Kategorie: Nuwe Testament (Page 15 of 130)

‘n Herstelde verhouding met Jesus

Mei 26, 2025 / admin

Skriflesing: Matteus 11 (2020)
Teksvers: Matteus 11:28

Terwyl ons nou die langverwagte Feesnaweek nader en ook ons voorberei om saam die heilige Nagmaal te vier, is dit nodig om na te dink oor ons verhouding met ons Verlosser.

Een van die moontlike slaggate in ons gereformeerdes se geloofmondering is dat ons baie (dalk té) rasioneel oor die Bybel en oor ons Here kan dink.

Miskien moet ons net weer vra waar ons harte in hierdie verhouding inkom. Miskien gaan dit juis oor hoe ons oor Jesus Christus dink.

Wonderbaar in ons oë

Mei 19, 2025 / admin

Skriflesing: Matteus 21:33-46 (2020)
Teksvers: Matteus 21:42-44

‘n Gelykenis is meer as net ‘n mooi, opgemaakte storie. Dit is ‘n beeld wat gebruik word om ‘n dieper betekenis van die lewe te verduidelik. Gelykenis beteken soortgelyk, of dieselfde. Dit is nie soos Simson se raaisel nie, maar eerder ‘n beskrywing wat iets meer duidelik stel.

Tog is daar iets van ‘n geheimenis wat daarin versluier is. Jesus het veral gelykenisse gebruik om verskillende aspekte van sy koms te verduidelik sodat gelowiges kan verstaan wat Hy bedoel.

Ons staan vanoggend stil by die gelykenis van die landbouers en die verduideliking uit Psalm 118 as die vervulling van die Skrifte.

‘n Herstelde gebedslewe

Mei 14, 2025 / admin

Skriflesing: Handelinge 12 (2020) Psalm 130
Teksvers: Hand 12:12

In die diepste donker ure van ons aardse lewe en stryd is ons
nooit en nimmer alleen nie. Die Here sien sy kinders en die
Here hoor. Hy hoor altyd.

Dit is dus van uiterste belang dat ons elkeen ‘n diep
persoonlike, maar ook gemeenskaplike gebedsverhouding
met die Here aanleer en inoefen.

Hy is nie vér van enigeen van ons af nie.

Ware geloof in Christus vra selfverloënende diens en liefde

Mei 5, 2025 / admin

Skriflesing: Johannes 21:15-25 (2020)
Teksvers: Johannes 21:15-17

Hoofpunte:
1. Selfverloëning.
2. Diens.
3. Liefde.

“Hy vra hom die derde keer: “Simon, seun van Johannes, het jy My lief? “Petrus het bedroef geword omdat Hy hom die derde keer gevra het, “Het jy My lief?” en hy antwoord Hom: “Here, U weet alles. U weet dat ek U lief het.” Jesus sê vir hom: “Laat my skape wei.””

Joh 21:17

Gee in hierdie lewe verstandige antwoorde, gelowige!

April 28, 2025 / admin

Skriflesing: Lukas 16:1-9 (2020)
Teksvers: Lukas 16:8b

Die antwoorde wat jy in hierdie lewe gee, is veelseggend.

Die bestuurder in Jesus se gelykenis worstel met die een vraag: “Wat moet ek nou doen?” Die antwoord wat hy gee, is veelseggend. Teenoor die antwoorde wat die mense van hierdie wêreld gee, stel Jesus die antwoorde van die “mense van die lig.”

Wie deur die Lig verlig is, behoort:

• die krisisse in hulle lewe gouer en beter te herken en te erken

• nie deur krisisse verlam te word nie

• nie in selfsug tydelike vriende te soek nie, maar in liefde “ewige” vriende.

Die Oorwinnaar plaas sy verlostes op ‘n pad van vurige verwagting

April 28, 2025 / admin

Skriflesing: Lukas 24:1-35 (2020)
Teksvers: Lukas 24:14

1. Sonder verwagting ná daardie Sondagmôre!

Die Here se oorwinning is reeds bekend. Tog loop twee van sy volgelinge in moedeloosheid en gedagtes wissel.

2. Gelei tot verwagting daardie Sondagmiddag.

Jesus soek sy moedelose volgelinge op. Hy begin saam met hulle stap. Sonder dat hulle weet Wie Hy is, begin Hy hulle op ‘n baie persoonlike en liefdevolle manier in hulle denke begelei.

3. Verwagting verkondig daardie Sondagaand.

Toe die volgelinge se oë geopen is, gaan hulle terug na Jerusalem. Hulle wat “weet” die Here het regtig opgestaan, moet daardie wonderlike wete met ander deel.