Gereformeerde Kerk Centurion

Die webtuiste vir die Gereformeerde Kerk Centurion.

Etiket: Oordenking (Page 4 of 26)

Oordenking 20 April

April 20, 2023 /

God se genade tydens ons lyding.

Donderdag 20 April 2023
Lees: 1 Petr 4:1-6

Eerste Petrus 4 en 5 handel oor God se genade in lyding. Petrus waarsku die christene, dat daar vurige vervolginge vir hulle voorlê. Onthou Nero het Rome aan die brand gesteek en die Christene beskuldig dat hulle Rome aan die brand gesteek het. Nou vervolg die Romeine die christene.

Maar wat het die lyding tot gevolg in ons lewens?

Lyding leer ons om ons sonde te bely en af te lê en ‘n rein lewe voor God te lewe.
Wanneer die lewe gemaklik en sonder sorge is, kan dit maklik gebeur dat ‘n mens kommervry kan begin leef, in die sondige wêreldse verleidinge. Maar ons lees duidelik in Psalm 66:10
“U het ons beproef, o God, ons gelouter soos silwer:” ’83 vertaling
“Want U het ons getoets, o God, U het ons gelouter soos ‘n mens silwer louter.” ’53 vertaling

Jesus Christus het aan die kruis in ons plek swaargekry en gesterf. Soos wat ons vir Christus lewe en teen die sonde en die duiwel stry en oorwin, leer ons om God al meer en meer lief te hê. Want om in Jesus Christus se voetspore te wandel, beteken dat ons deur Hom en nav sy versoeningsdood en die krag van die Heilige Gees die sonde al meer en meer aflê.

Dit is juis dat as ons lyding verduur as gevolg van ons christenskap, dat ons besef dat ons volgens en deur die wil van God wil lewe. Ons wil nie volgens menslike maatstawwe lewe nie, maar volgens die maatstawwe van God.

Die wêreld vind dit vreemd dat ons nie die sondige bestaan najaag nie. Die wêreldse dinge word aan ons voorgehou asof dit so mooi en maklik en lekker is. Ons kan maklik dink dat die norm is, om soos die wêreld te wees, waar ons net vir onsself leef, maar God vra dat ons moet leef tot sy eer en verheerliking.

Ons moet nie lyding en swaarkry sien as iets swaar en ongewoon nie. Ons as christene moet leef volgens die wil en die woord van God. As ons dan swaarkry omdat ons God se wil doen, maak dit ons nie bitter nie, maar maak dit ons dankbaar dat ons ter wille van God gely het.

Jesus Christus het ook aan die kruis gely as gevolg van ons sondes. Maar Jesus Christus het gewillig gely, sodat ons gered kon word. Liggaamlik kan ons lei en selfs sterf, maar geestelik is ons gered en sal ons ewig lewe.

Bid daarom in ons swaakry sodat die Heilige Gees ons sal krag gee, om sterk te staan in ons swaarkry.
Bid sodat ons nie sal swig onder swaarkry nie, maar dat ons tot eer van God sal bly lewe.

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Oordenking 17 April

April 17, 2023 /

Jesus se oorwinning.

Maandag 17 April 2023
Lees: 1 Petr 3:19-20 “En so het Hy na die geeste in die gevangenis gegaan en daar sy oorwinning aangekondig. 20 Dit is hulle wat aan God ongehoorsaam gebly het toe Hy groot geduld met hulle aan die dag gelê het in die tyd toe Noag die ark gebou het. Net ‘n klein klompie in die ark, ag in getal, is deur die water gered.”

Ek gebruik ruimskoots die verklaring en woorde van Dr. EP Groenewald in sy verklaring van 1ste Petrus in die Die Briewe van Petrus van 1985.
Bron Groenewald EP 1985 Die briewe van Petrus p.66-69

“Hierdie twee verse in 1ste Petrus 3:19 en 20 is uiters moeilik om te verklaar, omdat byna elke woord in die griekse grondteks sy probleme oplewer…” sê Dr. Groenwald.
Dit gaan oor die lewe en werk van Jesus Christus. (Groenewald. 1986:66-69)

Baie mense wil in die verklaring hiervoor ook 1ste Petrus 4:6 gebruik om dit te verklaar.
1 Pet 4:6 “Daarom is die evangelie immers ook verkondig aan dié wat nou dood is sodat, hoewel hulle as mense onder die oordeel was om na die liggaam te sterwe, hulle na die gees sou lewe soos God lewe.”

Maar die twee tekste handel nie oor dieselfde saak nie en elkeen moet dus afsonderlik in sy eie teksverband ondersoek en verklaar word. Dr. Groenewald verklaar hierdie twee verse aan die hand van vyf vrae wat hy vra. (Groenewald. 1986:66-69)
1 Wie is die prediker van vers 19?
2 Wanneer het Hy daar gepreek?
3 Wie is die geeste vir wie Hy gepreek het?
4 Wat is die gevangenis?
5 Wat was die inhoud van sy prediking?

Groenewald gee kort antwoorde op elke vraag:

1 Wie is die prediker van vers 19? Die antwoord op hierdie vraag is voor die hand
liggend. Dit is Jesus Christus. Maar in watter gestalte of hoedanigheid het Hy gegaan om te preek? In die ’53 Afrikaanse vertaling staan daar in vers 19, korrek vertaal, “in wie Hy ook heengegaan en gepreek het vir die geeste in die gevangenis,” Die 1983 vertaling verklaar dit direk met “En so het Hy, (Jesus Christus) na die geeste in die gevangenis gegaan…”

2 Wanneer het Hy daar gepreek? Het Jesus daar gaan preek voor sy opstanding of
terwyl Hy in die graf was? Die vraag is dus wanneer en gaan nie nou oor die plek nie.
Die gevolgtrekking waartoe Groenewald kom is … “dat die triomftog van Jesus wat
met sy opstanding uit die dood begin, as sodanig ‘n verkondiging was aan die geeste in die gevangenis.” (Groenewald. 1986:68)

3 Wie is die geeste vir wie Hy gepreek het? Daar is verskeie verklarings hiervoor.
Is dit bose geeste, is dit geeste in die doderyk, is dit gevalle engele? Mat 12:45; Luk 10:20
“Daar is egter ‘n duidelike verwysing na die dae van Noag, Mat 24:37-39. Die
gevolgtrekking van Groenewald is dat die “geeste” die tydgenote van Noag aandui:
mense wat die geleentheid tot bekering gehad het, maar wat in die verharding van hulle
harte gesterf het.” (Groenewald. 1986:68)

4 Wat is die gevangenis? Daar is ‘n opvatting dat die bose geeste in die lug woon
volgens Ef 6:12 “Want ons worstelstryd is nie teen vlees en bloed nie, maar teen die
owerhede, teen die magte, teen die wêreldheersers van die duisternis van hierdie eeu, teen
die bose geeste in die lug.” Dus ‘n blyplek tussen die hemel en die aarde, êrens in die
lug. Die Jode het egter gepraat van die doderyk as “sjeool” en die grieke as “hades”. Hiervolgens is die voorstelling dat die doderyk êrens diep onder die aarde is. Volgens Simon J. Kistemaker, (1987:143) intepreteer hy die gedeelte as volg: “Gevolglik interpreteer ek die frase die geeste in die tronk om te verwys na bonatuurlike wesens en nie na die siele van mense nie.”

5 Wat was die inhoud van sy prediking?
Van die latere verklarings, waarmee ek saamstem, is dat die opgestane Christus, met sy hemelvaart, aan almal wat nog op aarde leef en diegene in die hemel, sy oorwinning oor die dood verkondig het met woord en daad. Die opgestane, verhoogde Christus, het sy Oorwinningstog aangekondig, verkondig en geproklameer met sy koms na die aarde, sy kruisdood en opstanding en hemelvaart.

Samevatting

Om daarom mee af te sluit, bely ons, glo ons, en loof ons God volgens Rom 8:31-39, die Oorwinningslied van Paulus.
Rom 8:37-39
37 “Maar in al hierdie dinge is ons meer as oorwinnaars deur Hom wat vir ons liefhet.
38 Hiervan is ek oortuig: geen dood of lewe of engele of magte of teenswoordige of toekomstige
dinge of kragte
39 of hoogte of diepte of enigiets anders in die skepping kan ons van die liefde van God skei
nie, die liefde wat daar is in Christus Jesus ons Here.”

• Jesus Christus leef.
• Jesus Christus berei vir ons plek voor in die hemel.
• Jesus Christus is my Koning, my Here, My Verlosser.
• Jesus Christus is die Oorwinnaar en ek saam met Hom en deur Hom.

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Oordenking 6 April

April 6, 2023 /

Die Lydensweek!

Donderdag 6 April 2023
Bron: Van der Walt TJ 2006 Die Messias het gekom! ’n Gids in die Evangelies vir toegewyde Bybel-studente. Bl. 231-281
Ons herdenk die lydensweek van ons Here Jesus Christus.
Dit is sekerlik die belangrikste week wat ons herdenk want in hierdie week het Jesus sy dienswerk op aarde voltooi, alles wat geprofeteer is vir ons verlossing vervul.
• Ons weet van Jesus se kinderjare, weinig tot niks.
• Ons weet van sy geboorte-aankondiging.
• Ons weet dat Hy op twaalf (Luk 2:42,46 ) in die tempel by die geleerdes gesit en hulle uitgevra en antwoorde gegee waaroor hulle verbaas was.
Daarna weet ons van sy kinderjare feitlik niks nie, totdat Hy ongeveer dertig jaar oud was
(Luk 3:23) en met sy dienswerk begin het.
• Sy dienswerk vanaf dertig jaar oud tot drie en dertig weet ons gedeeltelik van.
• Van sy laaste week op aarde weet ons wat Hy elke dag gedoen het en feitlik van uur tot uur.

Jesus was nie passief in sy lyde nie, maar aktief besig om Sy oorwinnaarswerk te voltooi.
Dit het aktief met lyde en uiteindelik die vervloekte kruisdood gepaard gegaan.
Hy het sy doel op aarde kom voltooi en dit was om in ons plek te betaal vir ons sondes aan die vervloekte kruishout.

Wyle Prof Tjaart van der Walt verklaar die week wat strek vanaf Sondag tot Sondag as volg.

Die eerste Sondag is die dag v/d triomfantlike intog in Jerusalem (Sag 9:9 Mat 21:5)
Mat 21:5 “Sê vir Sion: Kyk, jou Koning kom na jou toe; Hy is nederig en Hy ry op ‘n donkie, op die vul van ‘n pakdier.”
Maandag is die dag v/d tempelreiniging en die vervloeking v/d vyeboom (Luk 19:46)
Mat 21:12 “Jesus het tempel toe gegaan en al die mense wat op die tempelplein koop en verkoop, daar uitgejaag. Die tafels van die geldwisselaars en die stoele van die duiweverkopers het Hy omgegooi 13 en vir hulle gesê: “Daar staan geskrywe: ‘My huis sal ‘n huis van gebed wees,’ maar julle maak dit ‘n rowersnes.”
Dinsdag is die dag v/d stryd met die godsdienstige leiers van Israel. (Luk 22:66ev)
Luk 22:66 “Toe dit dag word, het die Raad van die volk – die priesterhoofde en die skrifgeleerdes – vergader en Jesus voor hulle laat bring. 67 Hulle sê toe: “As jy die Christus is, sê dit vir ons.” Maar Hy antwoord hulle: “Al sou Ek dit vir julle sê, sal julle tog nie glo nie; 68 en al sou Ek vir julle ‘n vraag stel, sal julle ook nie antwoord nie.”
Woensdag rus Jesus in Betanië. Hy word gesalf maar ook verraai. Mat 26:6-13
Mat 26:6 “Terwyl Jesus in Betanië in die huis van Simon die melaatse aan tafel was, het ‘n vrou by Jesus gekom met ‘n albaste fles baie kosbare reukolie en dit op sy kop uitgegiet. 16 Van toe af was hy (Judas Iskariot) op die uitkyk na ‘n geskikte geleentheid om Jesus te verraai.”
Donderdag is die dag (of liewers die aand) v/d Pasga en die Nagmaal, Mat 26
daarna die nag van Getsemane en sy inhegtenisneming
Mat 26:26 “En terwyl hulle eet, het Jesus brood geneem en die seën gevra. Daarna het Hy dit gebreek en vir sy dissipels gegee met die woorde: “Neem, eet; dit is my liggaam.”
27 Toe neem Hy ‘n beker, en nadat Hy die dankgebed uitgespreek het, gee Hy dit vir hulle en sê: “Drink almal daaruit, 28 want dit is my bloed, die bloed waardeur die verbond beseël word en wat vir baie vergiet word tot vergewing van sondes.”
Vrydag is die dag v/d verhore en die kruisiging Luk 22:14ev, 39ev
Luk 22:66 Toe dit dag word, het die Raad van die volk – die priesterhoofde en die skrifgeleerdes – vergader en Jesus voor hulle laat bring. 33 Toe hulle by die plek kom wat Kopbeen genoem word, het hulle Hom daar saam met die misdadigers gekruisig, die een aan sy regter- en die ander een aan sy linkerkant.
Saterdag rus die liggaam van Jesus in die graf; sy gees is by sy Vader. Luk 23:55
Luk 23:55 “Die vroue wat saam met Jesus van Galilea af gekom het, het saamgeloop en die graf gesien en gekyk hoe sy liggaam neergelê word. 56 Daarna het hulle huis toe gegaan en reukolie en salf reggemaak. Op die sabbatdag het hulle gerus, soos die gebod bepaal.”
Sondag die graf is leeg: Hy het opgestaan!
Luk 24:34 en dié sê: “Die Here het regtig opgestaan en Hy het aan Simon verskyn!”

So hierdie was ‘n lydensweek waarin Jesus Christus vrywillig Homself as offer oorgegee het. Die wêreldse regter het Hom valslik en verkeedelik skuldig bevind, alhoewel hulle gesë het dat Hy onskuldig is. Maar dit was juis die betaling vir ons sondes aan die kruis.

Hierin lê daar vir ons verlossing in opgesluit.
• Jesus alleen kon die toorn van God dra.
• Jesus, die onskuldige het in ons plek die skuld gedra.
• Jesus het dit alles ondergaan sodat ons die ewige lewe kan hê.

Dit erken en bely ons met dankbaarheid, maar ook met ’n diepe bewoënheid.

Dankie ons Hemelse Vader vir Jesus Christus.
Dankie dat Hy in ons plek gesterf het.
Dankie dat Hy die onskuldige, ons skuld op Hom geneem het.
Dankie dat ons deurdat Jesus Christus betaal het, die ewige lewe beërf het.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Oordenking vir 30 Maart

Maart 30, 2023 /

Hoe ‘n christen in die wêreld moet lewe!

Donderdag 30 Maart 2023
Lees: 1 Petr 3:8-12

Onthou dat Petrus hierdie brief geskryf het aan die gelowiges wat verspreid gewoon het in die Noordelike streke van die destydse Klein-Asië, dit is die hedendaagse Turkye. Petrus het hierdie brief geskryf om die gelowiges wat ter wille van hulle geloof vervolg en onderdruk is, te bemoedig.

Hoe moet ‘n christen optree as hy verdruk en onderdruk word. Die swaarkry waarvan hier gepraat word, dui op die dag tot dag lyding wat hulle moes verduur en nie noodwendig op die vuurproef waarvan ons in 1 Petr 4:12 en verder lees nie.

Hoe moet ons as christen optree as ons verdruk word?

Daar moet wedersydse liefde in die kerk wees. Liefde is ‘n deurlopende tema in die brief van Petrus. Dit gaan nie net oor God se liefde vir ons nie, maar dit gaan ook in besonder oor ons liefde vir mekaar.
• Petrus self moes hierdie soort liefde op dieselfde manier leer.
• Hoe geduldig moes Jesus nie wees met Petrus se voortvarendheid nie?
• Petrus wat vir Jesus wou veg en Malgus se oor afgekap het. (Joh 18:10)
• Petrus wat op die water wou loop en toe het hy kleingelowige geword. (Mat 14:31)
• Petrus wat Jesus self drie maal verloën het. (Luk 22:61)

Soos wat die hele wet deur Jesus opgesom is as ‘n liefdesgebod lees ons in Mat 22:34-40, so leer ons in Rom 13:8-10 dat liefde die volle uitvoering van die wet is.
Rom 13:8 “Julle moet niemand iets verskuldig wees nie, behalwe om mekaar lief te hê. Wie sy medemens liefhet, voer die hele wet van God uit.”

As christen kan ons op drie maniere leef:
• Ons kan kwaad vir goed vergeld.
• Ons kan kwaad vir kwaad en goed vir goed vergeld.
• Ons kan goed vir kwaad vergeld, wat die heilige wil van God is. Jesus Christus het self hierdie voorbeeld gestel lees ons in 1 Petr 2:21-23 “21 Juis hiervoor is julle ook geroep, omdat Christus self vir julle gely en so vir julle ‘n voorbeeld gestel het, sodat julle in sy voetspore kan volg. 22 “Hy het geen sonde gedoen nie en uit sy mond het daar nooit ‘n leuen gekom nie. 23 Toe Hy beledig is, het Hy nie terug beledig nie, toe Hy gely het, het Hy nie gedreig nie, maar alles oorgelaat aan Hom wat regverdig oordeel.”

Samevattend leer Petrus hier aan ons, dat ons mekaar moet liefhê, ons vyande moet liefhê en die lewe moet liefhê. (1 Pet 3:10-12)
Om dit te kan doen moet ons…
• Doelbewus besluit om die lewe lief te hê en te geniet tot eer van God. (1 Petr 3:10)
• Ons tong in toom hou. (Ps 141:3; Jak 3:1-12)
• Ons moet goeddoen en die kwaad haat. (Mat 5:9)

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Oordenking 27 Maart

Maart 27, 2023 /

Hoe ‘n huwelik suksesvol kan wees!

Maandag 26 Maart 2023
Lees: 1 Petr 3:1-7

Statistieke is dat een uit elke twee huwelike in die egskeidingshof beland. Dit ondanks die feit dat ons vandag duisende der duisende boeke het oor die huwelik. Daar is huweliksver- rykings-kursusse, pastorale beraders, sielkundiges ens. Tog word die egskeidingsyfer net al hoe meer, terwyl al meer mense saambly en bloot net nie meer trou nie. Hierdie probleem is ook van toepassing op christelike huwelike.

Al trou twee christene, is dit steeds nie ‘n waarborg dat die huwelik sal slaag nie.
‘n Huwelik vra opregte, eerlike, harde werk. Dit vra om biddend elke dag voor God te buig en te vra vir liefde en leiding. Hierdie leiding en liefde vind ons in die Woord.

Petrus onderrig christene oor die huwelik in 1 Petr 3:1-7. Paulus onderrig ook oor die huwe-lik in Ef 5:21-6:4 asook Kol. 3;18-21. As jou huweliks-maat nie ‘n christen is nie of selfs in ‘n ander christelike denominasie as jy is, kan dit dalk nog harder werk vra om die huwelik te laat slaag.

Petrus skryf aan die vrouens in 1 Petr 3:1-6. Hy begin met die woorde in die 2020 vertaling, 1 Petr 3:1,2 “Net so, vroue, moet julle aan julle eie mans ondergeskik/onderdanig wees, sodat, self indien sommige aan die woord ongehoorsaam is, ook hulle sonder ‘n woord gewen kan word deur die manier waarop julle leef, 2 omdat hulle julle rein, eerbiedige leefwyse raaksien.” Die “Net so…” wys terug na Jesus Christus se voorbeeld in 1 Petr 2:21-25 toe. Jesus Christus was onderdanig en gehoorsaam aan God se wil. So moet ‘n christen-vrou en haar christen-man aan mekaar onderdanig wees en Jesus Christus se voorbeeld navolg. Vir die mans klink dit dalk vreemd om te sê dat jy onderdanig moet wees aan die vrou, maar ons lees in Ef 5:21 “Wees uit eerbied vir Christus, aan mekaar onderdanig.”

Die groot probleem in ons hedendaagse tyd, is dat mans en vrouens, hulle huwelike wil inkleur soos wat die wêreld die huwelik voorhou. Net romanties, net ‘n fees, net daar ter wille van eie plesier. Romantiese vakansies, selfs sonder kinders en kleinkinders, net om twv jouself te leef. Die wêreldse standaarde word dan in Hollywood gemaak en almal volg dit slaafs na, die sepies, die flieks, dit wat die wêreld voorhou.

In die huwelik moet ons Jesus Christus as die Bruidegom (Open 19:1-7) navolg. As ons Jesus Christus navolg in die huwelik wat onderdanigheid, nederigheid, gehoorsaamheid aan God se wil inhou, dan sal die huwelik wonderlik en geslaag wees.

Ons kan nie Jesus Christus navolg tensy ons Hom nie ken as ons Verlosser en onsself aan Hom onderwerp in geloof en gehoorsaamheid nie. Ons moet elke dag, tyd met Jesus spandeer deur Bybel te lees en te bid.

So moet ‘n christen man en vrou elke dag tyd saam met mekaar spandeer om God te dien en te vereer, en mekaar te dien en te bedien met liefde en begrip.
 Dan sal die huwelik suksesvol wees.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Oordenking vir 20 Maart

Maart 20, 2023 /

Jesus Christus is ons Herder en Bewaker wat ons lei om God se wil te doen!

Maandag 20 Maart 2023
Lees: 1 Petr 2:25: Joh 10; Luk 15:1-7; Heb 13:20-21
25 “Julle het immers soos skape rondgedwaal, maar nou het julle teruggekom na julle Herder en die
Bewaker van julle lewe.”

Heb 13:20 “God wat vrede gee, het ons Here Jesus wat deur die bloed van die ewige verbond die groot Herder van sy kudde is, uit die dood teruggebring.
Heb 13:21 Mag dié God julle toerus met alles wat goed is, sodat julle sy wil kan doen.
Mag Hy deur Jesus Christus in ons tot stand bring wat vir Hom aanneemlik is.
Aan Hom behoort die heerlikheid tot in alle ewigheid! Amen.

In die Ou Testament is skape geslag vir die herder en in die Nuwe Testament is die Herder op Golgota geslag vir die skape.

Die beeld van die herder met sy skape word tale kere in die Bybel gebruik.
• Josef se broers het skape opgepas.
• Moses was ‘n skaapherder van sy skoonpa Jetro. Ex 3:1
• Dawid was ‘n skaapherder. Psalm 23
• Amos was ‘n skaapboer uit Tekoa. Amos 1:1

Daarom word hierdie beeld van skape en herders dikwels in die Bybel gebruik om aan ons te leer…
• Hoekom Jesus Christus ons Herder is.
• Hoekom ons sy skape is.
• Wat die doel van ons skaapwees is.

Hoekom Jesus Christus ons Herder is, is omdat skape sonder ‘n herder, ronddwaal en verdwaal.
Sonder ‘n herder is skape rigtingloos en doelloos en loop agter weiding en water aan, sonder om daarna te weet waar hulle kraal is. In Luk 15:1-6 vertel Jesus juis die gelykenis van die verlore skaap. Elke skaap is vir die herder belangrik. Hy tel hulle gereeld. En dan as een weg is, los hy die ander nege en negentig en gaan soek die verlore skaap. Die vergelyking is juis dat as een van Jesus Christus se skape weg is, gaan Hy hom soek en bring hom terug en dan is daar blydskap in die hemel, omdat die verlore skaap gekry is. Elkeen van ons is van lewensbelang vir God. Ja, God het elkeen van ons, sy kinders so lief dat Hy Jesus Christus, sy eie Seun gestuur het om ons wat verlore is te kom loskoop. Heb 13:20 “God wat vrede gee, het ons Here Jesus wat deur die bloed van die ewige verbond die groot Herder van sy kudde is, uit die dood teruggebring.”

Hoekom ons God se skape is, is omdat God ons gekoop het met die bloed van sy eie Seun. God het ons immers uitgekies nog lank voor ons geboorte. God het sy kudde uitgekies. Soos skape het ons rondgedwaal en weens ons sonde en ellende sou ons verdwaal het, weg van God af. Maar toe het God sy eie Seun, Jesus Christus gestuur as die groot Herder, wat ons nie net gekoop het met sy eie bloed en liggaam nie, maar wat ons ook lei en dra en versorg. Jes_40:11 “Soos ‘n herder versorg Hy sy kudde: die lammers maak Hy bymekaar in sy arms en Hy dra hulle teen sy bors, Hy sorg vir die lammerooie.”
Wat die doel van skaapwees is! Geliefdes ons is nie skape om op ons eie te leef net tot ons eie geluk en voordeel nie. Nee ons is skape wat moet lewe tot eer van God, volgens sy wil. Ons lees in 1 Petr 2:24b dat ons moet lewe in gehoorsaamheid aan die wil van God. Die Heilige Gees is ook uitgestort om in ons te woon, ons te lei hier op aarde, sodat ons, nadat ons wedergebore is, deur die Gees gelei kan lewe tot eer van God. Jesus Christus is egter ook die Opper-Herder wat oor ons waak en elke dag by ons is en in ons woon. Hy is die Bewaker van ons lewens, Deur in Sy voetspore te volg en Hom te dien en eer, is daar vir ons die heerlike blydskap en vreugde dat Hy ons sal lei na groen weivelde , na waters waar daar rus is, na die ewige lewe by ons Hemelse Vader.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑