Kategorie: Blogs (Page 19 of 50)

“Hier staan ek, ek kan nie anders nie, mag God my help” So lui die bekende woorde van Luther op die Ryksdag van Worms. Dit was nie soseer die Keiser of die Pous wat Luther tot hierdie getuienis gebring het nie, maar die Woord van God en die werking van die Heilige Gees wat sy gewete gebind het aan die Waarheid! 

Tydens die afgelope week se 5de sessie van die Pastorale Versorgingskursus, was die tema: Coram Deo. Dit beteken: voor die aangesig van God. Elke mens moet voor die aangesig van God staan, en jou verantwoord oor jou optrede. 

Soos Luther, word ons nie net gedaag voor ‘n regter nie, maar voor die Regter. So het gelowiges deur die eeue heen, soms fisies voor God gestaan en beloftes ontvang of opdragte gekry. Wanneer ons as gemeente op die “Jom Jahwe”, die dag van die Here bymekaar kom, dan staan ons ook Coram Deo. Eerskomende week gaan ons die Nagmaal van die Here gedenk, deur saam aan die tafel van die Here deel te kry. 

In die Nagmaalsformulier word dit eksplisiet voorop gestel dat elke gelowige hulleself waarlik moet self ondersoek, dit is dat elkeen sy/haar: 

1. denke ondersoek: dink na oor jou sonde en vervloeking 

Reaksie: verootmoedig jou voor God 

2. hart ondersoek: Glo jy die vaste belofte van God 

Reaksie: Slegs Christus kan jou sondes vergewe en God se geregtigheid skenk 

3. gewete ondersoek: Wat is jou voorneme van vergifnis 

Reaksie: Bewys dank aan God en leef opreg deur te vergewe en jou naaste lief te hê 

Stel jouself op die proef, of soos Paulus aan die Korintiërs skryf in 2 Kor. 13:6 “Ondersoek jouself of jy uit die geloof is” Mag jy in die spieël van God se wet kyk en sien dat jy sonder Christus niks is nie. Kom dan na die Nagmaal, haastig, kruisig jou ou sondige natuur saam met jou Verlosser, sodat jy saam met Hom begrawe kan word in die dood van die sonde. Staan dan op, en leef in ‘n nuwe lewe, deur die krag van Sy sterkte Coram Deo… 

Lourens (vdm) 

Nog ‘n geweldige ramp het die wêreld geskud. 

Op 9 Februarie 2023 om ongeveer 4uur die oggend vroeg, terwyl die meeste mense nog vas aan die slaap was in hierdie winternag in Turkye en Sirië, het ‘n aardbewing van 7.8 op die Richterskaal, opgevolg deur ‘n tweede skudding van 7.7, dood en verwoesting gesaai. Die syfer tot op vandag waar ek hier skryf reken daar is meer as 41 000 reeds mense dood. Steeds word mense na meer as ‘n week nog lewend onder die hope puin van die meer as 7000 hoë geboue wat geval het, uitgehaal. Die hartseer en pyn van hierdie landstreke raak die harte van meeste mense regoor die aardbol, en daar word op allerlei wyse gesimpatiseer en met noodleniging onder moeilike omstandighede gehelp. 

Ek moes dadelik dink aan die versie in Ef 5:14-20 …“Daarom sê die lied: ‘Word wakker, jy wat slaap, en staan op uit die dood; en Christus sal jou lewe verlig.’ Wees baie versigtig hoe julle lewe: nie soos onverstandige mense nie, maar soos verstandiges. Koop die tyd uit, want ons lewe in ‘n goddelose tyd. Moet daarom nie onverstandig optree nie, maar probeer te wete kom wat die Here wil dat julle moet doen. Moet julle nie aan drank te buite gaan nie; daarmee gaan losbandigheid gepaard. Nee, laat die Gees julle vervul, en sing onder mekaar psalms, lofgesange en ander geestelike liedere; sing met julle hele hart tot eer van die Here. Dank God die Vader altyd oor alles in die Naam van ons Here Jesus Christus.” 

Die aardbewing se emosionele, finansiële en psigiese gevolge is onmeetbaar op enige skaal. Ons harte gaan uit na elkeen wat die pyn van soveel verlies in die volgende weke, maande en jare moet probeer verwerk. Wat ons egter wel weet is dat ook hierdie ramp deel uitmaak van die tekens van die naderende koms van Jesus Christus op die wolke van heerlikheid (Mat 24). 

In ‘n wêreld waar ons konstant herinner word aan die tydelike en verganklike bestaan wat ons ons hier beleef, moet ons ons oefen om ons harte te fokus op die onverganklike God en sy ewige beloftes! Mag die Woord ons onwankelbare fondasie wees. Mag ons ons oë rig op die ewige gebou in die hemel wat God vir ons voorberei het. Want Jesus is aan die kom en die verwoesting van sy oordeelsgloed sal veel erger wees as enige katastrofe wat hierdie wêreld in sy hele bestaan beleef of gesien het. Hy sal sy dorsvloer deur en deur skoonmaak, en sy geliefde uitverkorenes red soos brandhout uit die vuur. 

Laat ook hierdie aardbewings van Turkye vir ons ‘n herinnering wees dat Jesus oppad is, en aan die vraag of jy daarvoor gereed is. 

Is jy nog aan die slaap of is jy wakker en gereed?

Ds Maarten 

Op die Sinode is daar meer as tweehonderd en vyftig sake ter tafel geneem en bespreek. Sommige sake kon vinnig en deeglik afgehandel word en ander sake het baie tyd geneem omdat daar bespreking, besinning en deeglike navorsing gedoen moes word voordat daar tot besluite gekom kon word. 

Ons poog om die volgende paar Sondae terugvoer te gee oor van die belangrikste sake wat bespreek is. 

Die eerste saak waaroor ons wil terugvoer gee, handel oor Diakonale sake. Die naam daar-voor is die SDDS wat staan vir die Sinodale Deputate vir Diakonale sake. Die deputate hou toesig oor die volgende sake: 

• Paul Kruger kindershuis in Pretoria. 
• Paul Kruger kinderhuis in Reddersburg. 
• Glenzicht aftreeoord in Oakdene Johannesburg. 
• Noodtoestande. 
• Bystandsfonds volgens Kerkorde art 25. 

Hierdie deputate werk baie hard om toesig te hou, raad te gee en te help om die kinderhuise so te bestuur dat die kinders ‘n veilige tuiste het en in die vrese van die Here te mag opgroei. Elke kinderhuis het plek vir ongeveer drie-en-sestig kinders. Glenzicht aftree-oord was ontwikkel op die terrein van die destydse kinderhuis in Johannesburg wat al jare gelede gesluit het. Uit diè opbrengste word die kinderhuise ook onder andere gesubsidieer. Verder help die deputate ook as daar nood in die land is soos droogtes of vloede of rampe. Die hulp gaan ook verder na broers en susters in die buiteland. 

Hierdie deputate werk ook nou saam met al die diakonieë in die land, ook met die diakonie van Centurion, om te help waar daar nood is, om ander diakonieë in nood by te staan en om konferensies te reël vir die nodige toerusting en opleiding van diakonieë. Hier in Pretoria is ons diakonie ook baie betrokke met leiding om met ander diakonieë te skakel vir gekoördineerde hulp in die stad, nie net aan die kinderhuise nie, maar ook aan ander inrigtings waar daar nood is. 

Ons het met groot dankbaarheid kennis geneem van hierdie kosbare werk wat gedoen word en ons vra ook dat u as gemeente altyd voorbidding sal doen vir ons diakonie, maar ook vir hierdie deputate se werk. 

Ds. Gerrit 

Die erns en toewyding waarmee die afgevaardigdes bymekaarkom is verblydend. Daar word met groot erns gewerk. Dit is altyd opvallend hoeveel vooraf werk daar gedoen is. Die werk van die Sinode word deurentyd gedoen deur deputaatgroepe wat aangewys word om die sinode te adviseur. Voortdurend is deputaatgroepe, dominees, ouderlinge, broeders en susters, talle lidmate besig om in die kerk van die Here te werk. Om kerk te wees behels veel meer as om net op Sondae bymekaar te kom. 

Die erns waarmee die afgevaardigdes die verslae deurgaan en bespreek is opmerklik. Alles word deesdae elektronies gedoen en daar is bykans 800 bladsye wat deurgewerk is. 

Die vergadering het elke dag om 08:00 begin en menige aande tot 21:00 aangegaan. Daarna moet daar nog voorberei word vir die volgende dag. Die werk is dan nie klaar nie maar daar word weer werk uitgedeel vir verdere studie en aanbevelings tydens die huidige Sinode en/of om voor te berei vir die volgende Sinode oor drie jaar. Die kerk van die Here moet altyd reformerend en relevant bly in die huidige wêreld. 

Daar is altyd groot uitdagings vir die kerk. ‘n Groot uitdaging is die finansiële uitdagings. Dit mag egter nooit in die pad staan van werklik kerk-wees tot eer van God nie. Die Here voorsien altyd, sodat die werk gedoen kan word. 

Dit is ‘n baie lang en intensiewe vergadering. Die vergadering is ook nog nie verby nie maar gaan virtueel hierdie komende week nog aan waar ons aanlyn die vergadering verder sal voer. Dit gaan ook uitdagend wees as ‘n eerste keer. 

Ons moet nooit ophou bid vir die kerk van die Here nie. Die belofte van God staan vas: Mat 16:18 “En Ek sê ook vir jou: Jy is Petrus, en op hierdie rots sal Ek my gemeente bou, en die poorte van die doderyk sal dit nie oorweldig nie.” 

Wat ‘n voorreg om deel te wees van hierdie vergadering te wees. 

Bly voorbidding doen vir die kerk van die Here, maar in besonder ook vir die vergadering. 

Ds. Gerrit 

Van môre (Maandag) af vergader die GKSA weer in die Algemene Sinode om die sake van die kerk van die Here te bespreek en te reël. Ons bede is dat dit waarlik ʼn vergadering onder leiding van die Heilige Gees sal wees, wat dien tot die opbou van die kerk van Christus en tot die eer van God. 

Vanaf 30 Jan – 4 Feb vergader 280 afgevaardigdes van die 7 Streeksinodes van SA in die Sinodesaal in Molenstraat, Potchefstroom. Elke dag van 8vm tot 10nm word daar gebid en gewerk om die agenda van 800 bladsye (uitgesluit die ondersteunende state van nog 500 bladsye) deur te werk. Na hierdie eerste week is die volgende week, (6 tot 10 Feb) ook geskeduleer, waartydens die afgevaardigdes in groeperings van hul Streeksinodes (in Streeks-verband) aanlyn vergader, om die agenda af te handel. 

Tydens my voorbereiding van al die stukke ter tafel vir die Sinode, het ek weereens diep bewus geraak van die wye verskeidenheid van werk in die “groter” kerk van die Here. Die manne- en vroue-krag en inspanning wat inherent en agter al die rapporte (verslae) lê, is indrukwekkend. Ons dank die Here vir al die mense en hul gawes (en tyd) wat hulle bestee aan die diens van die Here. 

Die voorsitters en skribas (die moderamen) van die Sinode word Maandag na die konstituering van die vergadering verkies. Rapporte van die drie jaar (en langer) se werk word agtereenvolgens gelewer en dan na adhoc kommissies verwys met aanbevelings vir goedkeuring of afkeuring. As die Sinode dus saans vroeg verdaag, vergader meeste afgevaardigdes weer in hul betrokke kommissies tot laatnag. Die notule word daagliks gelees en goedgekeur. (Ek vertel dit maar net dat u ʼn idee kry van wat by sinodale vergaderings gebeur). 

Laat ons die Here dank vir hierdie mense en die werk wat gedoen is deur al die Deputategroepe en ook bid dat Hy, die Koning van sy kerk, hierdie heilige vergadering die volgende twee weke mag seën met die leiding en genade van die Heilige Gees. 

Ds Maarten 

Gemeenskap en verbond loop hand aan hand. God bestaan reeds voor die skepping in ‘n gemeenskap tussen Vader, Seun en Heilige Gees. Omdat God ‘n God van gemeenskap is, skep Hy ook die mens in gemeenskap met Homself.

God maak die mens deel van Sy gemeenskap. Dit is die doel van die mens se bestaan, om in gemeenskap met God drie-enig te leef. Hierdie gemeenskaplikheid met God is egter nie ‘n eksterne of uiterlike gemeenskap nie, maar innerlik.

God skep die mens na sy beeld. Die mens ontvang ‘n gemeenskaplike beeld van God. God blaas in sy neus die asem van die lewe. Dit is die inwoning van die Heilige Gees. Nou kan die mens God se wil uitvoer en ewig met God in gemeenskap leef. Daarom die opdrag: bewerk en bewaak.

Om te werk is nie ‘n vloek nie, maar ‘n Goddelike roeping. Dit is by die bewaak deel waar die mens en sy vrou hulle roeping versaak. Deur die sonde verbreek die mens se gemeenskap met God. Die Heilige Gees kan nie langer in die mens woon soos voor die sondeval nie.

Om hierdie verhouding te herstel, maak God ‘n verbond met die mens. Die fondament van daardie verbond word gebou op die moederbelofte van Genesis 3:15. Daar sal Een wees uit die nageslag van die vrou, wat die slang se kop sal vermorsel.

God sal self voorsien om die sonde en die dood, wat deur die sondeval gekom het, te vernietig en te oorwin. Telkens sien ons hoe God dan die mens kom opsoek om in gemeenskap met Hom te leef. Noag, Abram, Isak, Jakob, Moses (Levi), Dawid.

God se beloftes bind geslagte aan mekaar. Deur geloof word hierdie beloftes vervul.

Hierdie is egter nie verskillende verbonde nie, maar een verbond met verskillende bedelinge. Ons gaan vervolgens deur die kwartaal stilstaan by die betekenis van elkeen van hierdie bedelinge met die vervulling in Christus.

Mag u daardeur sien hoe God Homself deur die geslagte in verbondsgemeenskap stel, met sy kerk wat Hy losgekoop het, om weer in gemeenskap met Hom te leef.

Lourens (vdm)