Gereformeerde Kerk Centurion

Die webtuiste vir die Gereformeerde Kerk Centurion.

Kategorie: Nuwe Testament (Page 42 of 129)

Oordenking 3 April

April 3, 2023 /

Jy moet heilige eerbied vir Christus in jou hart hê!

Maandag 3 April 2023
Lees: 1 Petr 3:13-15
15 “In julle harte moet daar net heilige eerbied wees vir Christus die Here. Wees altyd gereed om ‘n antwoord te gee aan elkeen wat van julle ‘n verduideliking eis oor die hoop wat in julle lewe.”

In die lewe vandag is dit net al hoe moeiliker om totaal en al vir Christus te leef. Dit is ‘n stryd om te oorleef. Jy moet werk vir geld om te kan kos koop, om ‘n dak oor jou kop te hê, om te jou kinders se opvoeding te betaal, maar ook om vakansie te hou en die lewe te geniet. Alles word in die stryd gewerp om te kan lewe en goed te kan lewe.
• Daarom is daar dikwels in ons harte ‘n groter vrees dat ons dit op aarde nie sal maak nie as wat ons bang is dat ons voor God nie sal maak nie.
• Daarom lei ons dikwels ‘n swaar lewe omdat ons keuses eers is vir die skool, ons werk, ons verpligtinge teenoor die wêreld as dat ons alles biddend moet doen tot eer van God.

Wat beteken dit dat daar net heilige eerbied vir Christus in jou hart moet wees?
Dit beteken…
• Jy moet alles oorgee aan Jesus.
• Lewe alleen om Jesus Christus te vereer en te verheerlik.
• Wees eerder bang as jy mense plesier of vereer i.p.v. vir Jesus Christus.

God gee groot genade ook as ons ly! Daar is groot genade as ons ly vir Jesus Christus.

Die vrees (eerbied) vir die Here oorwin of is meer belangrik as alle ander vrees!
Jes 8:13-14
13 “Julle moet die Here die Almagtige eer as die Heilige. Vir Hom moet julle vrees en vir Hóm moet julle bang wees.
14 Hý sal vir julle ‘n veilige beskutting wees, maar vir die twee koninkryke Juda en Israel sal Hy ‘n klip wees waarteen ‘n mens jou stamp, ‘n rots waaroor jy struikel. Vir die inwoners van Jerusalem sal Hy ‘n vangnet en ‘n strik wees.”

Ons vyande kan ons seermaak, maar hulle kan ons nie skade aandoen nie. Dit is net onsself wat ons kan skade aandoen as ons nie gehoorsaam is aan God en sy Woord nie. Ons kan onsself skade aandoen as ons nie volkome op God vertrou nie. Niemand neem iemand anders kwalik as hy goed doen nie, maar as jy dit in die Naam van Jesus Christus doen, dan is daar dikwels teen-stand. Maar salig, gelukkig, geseënd is ons as ons doen wat God vra en gehoorsaam is aan sy Woord, al moet ons lyding ervaar. Hierdie saak word in diepte aan ons geopenbaar 1 Pet 4:12-19.

Wanneer Jesus Christus die Koning en Here van ons harte is, word elke krisis ‘n geleent-heid om te getuig van Jesus Christus. In vers 15 staan daar in die grieks dat ons altyd bereid moet wees om ‘n “apologia” – apologie te gee teenoor almal. Apologie beteken nie om te sê: “Ek is jammer nie!” maar dit beteken om ‘n weldeurdagte antwoord te gee vanuit die geloof.

‘n Krisis in die lewe van ‘n christen, skep die geleentheid om te getuig van jou geloof en lewende hoop in Jesus Christus. Ongelowiges behoort dan te kan sien maar ons as christene het ‘n sekere en vaste hoop. Ons is nooit hopeloos of verlore nie, maar ons sien uit na ‘n heerlike ewigheid by ons Hemelse Vader. Ons getuienis moet gegee word met sagmoedigheid vrees, respek, en nie met arrogansie en ‘n weet-dit-alles-houding nie.

Om dus heilige eerbied vir Jesus Christus in jou hart te hê, is …
• om volgens Mat 6:33, skatte in die hemel vir jou bymekaar te maak,
• om volgens Rom 12:1-2 jouself as lewende dankoffer aan God toe te wy en
• om volgens 1 Petr 2:5 jouself as ‘n lewende bousteen te laat opbou.

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Gekies vir ‘n taak

April 3, 2023 /

Skriflesing: 1 Petr 2:1-10 
Teksvers: 1 Petr 2:9,10; Ex 19:5-6; Jes 7:6 

Dit is altyd ’n voorreg om gekies te word om ’n besondere taak te verrig. Die rede hoekom jy gekies word lê dikwels in wat jy alreeds in die lewe bereik het. 

Jy word byvoorbeeld vir ‘n sportspan gekies omdat jy goed presteer in die sport. Jy word as leier by die skool gekies omdat jy leierseienskappe openbaar. Jy word gekies dikwels vanweë iets wat jy al bereik het. 

Ons is deel van die kerk, omdat ons sekerlik aangesluit het om te glo. Maar hoekom glo ons? Omdat God ons daartoe gelei het. Ons is gekies vir ’n taak. 

Dit is oor hierdie taak waaroor ons vanaand gaan luister na die Woord. 

Die beker wyn wys op die nuwe verbond in die bloed van Christus

April 3, 2023 /

Skriflesing: Lukas 22:7-23; Eksodus 24:1-9; Levitikus 17:10-14 
Teksvers: Lukas 22:20 

Vandag staan bekend as palm Sondag. Dit is die dag waarop Jesus vir die laaste keer na Jerusalem sou kom. 

Hy was verbied om deur die gebied van Samaria te gaan, en moes die roete van die Dekapolis neem. So het Hy as te ware die laaste Eksodustog aangedurf om die Eksodus in Jerusalem te volbring. Hier word die Pasga, die Paasfees vervul as Jesus self as Offerlam geslag word. 

Ons kyk vandag na die betekenis van die beker wat Jesus moes drink, en die beker wat Hyself getuig, die Nuwe Testament in sy bloed is. 

Oordenking vir 30 Maart

Maart 30, 2023 /

Hoe ‘n christen in die wêreld moet lewe!

Donderdag 30 Maart 2023
Lees: 1 Petr 3:8-12

Onthou dat Petrus hierdie brief geskryf het aan die gelowiges wat verspreid gewoon het in die Noordelike streke van die destydse Klein-Asië, dit is die hedendaagse Turkye. Petrus het hierdie brief geskryf om die gelowiges wat ter wille van hulle geloof vervolg en onderdruk is, te bemoedig.

Hoe moet ‘n christen optree as hy verdruk en onderdruk word. Die swaarkry waarvan hier gepraat word, dui op die dag tot dag lyding wat hulle moes verduur en nie noodwendig op die vuurproef waarvan ons in 1 Petr 4:12 en verder lees nie.

Hoe moet ons as christen optree as ons verdruk word?

Daar moet wedersydse liefde in die kerk wees. Liefde is ‘n deurlopende tema in die brief van Petrus. Dit gaan nie net oor God se liefde vir ons nie, maar dit gaan ook in besonder oor ons liefde vir mekaar.
• Petrus self moes hierdie soort liefde op dieselfde manier leer.
• Hoe geduldig moes Jesus nie wees met Petrus se voortvarendheid nie?
• Petrus wat vir Jesus wou veg en Malgus se oor afgekap het. (Joh 18:10)
• Petrus wat op die water wou loop en toe het hy kleingelowige geword. (Mat 14:31)
• Petrus wat Jesus self drie maal verloën het. (Luk 22:61)

Soos wat die hele wet deur Jesus opgesom is as ‘n liefdesgebod lees ons in Mat 22:34-40, so leer ons in Rom 13:8-10 dat liefde die volle uitvoering van die wet is.
Rom 13:8 “Julle moet niemand iets verskuldig wees nie, behalwe om mekaar lief te hê. Wie sy medemens liefhet, voer die hele wet van God uit.”

As christen kan ons op drie maniere leef:
• Ons kan kwaad vir goed vergeld.
• Ons kan kwaad vir kwaad en goed vir goed vergeld.
• Ons kan goed vir kwaad vergeld, wat die heilige wil van God is. Jesus Christus het self hierdie voorbeeld gestel lees ons in 1 Petr 2:21-23 “21 Juis hiervoor is julle ook geroep, omdat Christus self vir julle gely en so vir julle ‘n voorbeeld gestel het, sodat julle in sy voetspore kan volg. 22 “Hy het geen sonde gedoen nie en uit sy mond het daar nooit ‘n leuen gekom nie. 23 Toe Hy beledig is, het Hy nie terug beledig nie, toe Hy gely het, het Hy nie gedreig nie, maar alles oorgelaat aan Hom wat regverdig oordeel.”

Samevattend leer Petrus hier aan ons, dat ons mekaar moet liefhê, ons vyande moet liefhê en die lewe moet liefhê. (1 Pet 3:10-12)
Om dit te kan doen moet ons…
• Doelbewus besluit om die lewe lief te hê en te geniet tot eer van God. (1 Petr 3:10)
• Ons tong in toom hou. (Ps 141:3; Jak 3:1-12)
• Ons moet goeddoen en die kwaad haat. (Mat 5:9)

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Oordenking 27 Maart

Maart 27, 2023 /

Hoe ‘n huwelik suksesvol kan wees!

Maandag 26 Maart 2023
Lees: 1 Petr 3:1-7

Statistieke is dat een uit elke twee huwelike in die egskeidingshof beland. Dit ondanks die feit dat ons vandag duisende der duisende boeke het oor die huwelik. Daar is huweliksver- rykings-kursusse, pastorale beraders, sielkundiges ens. Tog word die egskeidingsyfer net al hoe meer, terwyl al meer mense saambly en bloot net nie meer trou nie. Hierdie probleem is ook van toepassing op christelike huwelike.

Al trou twee christene, is dit steeds nie ‘n waarborg dat die huwelik sal slaag nie.
‘n Huwelik vra opregte, eerlike, harde werk. Dit vra om biddend elke dag voor God te buig en te vra vir liefde en leiding. Hierdie leiding en liefde vind ons in die Woord.

Petrus onderrig christene oor die huwelik in 1 Petr 3:1-7. Paulus onderrig ook oor die huwe-lik in Ef 5:21-6:4 asook Kol. 3;18-21. As jou huweliks-maat nie ‘n christen is nie of selfs in ‘n ander christelike denominasie as jy is, kan dit dalk nog harder werk vra om die huwelik te laat slaag.

Petrus skryf aan die vrouens in 1 Petr 3:1-6. Hy begin met die woorde in die 2020 vertaling, 1 Petr 3:1,2 “Net so, vroue, moet julle aan julle eie mans ondergeskik/onderdanig wees, sodat, self indien sommige aan die woord ongehoorsaam is, ook hulle sonder ‘n woord gewen kan word deur die manier waarop julle leef, 2 omdat hulle julle rein, eerbiedige leefwyse raaksien.” Die “Net so…” wys terug na Jesus Christus se voorbeeld in 1 Petr 2:21-25 toe. Jesus Christus was onderdanig en gehoorsaam aan God se wil. So moet ‘n christen-vrou en haar christen-man aan mekaar onderdanig wees en Jesus Christus se voorbeeld navolg. Vir die mans klink dit dalk vreemd om te sê dat jy onderdanig moet wees aan die vrou, maar ons lees in Ef 5:21 “Wees uit eerbied vir Christus, aan mekaar onderdanig.”

Die groot probleem in ons hedendaagse tyd, is dat mans en vrouens, hulle huwelike wil inkleur soos wat die wêreld die huwelik voorhou. Net romanties, net ‘n fees, net daar ter wille van eie plesier. Romantiese vakansies, selfs sonder kinders en kleinkinders, net om twv jouself te leef. Die wêreldse standaarde word dan in Hollywood gemaak en almal volg dit slaafs na, die sepies, die flieks, dit wat die wêreld voorhou.

In die huwelik moet ons Jesus Christus as die Bruidegom (Open 19:1-7) navolg. As ons Jesus Christus navolg in die huwelik wat onderdanigheid, nederigheid, gehoorsaamheid aan God se wil inhou, dan sal die huwelik wonderlik en geslaag wees.

Ons kan nie Jesus Christus navolg tensy ons Hom nie ken as ons Verlosser en onsself aan Hom onderwerp in geloof en gehoorsaamheid nie. Ons moet elke dag, tyd met Jesus spandeer deur Bybel te lees en te bid.

So moet ‘n christen man en vrou elke dag tyd saam met mekaar spandeer om God te dien en te vereer, en mekaar te dien en te bedien met liefde en begrip.
 Dan sal die huwelik suksesvol wees.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑