Kategorie: Ander (Page 2 of 10)

 “Maar die wysheid, waar word dié gevind, waar is die woonplek van die insig? Die mens ken nie die waarde daarvan nie, en dit word nie in die land van die lewendes gevind nie. Die diep waters sê: ‘Dit is nie in my nie’ die see sê: ‘By mý is dit nie!’ Goud kan dit nie koop nie, sy waarde kan nie in silwer afgeweeg word nie.” (Job 28:12-15). 

“En Hy het vir die mens gesê: Om die Here te dien, dit is wysheid, om die kwaad te vermy, dit is insig.” (Job 28:28). 

In hierdie tyd van oorweldigende nood waarin baie van ons, ons tans bevind, raak dit absoluut noodsaaklik om met die nodige wysheid en insig besluite te neem wat soms wyer as net onsself strek. Dan kom die vraag soms, maar waar kry ons dan wysheid en hoekom voel dit of daar so min daarvan is as ons so om ons kyk? 

Die woorde van Gesang 252 som dit so mooi op; 

O HEER, my God, by U is wysheid 

wat by die mense dwaasheid heet – 

dié mense wat in eie wysheid 

steeds dink dat hulle alles weet. 

Volmaak is alles uit u hande, 

u kennis het geen perke nie. 

Die mens, gebind deur sondebande, 

verbly hom in u werke nie. 

In ‘n tyd waar tegnologie so gevorderd is en ons al die inligting moontlik, op ons vinger punte tot ons beskikking het, dink maar net aan Google, Sirri en ChatGPT, is ons steeds in ons menslike swakheid, nie in staat om die wêreld se “groter probleme” op te los nie, ons dink aan die oorloë, of dreigende oorloë, plaasmoorde, armoede, water tekorte, steeds kan al die kennis wat ons het nie al hierdie krisisse oplos nie. 

Waar vind ‘n mens dan wysheid? Ware wysheid kom slegs van God, dit is ook nie iets nie, dit is iemand en ons vind dit in ons Here Jesus Christus deur die krag van die Heilige Gees, deur Sy Woord en in Gebed. 

Kom ons bid saam, ook in hierdie Jubeljaar dat God ons sal seën met wysheid, want blote kennis gaan ons nie kan red. 

Oudl Petri Pienaar 

 Ons Jubeljaar of eerder jubellewe begin by die Here. Hy seën ons met ʼn nuwe lewe van oorvloed. Ons deel reeds, en sal eendag in volmaaktheid, deel in sy ewige lewe. Ons jubel nie net elke 50 jaar nie, maar elke dag. Vir ons as verlostes is dit hierdie jaar en elke jaar ʼn jubeljaar. Ons lees van die belangrikheid van rus: 

“So het die Here my God, die Heilige van Israel, gesê: As julle julle bekeer en tot rus kom, sal julle gered word. Julle krag lê in stil wees en vertroue hê” (Jesaja 30:15). 

In ʼn jubellewe kom ons die Here se voorskrifte na en gehoorsaam sy bepalings. Die belofte is: “As julle dit doen, sal julle sonder sorge in die land kan woon” (Lev 25:18). Die aarde en alles daarop behoort aan die Here. ʼn Jubellewe is alles wat ek is en het, en is deur die Here aan my geleen. 

Ons moet dus vir Hom alles gee wat Hy van ons vra. Ons moet gereeld bid dat die Here ons lewe sal verander sodat Hy meer word en ons minder en dat ons meer aan Hom toegewyd sal wees. 

Jubeljaar (Louis Brittz se lied) 

Ons kies die kruispad met ʼn glimlag 
Losgekoop, getuig ons van die kruis 
Jesus, gee sy jubelgees, dat ons al meer soos Hy kan wees. 
Die grond waarop ons voete loop, sal bewe, 
Sal vrugdra want die kruis bring lewe 
Die jubeljaar-belofte bly, skud jou kettings af, jy’s vry 
Kyk, kyk die Koning het gekom om te sê 
Hy bring die jubeljaar. 

Daar’s hoop, hope hoop, ons kan maar droom. “Laat ons styf vashou aan die hoop wat ons bely, want Hy is getrou: Hy doen wat Hy beloof het” (Heb 10:23). 

Daar’s vreugde in die jubeljaar. 

Dis hierdie jaar en elke jaar, ʼn jubel, jubel, jubel, ʼn jubeljaar… 

Is dit ook waar van jou lewe? 

Oudl Ben Erasmus 

 Brothers and sisters, this article aims to point towards God’s amazing love and glorify Him. 

Under the caste system of the Hindu religion, Dalits are considered untouchable for their assigned dirtiest occupation. They are prohibited from engaging in any physical contact with the members of another caste in society. The Dalit word means “oppressed, demoralised.” This system has affected communities to an extent that cows are respected than a Dalit. The caste system was outlawed in 1949, but not from the hearts and minds of people. 

The knowledge of Christ is more important than social status, as Paul indicates in Philippians 3:8. It is the knowledge of being His child and experiencing His love. I cannot claim to have left family and home to follow God, because I have received a hundredfold, as stated in Matthew 19:29. You all are part of the hundredfold who have played a role in God’s ultimate plan. 

Now that I know God is faithful in providence, I am called to share His faithfulness. Therefore, God has encouraged the URCNA Church in Toronto, Canada, that seeks my assistance to work among Indian communities for six months. Thereafter, the church will decide to give a call. I am convinced to follow the path that God is leading. So, I will depart for India DV on October 16th to support a new ministry and visit family, meanwhile awaiting a Canadian work visa. 

Brothers and sisters, I will be grateful to God for your prayers and support. 

Prop Mukesh Kumar 

 Dwarsdeur die wêreld en eeue heen stoei die mensdom met die kwessie van ryk en arm. In die vorige eeue het die dwaasheid van die koningshuis en gepaardgaande adellike rykdom en verkwisting tot ‘n breekpunt gekom met die Franse rewolusie. Demokrasie is gebore en verkoop as die “silver bullet”, maar die ongelooflike kontraste in die Westerse wêreld tussen super rykes en armes skreeu ten hemele. Sosialisme en kommunisme as alternatief het gefaal en lui mense gekweek met min inisiatief om die wêreld te bewoon, bewerk en bewaar. 

As Christene moet ons antwoorde kan bied op alledaagse probleme, anders bly die Bybel en ons godsdiens teoreties en ‘n Sondag-stokperdjie. Jubeljaar met al sy reëlings, is die Bybel se antwoord op hierdie ekonomiese vraagstuk. “Heilig die vyftigste jaar en kondig ‘n kwytskelding in die land af vir al die inwoners van die land. ‘n Jubeljaar moet dit vir julle wees” (Lev. 25). Een keer in elke mens se lewe het almal die kans gekry om van vooraf te begin. Al het jy hope bymekaar gemaak, is alles tydens die Jubeljaar geneutraliseer en het die vader se groot erfdeel nie sorgelose kinders geskep nie. As jy verarm het a.g.v. jou vader se wanbestuur, het jy ‘n kans gekry om oor te begin en ‘n sukses te maak vir jou en jou gesin. Leef jy uitspattig voor die Jubeljaar, beter jy na die Jubeljaar baie vinnig te verander of jy word die een wat jou grondgebied moet verkoop. 

Verder vereis Lev 25 dat die armes gehelp moet word deur hulle land te verpand en self dagloners te word. Daar was dus geen “SASSA-uitkerings” vir werkloses nie, en selfs die weduwees en wese moes hulle kant bring deur self kos bymekaar te maak, soos dit baie mooi vir ons geskilder word in Rut 2. Almal was besig om hulle talente te gebruik om besig te wees met hul kultuur opdrag van Gen. 2. 

Ons wat leef in ‘n komplekse 21ste eeuse samelewing, is die onmiddellike terugkeer na hierdie Bybelse model is nie haalbaar nie. Ons kan egter begin met ‘n paar praktiese dinge soos om voor die Here te bely dat alles syne is en dat alles wat ons het net geleende goed is. Wees elke dag besig om voluit te werk om die wêreld te bewoon, bewerk en te bewaar. Leef om te werk in Gods koninkryk en nie werk om te leef (oorleef). As die Here ons seën met oorvloed, seën ons ander mense sonder om terug te verwag. Weerstaan die wêreldse begeerte om so gou moontlik genoeg bymekaar te maak om “gemaklik te kan aftree” en dink twee keer voor jy geld op jouself spandeer (bv. nuutste model voertuig). As elkeen sy plig doen, en ons vra die Here se seën daarop, kan ons land ‘n paradys word waarin almal in vrede met mekaar kan leef. 

Oudl Andries Zeevaart 

 (Matt 22:39; Rom 12:10; Ef 4;1; Tess 5:1; Pet 4:10)

 ‘n Jubeljaar/Hersteljaar vir die volk. Vreugde oor skulde afgeskryf en opnuut blydskap oor God se genade en voorsiening! Hy kom en herstel in Christus ons verhouding met Hom, Christus was ons skoon van ons sondeskuld. Die Jubeljaar beeld uit God se genade en ons kan ook daarin deel! 

Hy herstel ook die verhoudinge tussen mense. Hy bring versoening deur Sy Gees wat harte verander, herskep en bekering meebring. Vrymoedigheid in belydenis, vrymoedigheid in geloofsgemeenskap. Hy gebruik ons om in hierdie donker wêreld lig en sout te wees! 

Beleef jy hierdie herstelde verhoudinge? Vind jy vreugde in jou gesin, familie en onder mekaar as medegelowiges? Of is daar seer, ‘n huiwerende gemoed vir saam te kom, ‘n selfsug dat ek op my eie regkom? Kom jy na die erediens net om te ontvang en nie om diensbaar te wees nie? 

Ek skiet tekort in meeste van my verhoudinge. Maar nou kan ons hierdie introspeksie/herstel/“reset” gebruik om weer ‘n stap te neem om saam weer hande te vat, geloofs- en liefdesbande te smee en weer as geloofsfamilie mekaar te bedien. Dit begin by die huis en by ons as gemeente! 

Oudl Fred Reynecke 

 In hierdie Jubeljaar gaan dit allereers om lof en eer aan die Here. Jubel geskied veral deur sang en lied. Baie bekende en geliefde lofliedere (soos Psalms 103, 146 – 150) weerklink telkens gedurende ons eredienste, en met goeie reg. Hierdie lofliedere kom egter eers tot volle reg as die sanger nie net konsentreer op melodie en sang nie, maar veral ook op die woorde. Laasgenoemde word mettertyd verwaarloos, veral in die sing van baie bekende liedere, met as voorbeeld die dikwels gedagtelose sing van Psalm 146:1: 

Prys die Heer met blye galme, 
o, my siel, daar’s ryke stof! 
‘k sal solank ek leef, my psalme 
vrolik toewy aan sy lof 
en Hom, wat sy guns my bied, 
altyd groot maak in my lied. 

Die bewustelike sing van hierdie psalmvers behels die volgende: 

Prys die Heer met blye galme: Dit is die Here, die Skepper van hemel en aarde, en ons Vader in Jesus Christus, wat geloof word, en dit voluit, en met blydskap oor Sy genade. 

o, my siel, daar’s ryke stof!: Ek herinner myself daaraan dat die seȅninge van die Here in my lewe talryk is, en oor tyd en ewigheid strek. 

‘k sal solank ek leef, my psalme vrolik toewy aan Sy lof: My lof aan God is met vreugde deel van my hele lewe, of dit nou goed, of minder goed gaan. 

en Hom, wat sy guns my bied, altyd groot maak in my lied: Dit is die Here wat in Sy goedertierenheid Sy helpende hand in Christus na my uitgesteek het, en my vir ewig Sy kind gemaak het. Daarom kan ek nie anders nie as om Hom altyd, in alle omstandighede, te loof vir die oneindige omvang van Sy liefde en majesteit. 

By al die baie seëninge van ons Here, het Hy ons ook geseën met die vermoë om te dink en te konsentreer. Laat ons Hom dus loof met die bewustelike sing van elke lofpsalm, en daarmee saam elke lied waarin ons tot Hom nader. 

Oudl Gerrit Kamper