Die webtuiste vir die Gereformeerde Kerk Centurion.
Skriflesing: Hebreërs 1:1-14
Teksvers: Hebreërs 1:1-3
Skriflesing: 2 Sam 7:1-29; 2 Sam 23:1-7; 1 Kron 17:1-27; Luk 1:30-33
Teksvers: 2 Sam 7:11b-16; 1 Kron 17:11-14
Ons dink dikwels, dat as ons nie hard werk as Christene nie, God se koninkryk maar moeilik sal voortbestaan. Ons dink dikwels dat die kerk se voortbestaan van ons dienswerk afhang.
Dawid wou vir God ‘n tempel bou, maar God woon nie in tempels wat mense maak nie. God se genade is egter so groot dat Hy ALTYD vir ons sorg en nie ons vir Hom nie. Ons dienswerk moet net in afhanklikheid, in diepe afhanklikheid en dankbaarheid geskied.
Ons gaan na drie sake kyk:
Vestig jou hoop volkome op die genade wat ons deel sal word by die wederkoms van Jesus.
Donderdag 23 Februarie 2023
Lees: 1 Petr 1:13-16
• “Wees daarom verstandelik wakker en nugter…” lees ons in die 1983 vertaling.
• “Daarom, omgord die lendene van julle verstand…” lees ons in die 1953 vertaling.
Dit beteken dat ons ons gedagtes reg moet rig. Dit beteken dat ons reg moet dink. Dink aan wat tot eer van God is, wat tot verheerliking van God is, wat goed en reg en waar is. As jy jou gedagtes plaas op die regte dinge in die lewe, dan sal dit dikwels ook jou uitkoms bepaal.
Hier is die spreekwoord so waar: “Waar die hart van vol is, loop die mond van oor.” Dit beteken waaraan jy heeldag dink en oor praat en droom, dit bepaal jou lewe. As jy heeldag aan vakansie dink, dan kan jy later nie meer jou werk doen nie, want jy loop heeldag net daaraan en dink.
Maw dit waaraan jy dink, jou uitkyk in die lewe bepaal dikwels jou uitkoms!
Nou leer Petrus aan ons waaraan ons moet dink. Wees wakker en nugter, soos wat jy ‘n gordel dra om jou klere vas te maak sodat jy jou werk kan doen, so moet ons ons gedagtes vasmaak, dink aan die genade wat ons deel is in Jesus Christus.
• Jou uitkyk bepaal dikwels jou uitkoms.
• Jou gesindheid bepaal jou doen en late.
Want as christene dink en doen ons nie soos die wêreld nie. (1 Petr 4:1-4) As jy heeldag aan geldmaak of plesier of vakansie dink, dan is jou gedagtes nie gerig op wat eintlik saakmaak nie. Want wat eintlik saakmaak in die lewe, is jou uitsien na die ewige lewe.
1 Pet 4:1,2 “Omdat Christus dan liggaamlik gely het, moet julle julle ook met die gedagte wapen dat wie liggaamlik gely het, met die sonde afgereken het: 2 vir die res van sy aardse bestaan word sy lewe nie meer beheers deur menslike begeertes nie, maar deur die wil van God.”
‘n Christen wat die eer en verheerliking van God vooropstel, kan en wil nie anders as om sy lewe in te rig en te leef tot eer van God nie. ‘n Christen wat die eer en verheerliking van God vooropstel kan en wil nie anders as om die sondige wêreldse begeertes af te lê en ‘n heilige lewe te lei nie. Want wat moet ons doen as alles op aarde vir ons hopeloos en sleg lyk. Kyk boontoe! Kyk op na ons Here Jesus Christus! Hy is ons lewe! Hy het ons verlos met sy kosbare liggaam en bloed! Hy is ons sekere en vaste en lewende hoop dat ons die Hemele sal beërwe.
Wat is jou uitkyk in die lewe? Kyk jy op na Jesus Christus? Wil jy Hom alleen dien?
Jou uitkyk bepaal dikwels jou uitkoms!
Vestig jou hoop volkome op die genade wat ons deel sal word by die wederkoms van Jesus.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com
Maandag 20 Februarie 2023
Lees: 1 Petr 1:2-12
In vers 6 lees ons dat ons as christene ons moet verheug oor die lewende hoop van ons erfenis in die hemel. Hierdie woord vir verheug beteken in die griekse taal, om te jubel, om uitermate bly te wees en te juig
Nou waaroor moet ons uitermate bly wees en oor juig? Miskien dink ons nog aards en dink ons jy moet jou net verheug oor voordele hier op aarde bv. rykdom, ‘n verhoging, goeie bevor-dering, baie geld, ‘n gemaklike lewe, ‘n nuwe motor of iets op die aarde wat van verbygaande aard is.
Maar hierdie verheug gaan oor die lewende hoop, wat ons het. Hierdie lewende hoop is die vaste sekere wete dat ons deur die krag van God, veilig bewaar word vir die saligheid wat reeds ons erfenis is in die hemel. Ja, ons Hemelse Vader het deur sy groot ontferming deur die opstanding van Jesus Christus, vir ons die ewige lewe bevestig. Hiedie lewende hoop is omdat God ons uitverkies het nog voor die grondlegging van die wêreld. God het ons uitgekies om vir ewig by Hom te leef, na ons lewe op aarde.
Het jy die ewige lewe? Die ewige lewe is nie iets wat ek en jy kan verwerf of verdien nie. Ons verkry dit nie deur dit te koop, of ‘n goeie lewe te lei nie. Ons verkry dit deur vas en seker te glo dat Jesus Christus ons gekoop het met sy kosbare bloed en liggaam aan die kruis. Jesus Christus het dit gekoop en ons sekerheid lê in Hom wat self God is en wat vir altyd en ewig daar was en is en sal wees. v8-9 “Deur in Hom te glo, al sien julle Hom nou nie, het julle reeds deel aan die saligheid wat die einddoel van julle geloof is. En dit vervul julle met ‘ n onuitspreeklike en heerlike blydskap.”
Wat is die kosbaarste en duurste besitting wat jy kan besit of het? Dit is jou geloof in Jesus Christus. Petrus stel dit dat jou geloof kosbaarder is as goud. Goud vergaan na ‘n tyd. Jou geloof kan egter nooit vergaan nie en loop uit op ‘n ewige lewe by God. Geloof is ook ‘n geskenk van God, Ef 2:8-10. Ja ook ons geloof word getoets. Daar kom dikwels beproewings in ons lewens wat geloof toets. Die duiwel doen alles in sy vermoë om ons te laat twyfel, maar solank ons biddend in diepe afhanklikheid van God bly leef, kan niks ons skei van die liefde wat daar is in Jesus Christus nie.
Moet nooit jou geloof as vanselfsprekend aanvaar nie!
• Bou jou geloof elke dag deur jou kennis te verbeter deur die Bybel te lees.
• Bou jou geloof elke dag deur te bid en al meer en meer op God te vertrou.
• Bou jou geloof deur naby aan God te bly en Hom altyd te loof en te prys.
• Bou jou geloof deur saam met jou medegelowiges te vergader in eredienste, in Bybelstudies, in samekomste.
Sodoende groei jou geloof en VERHEUG jy jou elke dag oor die hemelse erfenis wat vir al God se kinders in bewaring gehou word tot met jou dood of met die wederkoms, wanneer ons dit in besit sal neem. Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com
Skriflesing: Matteus 4:1-11; Deuteronomium 8:1-6
Teksvers: Matteus 4:4
HK Sondag 50
Het u al gewonder waarom ons Here Jesus ons sal leer om te bid vir brood voordat Hy ons leer om te bid vir sonde vergifnis? Beteken dit ons liggaamlike nood is belangriker as ons geestelike nood?
Ons staan vanaand stil by die aangrypende gebeure van die versoeking in die woestyn waar ons Here Jesus ons leer oor die belangrikheid van ons verwagting oor God wat sorg.
Skriflesing: Eksodus 19:10-20:1evv
Teksvers: Eksodus 20:1
Die duiwel se metodiek is gewoonlik een van vrees. Sy misleiding kan gesien word in die wanbegrip as dit by die wet van God kom. Hy saai die leuen dat dat die wet ʼn voorwaarde vir redding is. Of as jy sondig en die wet oortree gaan jy braai… Hy werk met vrees.
Die Here werk egter heeltemal andersom. Hy werk met die liefde (en geloof en hoop). Hy gee sy wet as die liefdesgebod – die doel en die inhoud van die gebooie gaan oor liefde! Daarom is die wet nie voorwaarde vir die saligheid nie, maar wel die reël vir ons dankbaarheid, omdat die Here ons so ontsaglik liefhet.
Hy vra eintlik net in sy Tien Gebooie: My kind, gee my jou hart, gee my jou lewe!
© 2026 Gereformeerde Kerk Centurion
Theme by Anders Noren — Up ↑