Kategorie: Preke (Page 21 of 183)

Jesus Christus bewerk radikale lewensverandering

Februarie 10, 2025 / admin

Skriflesing: 1 Petrus 3 (2020)
Teksvers: 1 Petrus 3:8-9

Word ‘n mens se lewe regtig radikaal verander op grond van jou geloof in Jesus Christus? Die vraag word gevra omdat die Here in sy Woord soveel dinge aan ons voorhou wat nie altyd in alle gelowiges se lewe realiseer nie.

Kyk maar na die riglyne wat die Here aan ons voorhou in 1 Petrus 3: Mans en vrouens word gelei tot selfondersoek of hulle werklik die man of vrou is soos wat die Here dit aan ons voorhou? Veroorsaak die riglyne van die Here nie net onnodige spanning en skuldgevoelens nie? Tog kom die Here deur sy Woord en Gees om ons op te roep om eensgesind, medelydend, liefdevol, goedhartig en nederig te wees. So asof dit somer so maklik is om die positiewe gesindhede altyd en oral teenoor ons mede-gelowiges en die ander mense te openbaar.

Dit is daarom so belangrik dat ons by hernuwing sal besin oor die rede waarom die Here hierdie riglyne aan ons voorhou en hoe hierdie radikale lewensverandering in ons kan plaasvind.

Die HERE is ‘n Muur van Vuur Rondom Sy Oogappel

Februarie 10, 2025 / admin

Skriflesing: Sagaria 2:1-13 (2020)
Teksvers: Sagaria 2:5,10

Hou jy van jou buurman? Sommige mense het sonde met die bure, soos Langenhoven skryf. Hoewel dit tong in die kies bedoel word, is daar tog gevalle waar ongewenste bure langs jou woon. As daar ‘n Mafia baas intrek, en sy dwelms en geweld vanuit die buitekamer bedryf, of dalk iemand wat vreeslik raas. Maar in ander gevalle wil jy nie te naby aan mense bly nie, soos jou baas. Ons wil nie altyd ons privaatheid so intens deel dat mense alles van ons lewe sien.

Dan besef ons die geweldigheid om die HERE, nie net as buurman te hê nie, maar dat Hy self die muur van vuur rondom sy oogappel is en die heerlikheid daarbinne!

God maak op een dag alles reg

Februarie 3, 2025 / admin

Skriflesing: Ester 8 (2020)
Teksvers: Ester 8:11-12

In Ester 3 hoor ons hoe Hamman deur middel van die pur, dit is om die lot te werp, ‘n datum, vir die uitwissing van Mordagai en die Jode, by sy gode gekry het. Dit was die twaalfde maand, die 13de dag van die maand Adar.

Die proklamasie is uitgevaardig dat alle Jode op daardie dag doodgemaak kon word en dat hulle besitting deur al die mense in die Babiloniese ryk buit gemaak kon word. Dit was die skrikwekkende dag van oordeel én dood én vernietiging vir die Jode in die hele ryk van Koning Ahasveros van Babel.

Op ‘n wonderlike wyse het die Here hierdie skrikwekkende dag deur ‘n volgende proklamasie verander na ‘n dag van vreugde en feesviering deurdat die Jode bymekaar kon kom en hulle kon verdedig teen enige iemand of volk wat hulle sou probeer aanval. So verander die Here die dag van oordeel in ‘n dag van redding en vreugde.

Elkeen moet betaal vir sy Lewe

Februarie 2, 2025 / admin

Skriflesing: Eksodus 30:11-16 (2020)
Teksvers: Eksodus 30:12-16

Moses is nog op die berg Sinai waar hy al die opdragte van die HERE ontvang hoe die volk Israel moet leef. Die tabernakel word beskryf en die priesters se werk, maar dan staan hier iets vreemd. Die Israeliete moet getel word, maar om getel te word, om deel van die getal van God se volk gereken te word, moet elke persoon bo die ouderdom van 20 jaar, hulleself loskoop van die HERE.

Elkeen moet betaal vir sy lewe. So moet die Israeliete hulle lewe loskoop van God, aan wie hulle behoort. As die volk verlos is uit Egipte deur die HERE se groot mag en krag, waarom moet hulle betaal vir hulle siele?

Losgekoop uit slawerny!

Januarie 27, 2025 / admin

Skriflesing: Gal 4 (1983)
Teksvers: Gal 4:4-7

In aansluiting by die vrylating van slawe in die Herstel/Jubeljaar (Lev 25) , asook die vrywillige slawerny (soos ons dit in die huisgodsdiens die afgelope week leer ken het) (Dt15), lees ons van onsself as losgekoopte slawe.

Die wonder hiervan word duidelik as ons selfs lees dat Jesus die vorm van ‘n slaaf aangeneem het (Fil 2).

Waaraan is jy verslaaf?

Rus tot Eer van die Here

Januarie 27, 2025 / admin

Skriflesing: Levitikus 25:1-13 (2020)
Teksvers: Levitikus 25:2-4

Ons lewe in ‘n rustelose wêreld. Veral hier in die stad beleef ons die rusteloosheid van altyd besig wees, altyd nog werk, altyd nog iets wat gedoen moet word. Maar daar is ook ‘n ander soort rusteloosheid: ‘n onrus van die gewete; ‘n rustelose siel wat net nie tot bedaring kan kom nie.

Oor hierdie rusteloosheid het die bekende kerkvader Augustinus opgemerk: U het ons vir Uself gemaak, en ons harte is rusteloos totdat ons rus vind in U. Die sabbat, sowel as die sabbatsjaar en die jubeljaar het ‘n pertinente kenmerk van rus, van herstel.

Vanoggend gaan ons saam ondersoek instel oor wat dit beteken om te rus tot eer van die Here.