Die webtuiste vir die Gereformeerde Kerk Centurion.

Kategorie: Eksodus (Page 3 of 4)

DIE HERE SE PAD IN MENSLIKE DOODLOOPSTRATE

Skriflesing: Eksodus 14:1 -15:3; 15:20,21; Jes 43:1-5
Teksvers: Eksodus 14:14-16

Die wêreld was lanklaas so deurmekaar soos die laaste tyd. Dit gaan van kwaad na erger en mens voel letterlik die prooi van allerlei boosheid en korrupsie en skelmstreke. 

Dit lyk of ons niemand meer kan vertrou nie. Ja, nie eens ons eie leiers nie. Die prentjie het maar somber geraak en dit voel soms of ons in ’n doodloopstraat beland het. 

En dit is juis in hierdie tye wat die Here ons leer om op Hom alleen te vertrou. Hy sien die groot prentjie, maar meer as dit, Hy beheer/regeer dit ook. Daarom is dit juis dan die tyd vir geloofsvertroue op Hom alleen! 

God wil onder ons woon

Skriflesing: Eksodus 25
Teksvers: Eksodus 25:8

Na aanleiding van die besoek aan die duplikaat van die Tabernakel in die woestyn saam met die kinders verlede week, het ek dit goed gedink om oor hierdie gedeelte te preek. Dit was immers ‘n wonderlike genade dat die Here na die episode van die goue kalf nog steeds hierdie verklaring aan Moses doen. 

Dit is wonderlike genade dat die Here in ons en by ons wil woon. Die apostel Johannes jubel juis daaroor in sy eerste hoofstuk: Die woord het vlees gewoord en onder ons kom woon! (Jh 1:14) 

In Christus moet ons ongesuurde brood wees van reinheid en waarheid

Skriflesing: Eks 12:15-20; Num 9:1-5; 11-12; Jos 5:10-12
Teksvers: Eksodus 12:15-17

Binnekort is dit Paasfees. Die groot fees van die offerlam wat geslag is. Saam met die Paasfees is daar egter nog ‘n fees, ‘n half onbekende fees. Die fees van die ongesuurde brode. Hierdie fees moet vir sewe dae lank gevier word, van die 14de tot die 21ste van die maand.

Ons kyk vanaand na die betekenis van die ongesuurde brode en hoe dit op ons self betrekking het.

God beproef ons met die brood wat ons eet

Skriflesing: Eksodus 16:1 ev 
Teksvers: Eksodus 16:4 
HK Sondag 50

Daar was om en by ‘n miljoen Israeliete wat uit Egipte getrek het, wat heel tereg gewonder het waar gaan hulle kos vandaan kry. Wat vir ons onmoontlik is, en ons finansieel sal ruïneer, om vir ‘n miljoen mense vir 40 jaar elke dag kos te gee, is vir die HERE voor die hand liggend… 

Hy gee aan sy bemindes wat hulle nodig het in die slaap. 

Hierdie woorde, waarmee ons Here Jesus ons leer om te bid, gee ons vandag ons daaglikse brood, is geweldig moeilik in ons huidige omstandighede. Dit voel byna onmoontlik om in te sien waar ons “brood” vandaan gaan kry. 

Ons staan vanaand stil by die HERE wat ons beproef in die brood wat ons eet.

Amen

Gehoorsame kinders leef tot eer van God

Skriflesing: Eksodus 20:12; Efesiërs 6:1-9
Teksvers: Eksodus 20:1
HK Sondag 39

In die vyfde gebod, waar dit oor gesag gaan, is die beginsel wat daargestel word, ‘n baie intieme en bekende verhouding: Eer jou vader en jou moeder!

Gesag begin by hierdie eerste verhouding waarin ons die wêreld binne kom. Jou ouers is die eerste persone wat jy ken. Hulle is die persone deur wie jy in die lewe kom. En hulle is uiteraard die eerste mense met wie jy te doen kry… As ouers is ons nie alleen in ‘n liefdesverhouding tot ons kinders nie, maar ook ‘n gesagsverhouding…

Hierdie gesagsverhouding weerspieël iets baie meer as net ons gesinstruktuur. Dit wys op ons gewilligheid om te leef onder die gesag van ons hemelse Vader. Ons staan stil by die vyfde gebod met die tema: Gehoorsame kinders leef tot eer van God.

Laai af

SONDAG, DIE DAG VAN DIE HERE – ‘n RUSDAG, ‘n FEESDAG

Skriflesing: Eks 20:8-11; Psalm 92
Teksvers: Ps 92:1,2,14 (Eksodus 20:8-11)
HK Sondag 38

Die Sabbatsgebod reël die mens se weeklikse roetine. Ses dae werk en een dag rus. So was dit van die begin af. Ja, selfs voor die gee van die Tien Gebooie was dit reeds die reël! (Eksodus 16 – die sewende dag was daar geen manna nie).

Die mens wat as die beeld van God gemaak is, ontvang dus hierdie reël van sy God. Op die sewende dag het God sy werk voltooi deur te rus. Die rus was die kersie op die koek! God laat Hom nie rusteloos voortjaag nie. Hy wil ook dat die mens in ‘n bepaalde roetine kom, en so nie ‘n slaaf van die dolle gejaag van die tyd word nie.

Het jy nog tyd vir die Here? Die Sondag wat in die plek van die Sabbat gekom het, is juis die dag waarop jy en ek kan rus, weer tot verhaal kan kom, om na te dink en weer van Hom te leer hoe ons Hom in die week moet dien!

Laai af

« Older posts Newer posts »