Kategorie: 1 Petrus (Page 2 of 7)

Bemoediging in lyding as christen.

Donderdag 4 Mei 2023
Lees: 1 Petr 4:12-19 “Daarom moet dié wat ly omdat God dit wil, hulle lewe toevertrou aan die
getroue Skepper, en aanhou goed doen.”

Petrus skryf hierdie brief, nie aan ongelowiges nie, maar aan gelowiges. Veral hulle wat verspreid wonend is, maw ver van Jerusalem af, in die vreemde. Hy skryf dit ook aan my en jou wat glo in Jesus Christus en Hom bely as ons Enigste Verlosser en Saligmaker.

Petrus skryf ook hierdie eerste brief spesifiek aan die christene wat lyding en swaarkry verduur. Lyding is ‘n harde werklikheid vir christene. Die christene in Petrus se tyd het baie vervolging in die oë gestaar maar ook vandag, in hierdie wêreld, want om waarlik christen te wees, vra dat jy nie met die wêreld se losbandigheid en die wêreldse standaarde sal meeleef nie, maar met Christelike waardes soos wat die Bybel dit aan ons openbaar. Dit het dan ware lyding tot gevolg.
God wil hê dat ons in die wêreld ook vandag moet leef en ons lig moet laat skyn.

Die wêreldse-, goddelose mense, die heidene vind dit vreemd dat ons nie langer met hulle wil saamleef, soos wat die wêreldse standaarde is nie. 1 Petr 4:4.

Daarom bemoedig Petrus ons in ons lyding en leer hy ons wat ons moet doen as ons lyding ondergaan twv Jesus Christus. Want ons verheerlik, (δοξάζω – doxazō in die griekse taal,) God, deur te leef tot Sy eer en soos wat Hy van ons verwag in die Woord.

Onthou dat selfs ons swaakry is nie buite God se toelatende wil nie. God is Alwetend. God weet dat ons dit in die huidige wêreld sal swaar hê. Om ‘n christen te wees is nie sommer outomaties nie, dit vra toewyding in geloof en vertroue op God.

Petrus noem God hier in vers 19, die getroue Skepper. Dit is die enigste plek in die Nuwe Testament waar God Skepper, (κτιστής – ktistēs – in die griekse taal) genoem word.

Ons moet ons lewens aan ons getroue, (πιστός – pistos in die griekse taal) Skepper, toewy. Getroue God, dui op God wat ons nie net gemaak het nie, maar wat elke dag, elke oomblik van die dag en nag vir ons sorg, ons dra in sy groot liefde en omgee.

Die lyding gaan so erg wees, maar ook God se versorgende hand is so volkome, dat ons lees in Luk 21:17-19
¹⁷ “En julle sal ter wille van my Naam deur almal gehaat word, maar
¹⁸ daar sal selfs nie eens ‘n haar van julle kop af val nie.
¹⁹ Deur julle volharding moet julle julleself red.”

Want ons kan ook verseker weet dat daar nie ‘n haar van ons hoof sal val, sonder dat God dit weet nie. Daarom dat Petrus skryf dat ons moet aanhou goed doen. Ons dade moet van liefde getuig en ons moet barmhartigheid aan ons medemens betoon, tot eer en verheerliking van God.
Deur goed te doen aan almal, al word ons vervolg of beledig, ly ons tot eer en verheerliking van God. Wat ‘n voorreg en genade om ‘n kind van God te wees en vir Hom te ly.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Dien mekaar met julle gawes.

Maandag 23 April 2023
Lees: 1 Petr 4:7-11 7 “Die einde van alles is naby. Daarom moet julle selfbeheers en nugter wees, sodat julle kan bid. 8 Bo alles moet julle mekaar hartlik liefhê, want die liefde bedek baie sondes. 9 Wees gasvry teenoor mekaar sonder om te kla. 10 As goeie bedienaars van die veelvoudige genade van God moet elkeen, namate hy ‘n genadegawe ontvang het, die ander dien.
11 As iemand die gawe ontvang het om te preek, moet God deur hom aan die woord kom; as dit is om in die gemeente te dien, moet hy dien met die krag wat God verleen. So moet julle God in alles verheerlik deur Jesus Christus, aan wie die heerlikheid en die krag behoort tot in alle ewigheid! Amen.”

Ons lees in vers 7: “Die einde van alles is naby…” Die christene van die vroeë kerk het verwag dat die Jesus in hulle leeftyd, weer sal terugkom aarde toe. Maar die presiese tyd weet niemand nie net die Vader in die hemel. Ons lees in Mat 24:36 “Maar niemand weet wanneer daardie dag en uur kom nie, nie die engele in die hemel nie en ook nie die Seun nie. Net die Vader weet dit.” Maar alhoewel ons nie die presiese dag en datum en tyd van Jesus se wederkoms weet nie, beteken dit nie dat ons nie voorbereid moet wees nie. Ons weet verseker dat Jesus Christus weer sal terugkom aarde toe met die wederkoms, wanneer die einde van die aarde aanbreek. Daarom moet ons in Verwagting leef.

Maar hierdie tyd waarin ons in verwagting leef, beteken nie dat ons maar kan terugsit en niks doen nie. Inteendeel ons lees van Paulus se harde werk onder die gemeente van Tessalonika in 2 Tes 3:6-18. Dit is om hierdie rede dat ons in verwagting moet leef, maar met ‘n voorbereidheid en dit terwyl ons mekaar dien.

Petrus gee hier tien opdragte van hoe ons moet leef terwyl ons wag op die wederkoms.
1 Wees nugter en selfbeheers. V7a Die Heilige Gees woon in jou en leef onder Sy leiding.
2 Bid gedurig. V7b
3 Wees hartlik lief. V8
4 Wees gasvry. V9
5 Gebruik jou geestelike-gawes om ander te dien. V10,11
6 Moenie verbaas wees oor swaarkry nie. v12
7 Verbly julle oor lyding namate die wederkoms nader kom. V13
8 Moet nie skaam wees oor lyding nie. V15,16
9 Verheerlik God. V16-18
10 Vertrou jou lewe toe aan God. V19

Hoe ons as christene moet optree namate die eindtyd naderkom is om in liefde mekaar te bedien. Ons moet so leef dat ander mense en gelowiges kan sien dat ons liefhet en omgee vir mekaar en vir alle mense. Ons opdrag is om opreg en eerlik en in liefde vir God en vir mekaar te leef.

Ware liefde is om mekaar se goeie punte raak te sien en daarop te fokus en dit te help uitbou. Moet nie iemand anders se swak punte raaksien en dit uitbuit, sodat dit hulle tot oneer strek nie. Werklike liefde is om mekaar te bedien met die liefde van God tot eer van God en tot voordeel van jou naaste. Dit is regtig harde werk, want as mense is ons dikwels geneig om die slegte in mekaar raak te sien en net oor die slegte te praat, te skinder en nie die goeie oor te praat nie.

Dien dus jou medemense met liefde en begrip en gasvryheid. Bid vir mekaar en wees lief vir mekaar. Namate die wederkoms nader kom gaan dit ook al hoe moeiliker raak op aarde, maar verbly jou in die Here, in jou verlossing in en deur Jesus Christus, want ons weet waarnatoe ons op pad is, na die ewige lewe by ons Hemelse Vader.

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Jesus se oorwinning.

Maandag 17 April 2023
Lees: 1 Petr 3:19-20 “En so het Hy na die geeste in die gevangenis gegaan en daar sy oorwinning aangekondig. 20 Dit is hulle wat aan God ongehoorsaam gebly het toe Hy groot geduld met hulle aan die dag gelê het in die tyd toe Noag die ark gebou het. Net ‘n klein klompie in die ark, ag in getal, is deur die water gered.”

Ek gebruik ruimskoots die verklaring en woorde van Dr. EP Groenewald in sy verklaring van 1ste Petrus in die Die Briewe van Petrus van 1985.
Bron Groenewald EP 1985 Die briewe van Petrus p.66-69

“Hierdie twee verse in 1ste Petrus 3:19 en 20 is uiters moeilik om te verklaar, omdat byna elke woord in die griekse grondteks sy probleme oplewer…” sê Dr. Groenwald.
Dit gaan oor die lewe en werk van Jesus Christus. (Groenewald. 1986:66-69)

Baie mense wil in die verklaring hiervoor ook 1ste Petrus 4:6 gebruik om dit te verklaar.
1 Pet 4:6 “Daarom is die evangelie immers ook verkondig aan dié wat nou dood is sodat, hoewel hulle as mense onder die oordeel was om na die liggaam te sterwe, hulle na die gees sou lewe soos God lewe.”

Maar die twee tekste handel nie oor dieselfde saak nie en elkeen moet dus afsonderlik in sy eie teksverband ondersoek en verklaar word. Dr. Groenewald verklaar hierdie twee verse aan die hand van vyf vrae wat hy vra. (Groenewald. 1986:66-69)
1 Wie is die prediker van vers 19?
2 Wanneer het Hy daar gepreek?
3 Wie is die geeste vir wie Hy gepreek het?
4 Wat is die gevangenis?
5 Wat was die inhoud van sy prediking?

Groenewald gee kort antwoorde op elke vraag:

1 Wie is die prediker van vers 19? Die antwoord op hierdie vraag is voor die hand
liggend. Dit is Jesus Christus. Maar in watter gestalte of hoedanigheid het Hy gegaan om te preek? In die ’53 Afrikaanse vertaling staan daar in vers 19, korrek vertaal, “in wie Hy ook heengegaan en gepreek het vir die geeste in die gevangenis,” Die 1983 vertaling verklaar dit direk met “En so het Hy, (Jesus Christus) na die geeste in die gevangenis gegaan…”

2 Wanneer het Hy daar gepreek? Het Jesus daar gaan preek voor sy opstanding of
terwyl Hy in die graf was? Die vraag is dus wanneer en gaan nie nou oor die plek nie.
Die gevolgtrekking waartoe Groenewald kom is … “dat die triomftog van Jesus wat
met sy opstanding uit die dood begin, as sodanig ‘n verkondiging was aan die geeste in die gevangenis.” (Groenewald. 1986:68)

3 Wie is die geeste vir wie Hy gepreek het? Daar is verskeie verklarings hiervoor.
Is dit bose geeste, is dit geeste in die doderyk, is dit gevalle engele? Mat 12:45; Luk 10:20
“Daar is egter ‘n duidelike verwysing na die dae van Noag, Mat 24:37-39. Die
gevolgtrekking van Groenewald is dat die “geeste” die tydgenote van Noag aandui:
mense wat die geleentheid tot bekering gehad het, maar wat in die verharding van hulle
harte gesterf het.” (Groenewald. 1986:68)

4 Wat is die gevangenis? Daar is ‘n opvatting dat die bose geeste in die lug woon
volgens Ef 6:12 “Want ons worstelstryd is nie teen vlees en bloed nie, maar teen die
owerhede, teen die magte, teen die wêreldheersers van die duisternis van hierdie eeu, teen
die bose geeste in die lug.” Dus ‘n blyplek tussen die hemel en die aarde, êrens in die
lug. Die Jode het egter gepraat van die doderyk as “sjeool” en die grieke as “hades”. Hiervolgens is die voorstelling dat die doderyk êrens diep onder die aarde is. Volgens Simon J. Kistemaker, (1987:143) intepreteer hy die gedeelte as volg: “Gevolglik interpreteer ek die frase die geeste in die tronk om te verwys na bonatuurlike wesens en nie na die siele van mense nie.”

5 Wat was die inhoud van sy prediking?
Van die latere verklarings, waarmee ek saamstem, is dat die opgestane Christus, met sy hemelvaart, aan almal wat nog op aarde leef en diegene in die hemel, sy oorwinning oor die dood verkondig het met woord en daad. Die opgestane, verhoogde Christus, het sy Oorwinningstog aangekondig, verkondig en geproklameer met sy koms na die aarde, sy kruisdood en opstanding en hemelvaart.

Samevatting

Om daarom mee af te sluit, bely ons, glo ons, en loof ons God volgens Rom 8:31-39, die Oorwinningslied van Paulus.
Rom 8:37-39
37 “Maar in al hierdie dinge is ons meer as oorwinnaars deur Hom wat vir ons liefhet.
38 Hiervan is ek oortuig: geen dood of lewe of engele of magte of teenswoordige of toekomstige
dinge of kragte
39 of hoogte of diepte of enigiets anders in die skepping kan ons van die liefde van God skei
nie, die liefde wat daar is in Christus Jesus ons Here.”

• Jesus Christus leef.
• Jesus Christus berei vir ons plek voor in die hemel.
• Jesus Christus is my Koning, my Here, My Verlosser.
• Jesus Christus is die Oorwinnaar en ek saam met Hom en deur Hom.

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com