Die webtuiste vir die Gereformeerde Kerk Centurion.
Skriflesing: Daniël 6 (2020)
Teksvers: Daniël 6:12
1. Die aanslag teen God se kinders.
2. Die geloof van God se kinders.
3. Die bevryding van God se kinders.
“Daardie manne het toe ingestorm en Daniël biddend en smekend voor sy God gekry.”
Daniël 6:12
Skriflesing: 1 Johannes 3 (1983)
Teksvers: 1 Joh 3:1
Ek het eendag gelees dat volgens die Romeinse Reg ‘n aangenome kind nooit onterf mag word nie. By aanneming word volle kindskap verkry, asof jy natuurlik gebore is, en het jy deel geword van die ‘familia’ en onder die ‘patria potestas’ van die aannemende vader moet jy die volle erfreg ontvang, gelyk aan ’n biologiese kind.
Aanneming is dus nie ’n tweede-klas verhouding nie. Kyk wat ‘n voorreg het ons dan om kinders van die Vader en dus broers en susters van die Seun van God te wees!
Tydens die afgelope Algemene Sinode 2026, is daar meer as 100 besluite geneem oor sake wat die kerke raak. Daar is veral baie aandag gegee aan die opleiding van predikante, wat weens die NWU se onttrekking, in die spervuur beland het.
Die eenheid van die GKSA, of te wel die kerkverband, is geskoei op gesamentlike Skrifgefundeerde besluite, wat met meerderheid stemming bepaal word wanneer afgevaardigdes van verskeie selfstandige gemeentes, van tyd tot tyd bymekaarkom (klassis of sinode). Wanneer verskeie selfstandige kerke vergader, word dit geag as ‘n meerdere vergadering. Die spesifieke sinode moet sake ondersoek en opdragte uitvoer en saam biddend onder leiding van die Heilige Gees besluite neem in die lig van die Skrif, belydenis en kerkorde, waarna die sinode weer ontbind.
Die Gereformeerde Kerke is in Christus aan mekaar in eenheid verbind ingevolge die hierdie besluite op grond van die Skrif, belydenis en kerkorde, wat in die verskeie artikels ten doel het om goeie orde in die kerk van Christus te onderhou (sinode besluite is volgens Art 31 KO bindend vir alle kerke in die kerkverband).
Die sensitiewe saak rondom vroue in besondere dienste is al verskeie jare deur die Algemene Sinodes ondersoek en het sedert 1988 studies, besware en appèlsake aangehoor. ‘n Spesiale Sinode in 2009 het tot die gevolgtrekking en besluit gekom dat vroue nie in die amp van leierskap dws ouderlinge en predikante mag dien nie, maar wel in die diakonale amp. Hierdie saak het weer gedien op verskeie opvolgende sinodes van 2015, 2018 en 2023, waar die gevolgtrekking en besluit telkens weer bevestig is. Hierdie saak het nie weer op vanjaar se sinode gedien nie.
Die opdrag aan Sinode 2023 was om in 2026 advies te gee oor kerke wat nie sinodebesluite as bindend ag en daarby hou nie. Die Sinode 26 het as volg besluit:
“Die nie-onderhouding van Sinode besluite insake VIDA kom neer op self-losmaking van die kerkverband. Kerke word opgeroep om hulle te bekeer en in gehoorsaamheid aan Christus sinode besluite te handhaaf.
Die sinode roep kerke, wat hulle nie aan die sinodebesluite insake VIDA hou nie, op om die eenheid in die kerkverband te soek en te beleef. Aan die betrokke kerke word ‘n jaar tyd gegee om hulle besluit om vroue in die ouderling amp te bevestig terug te trek …”
Die Algemene Sinode het dus besluit dat gemeentes volgens Art 31 KO by die sinodebesluite moet hou of die kerklike weg moet volg, terwyl daar op pastorale wyse met hul omgegaan moet word om binne die volgende 12 maande die besluite te eerbiedig.
Aangesien GK Centurion, as bruid van Jesus Christus, haarself nog al die jare met sinodebesluite vereenselwig, het hierdie kwessie rondom vroue in besondere dienste geen direkte impak op ons gemeente se bediening nie. In ons strewe na eenheid in die kerk, sal dit egter diepe hartseer veroorsaak en betreurenswaardig wees indien kerke as gevolg hiervan van die kerkverband wil afskei.
Die kerkraad besef dat hierdie besluit na aan die hart van sommige lidmate is en diepe ontsteltenis kan veroorsaak. Ons versoek u in liefde, dat indien jy onseker voel of ontsteld is oor die besluit van die sinode, om eerder te fokus op die bediening van die GK Centurion en die uitbreiding van die Evangelie in ons gemeenskap.
Mag ons die eenheid in die kerk van Christus altyd kosbaar ag en mag ons troue Koning ook hierin sy kerk bewaar.
U broers in Christus
Die kerkraad
Skriflesing: Genesis15 (2020)
Teksvers: Genesis15:17
God het aan Abram beloof dat hy ‘n die beloofde land sal beërwe, ‘n groot nageslag sal kry en dat deur hierdie nageslag sal God die nasies seën. Alhoewel Abram God glo sukkel hy om te verstaan hoe hierdie gaan gebeur aangesien hy op sy ou-ouderdom nog nie eers ‘n enkele kind het nie…
In vers 17 en 18 sien ons hoe God ‘n belofte maak en ‘n verbond met Abram sluit – hierdie dinge sal waar word! Wat is die betekenis agter hierdie visioen van Abram en hoe sal God dan hierdie belofte en verbond in vervulling bring…?
Worstel ek en jy nie ook soveel kere met hierdie twyfeling aan God se beloftes nie…? Ons glo in God en vertrou op Hom maar sukkel om te in te sien hoe Hy ten spyte van hierdie omstandighede van my getrou gaan bly aan Sy beloftes…
Skriflesing: Jesaja 66 (1983)
Teksvers: Jes 66:1,2
Ons kan nie na die Here toe gaan net soos ons is nie. Ons kan nie aan die nagmaal kom net soos ons wil nie. Die teks spreek ons gesindheid aan indien ons tot die Here wil nader.
As ons met ons selfondersoek ons reg voorberei en met ‘n bekeerde hart kom deelneem aan sy tafel, sal ons daarvan ook nie weggaan as dieselfde mens nie.
Kom ons dien en aanbid en die God van ons verlossing volgens sý terme, sodat Hy in alles verheerlik word…
‘want uit Hom en deur Hom en tot Hom is alle dinge!’
© 2026 Gereformeerde Kerk Centurion
Theme by Anders Noren — Up ↑