Kategorie: Preke (Page 7 of 161)

Heilsorde(3): Die wedergeboorte

Julie 29, 2024 / admin

(Last updated on Augustus 5th, 2024)

Skriflesing: Johannes 3:1-10; Rom 3:10-12; Joh 7:45-52; Joh 19:38-42 (Nikodemus) (1983)
Teksvers: Johannes 3:3

Miskien moet u weer dink oor die teks en dan eerlik vra of dit ‘n opdrag (imperatief), maw dat dit iets is wat jy moet doen…

…is dit net ‘n absolute waarheid waardeur jy moet kennis neem dat jy eintlik BAIE diep verlore is/was as daar geen die bo-natuurlike ingrype van God in jou lewe sou wees nie!!

Jesus onderstreep in hierdie antwoord aan Nikodemus ons ONMAG as sondaars en daarteenoor Sy ALMAGTIGE vermoë om sondaars uit hul ellende te red.

(Kyk elders in ons nuusbrief vir meer inligting oor die Heilsorde)

Trane sal nie help nie

Julie 29, 2024 / admin

Skriflesing: Gen 25:19-34; 27:27-41 Heb 11:20; 12:14-17 (2020)
Teksvers: Hebreërs 12:14-17

DL 1 par 15 beskryf dit so: Verder toon die heilige Skrif hierdie ewige en onverdiende genade van ons uitverkiesing baie duidelik aan en verkondig dit nadruklik aan ons. Dit getuig bowendien dat nie alle mense uitverkies is nie, maar dat sommige nie uitverkies is nie of in die ewige uitverkiesing van God verbygegaan is. God het besluit om hulle, na sy volkome vrye, regverdige, onberispelike en onveranderlike welbehae, in die gemeenskaplike ellende te laat bly. Daarin het hulle hulleself deur hulle eie skuld gestort. God het immers besluit om nie aan hulle die saligmakend~ geloof én die genade van die bekering te gee nie. Om sy geregtigheid te openbaar, het God besluit om hierdie mense aan hulleself oor te laat, hulle onder sy regverdige oordeel te laat bly en om hulle nie alleen oor hulle ongeloof nie, maar ook oor al hulle ander sondes te veroordeel en ewig te straf. Dit is die besluit van die verwerping, wat God hoegenaamd nie tot bewerker van die sonde maak nie, want dit sou ‘n godslasterlike gedagte wees. Inteendeel, dit sê juis dat God ‘n gedugte, onberispelike en regverdige Regter is wat die sonde straf.

Volg My!

Julie 22, 2024 / admin

(Last updated on Augustus 5th, 2024)

Skriflesing: Matteus 9:9-13 (2020)
Teksvers: Matteus 9:9

Roeping, roep, geroep, beroep, aanroep, uitroep, oproep, inroep. Die begrip roep of roeping is nie vir ons vreemd nie. Die meeste mense sal met oortuiging kan antwoord dat hulle ‘n lewensroeping het. Dit word dan beskryf as ‘n innerlike gevoel of drang om diensbaar te wees vir ‘n groter doel. Vir baie mense is hierdie roeping dit wat hulle sin en betekenis in die lewe gee. Maar dit is nie altyd so maklik om presies te weet wat daardie roeping in jou lewe is nie.

Mense voel soms verward en onseker oor die verhouding tussen hierdie geestelike innerlike drang na ‘n doel of betekenis (vocatio), en hulle alledaagse bestaan en beroep (professio). Gevolglik is daar verskillende verstaan en begrip oor wat roeping werklik beteken. Vereis roeping ‘n geestelike element waar jou gewone werk (beroep) opgeoffer word om iets belangriker in die koninkryk van God te verrig? Of is jou beroep deel van jou roeping? Wat van geloof? Ons staan vanaand stil by die beweegrede as God tot ons spreek: volg My!

Kom staan met leë hande voor jou Verlosser en word uit genade gered

Julie 22, 2024 / admin

Skriflesing: Lukas 23 Efesiërs 1:3,4 (1983)
Dordtse Leerreëls: 1:1-6
Teksvers: Lukas 23:42,43

Dit sal nie verkeerd wees as jy die ergste dinge dink van die agtergrond van die twee manne aan die kruise langs Jesus, daardie dag buite die stadspoorte van Jerusalem nie. Hulle was regte misdadigers. Wrede en robuuste rowers en moordenaars. En dan eindig een van hulle nogal in die Paradys (die Hemel) saam met Jesus!

Dit is ‘n pragtige illustrasie van verlossing deur genade alleen. Die Bybel noem dit uitverkiesing of voorbeskikking (predestinasie) waardeur God sy kinders in pure genade en barmhartigheid red.

Vandag gaan ons na daardie vervloekte kruis in die middel kyk en sien hoe groot die genade van God werklik is, want daar is werklik geen onderskeid tussen die twee manne langs Jesus nie, behalwe die eerlike en erkenning belydenis van sonde… En dít met leë hande voor die troon van Jesus.

Hoe staan jy elke dag voor jou Verlosser?

Uitverkies met ‘n doel?

Julie 15, 2024 / admin

Skriflesing: Efesiërs 1:1-14 Prediker 2 (1983)
Teksvers: Efesiërs 1:4

In ’n stukkende wêreld vol pyn en trauma lyk alles dikwels so doelloos en leeg. Dit is nie snaaks dat mense na die ware sin van die lewe soek nie. Die hele boek Prediker gee byvoor-beeld op ’n besondere wyse aandag aan hierdie vraag. Ps 73 vra die vraag weer vanuit die gelowige se waarneming dat dit skynbaar so goed gaan met ongelowiges. Dit verbyster hom. Tog as hy eers naby God kom vind hy ander antwoorde.

Paulus draai nie doekies om nie. Vir die Efesiërs gee hy die antwoord ondubbelsinnig: God het ons gemaak om Hom te dien. Niks anders nie.

Hierdie waarheid word van nog groter waarde as ons onthou dat Paulus, as hy hierdie dinge skryf, in die tronk sit!

Moenie dwaal nie

Julie 15, 2024 / admin

Skriflesing: Galasiërs 1:1-10; Matteus 28:18-20 (2020)
Teksvers: Matteus 28:20

Nie alle mense hou van dit wat God sê nie. Die gesag van God se Woord was deur al die eeue ‘n geskilpunt.

Vandag word selfs die bestaan van God bevraagteken, wat nog daarvan dat ons moet luister na wat God sê? Daarby kom die groot gevaar dat dit wat God sê, verdraai of verander word om te pas by wat ons wil hoor.

Ons gaan vanoggend kyk na die gebeure wat aanleiding gegee het vir die sinode van Dordt en die leerreëls wat daaruit voortgekom het.