die preke en voordragte van Ambrosius. Deur die preke het die Heilige Gees in Augustinus gewerk sodat hy tot geloof gekom het.

In 387 word Augustinus deur Ambrosius gedoop. So begin sy dienswerk in die koninkryk van God. Toewyding en ywer sou sy lewe kenmerk. God het hom gebruik as ‘n groot bewaarder van die waarheid vanuit die Skrif. Augustinus het baie geskryf en van sy geskrifte is nog van baie groot waarde vir die kerk. Luther en Calvyn het dikwels daaruit aangehaal.

Die geskrifte van Augustinus getuig van ‘n diepe insig, besondere begaafdheid, gees- telike nederigheid en erkenning van sy eie swakheid en gebrokenheid.

Ds. Hannes Noëth

Noodsaaklik, maar swaar

Oktober 12, 2018 /

Wat is in die lewe van ‘n gelowige noodsaaklik, terwyl dit terselfdertyd sleg en onaange-naam mag wees?

Spreuke 10:17 sê: “Wie hom laat leer, ken die pad na die lewe; wie teregwysing verwerp, dwaal van dié pad af.” Ja dit is verseker nie maklik om iemand tereg te wys nie, om nie eens daarvan te praat om self deur ander tereg gewys te word nie.
Teregwysing is noodsaaklik vir elke gelowige, maar dit is ook baie moeilik om tereg gewys te word.

So maklik sien ons die verkeerde in ander mense se lewens, maar dit is moeilik om die verkeerde in my eie lewe raak te sien en te erken. Nog moeiliker as iemand gedring deur die Heilige Gees met my kom praat oor verkeerde dinge in my lewe.

Dit is so belangrik om iemand wat gesondig het, en op ‘n dwaalpad is, te vermaan. Verma-ning en bemoediging word altyd saam gedoen. Soms is daar meer aanmoediging nodig as vermaning en soms is dit net anders om. Die een kan egter nie sonder die ander gebruik word nie.

Ons vermaan mekaar en stel onsself oop vir vermaning, omdat ons mekaar nie net kan oorlaat aan ons eie lot nie. Dán sal ons verlore gaan.

Vermaning hou egter in dat ons dit in ‘n gees van sagmoedigheid sal doen. So sê Galasiërs 6:1: “Broers, as iemand in die een of ander sonde val, moet julle wat julle deur die Gees laat lei, so iemand in ’n gees van sagmoedigheid reghelp. En pas op: jy kan self ook in ver-soeking kom.”

Verder sê Hebreërs 12:11 vir ons: “Wanneer ons getug word, lyk die tug op daardie oomblik nie na iets om oor bly te wees nie, maar om oor te huil. Later lewer dit egter vir dié wat daardeur gevorm is, ’n goeie vrug, naamlik vrede omdat hulle gehoorsaam is aan die wil van God.”

Mag jy met ‘n sagte hart ander gelowiges vermaan en mag jy deur die werk van die Heilige Gees jouself oopstel om self in liefde vermaan te word.

Ds Paul

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑