Kategorie: 1 Petrus (Page 4 of 7)

Jesus Christus is ons Herder en Bewaker wat ons lei om God se wil te doen!

Maandag 20 Maart 2023
Lees: 1 Petr 2:25: Joh 10; Luk 15:1-7; Heb 13:20-21
25 “Julle het immers soos skape rondgedwaal, maar nou het julle teruggekom na julle Herder en die
Bewaker van julle lewe.”

Heb 13:20 “God wat vrede gee, het ons Here Jesus wat deur die bloed van die ewige verbond die groot Herder van sy kudde is, uit die dood teruggebring.
Heb 13:21 Mag dié God julle toerus met alles wat goed is, sodat julle sy wil kan doen.
Mag Hy deur Jesus Christus in ons tot stand bring wat vir Hom aanneemlik is.
Aan Hom behoort die heerlikheid tot in alle ewigheid! Amen.

In die Ou Testament is skape geslag vir die herder en in die Nuwe Testament is die Herder op Golgota geslag vir die skape.

Die beeld van die herder met sy skape word tale kere in die Bybel gebruik.
• Josef se broers het skape opgepas.
• Moses was ‘n skaapherder van sy skoonpa Jetro. Ex 3:1
• Dawid was ‘n skaapherder. Psalm 23
• Amos was ‘n skaapboer uit Tekoa. Amos 1:1

Daarom word hierdie beeld van skape en herders dikwels in die Bybel gebruik om aan ons te leer…
• Hoekom Jesus Christus ons Herder is.
• Hoekom ons sy skape is.
• Wat die doel van ons skaapwees is.

Hoekom Jesus Christus ons Herder is, is omdat skape sonder ‘n herder, ronddwaal en verdwaal.
Sonder ‘n herder is skape rigtingloos en doelloos en loop agter weiding en water aan, sonder om daarna te weet waar hulle kraal is. In Luk 15:1-6 vertel Jesus juis die gelykenis van die verlore skaap. Elke skaap is vir die herder belangrik. Hy tel hulle gereeld. En dan as een weg is, los hy die ander nege en negentig en gaan soek die verlore skaap. Die vergelyking is juis dat as een van Jesus Christus se skape weg is, gaan Hy hom soek en bring hom terug en dan is daar blydskap in die hemel, omdat die verlore skaap gekry is. Elkeen van ons is van lewensbelang vir God. Ja, God het elkeen van ons, sy kinders so lief dat Hy Jesus Christus, sy eie Seun gestuur het om ons wat verlore is te kom loskoop. Heb 13:20 “God wat vrede gee, het ons Here Jesus wat deur die bloed van die ewige verbond die groot Herder van sy kudde is, uit die dood teruggebring.”

Hoekom ons God se skape is, is omdat God ons gekoop het met die bloed van sy eie Seun. God het ons immers uitgekies nog lank voor ons geboorte. God het sy kudde uitgekies. Soos skape het ons rondgedwaal en weens ons sonde en ellende sou ons verdwaal het, weg van God af. Maar toe het God sy eie Seun, Jesus Christus gestuur as die groot Herder, wat ons nie net gekoop het met sy eie bloed en liggaam nie, maar wat ons ook lei en dra en versorg. Jes_40:11 “Soos ‘n herder versorg Hy sy kudde: die lammers maak Hy bymekaar in sy arms en Hy dra hulle teen sy bors, Hy sorg vir die lammerooie.”
Wat die doel van skaapwees is! Geliefdes ons is nie skape om op ons eie te leef net tot ons eie geluk en voordeel nie. Nee ons is skape wat moet lewe tot eer van God, volgens sy wil. Ons lees in 1 Petr 2:24b dat ons moet lewe in gehoorsaamheid aan die wil van God. Die Heilige Gees is ook uitgestort om in ons te woon, ons te lei hier op aarde, sodat ons, nadat ons wedergebore is, deur die Gees gelei kan lewe tot eer van God. Jesus Christus is egter ook die Opper-Herder wat oor ons waak en elke dag by ons is en in ons woon. Hy is die Bewaker van ons lewens, Deur in Sy voetspore te volg en Hom te dien en eer, is daar vir ons die heerlike blydskap en vreugde dat Hy ons sal lei na groen weivelde , na waters waar daar rus is, na die ewige lewe by ons Hemelse Vader.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Volg in Jesus se voetspore, al beteken dit lyding!

Donderdag 16 Maart 2023
Lees: 1 Petr 2:18-25
20 “As julle gestraf word wanneer julle oortree het, watter verdienste is daarin as julle dit verdra? Maar om lyding te verdra wanneer julle goed doen, dit is genade van God.
21 Juis hiervoor is julle ook geroep, omdat Christus self vir julle gely en so vir julle ‘n voorbeeld gestel het, sodat julle in sy voetspore kan volg.
22 “Hy het geen sonde gedoen nie en uit sy mond het daar nooit ‘n leuen gekom nie.”
23 Toe Hy beledig is, het Hy nie terug beledig nie, toe Hy gely het, het Hy nie gedreig nie, maar alles oorgelaat aan Hom wat regverdig oordeel.
24 Hy het self ons sondes in sy liggaam aan die kruis gedra. Daardeur is ons vir die sondes dood en kan ons lewe in gehoorsaamheid aan die wil van God. Deur sy wonde is julle genees.”

Alles wat Jesus Christus op aarde gedoen het, is die perfekte voorbeeld vir ons om na te volg!

Soos wat ‘n klein kindjie op die sand of stofpad dikwels in sy pa se voetspore probeer trap, moet ons altyd probeer om in Jesus se voetspore te trap!
Ons moet in sy voetspore volg!
Want alles wat Jesus op aarde gedoen het, was goed en reg en moet ons navolg.
In besonder moet ons navolg wat Jesus gedoen het ten opsigte van swaarkry en lyding.

Dit klink vir ons nie reg nie. Hoekom moet ons Jesus navolg ook in sy lyding?

Daar is tog ‘n algemene gedagte wat mense wil glo en dit is dat as jy in gehoorsaamheid aan God lewe sal jy nie swaarkry of lyding ervaar nie. Is God dan nie die God wat net goed is nie? Is God dan nie die alleroorvloedigste fontein van alles wat goed is nie, soos wat ons bely in die Nederlandse Geloofsbelydenis art. 1 nie?

Jesus Christus was sonder sonde. Hy het NOOIT enige sonde gedoen nie. Uit sy mond het daar NOOIT ‘n leuen gekom nie. En dan lees ons dat Jesus ter wille van ons beledig is, gely het, gedreig is met die dood en dat Hy aan die kruis vir ons sondes betaal het met sy liggaam en bloed. Hy was totaal en al onskuldig, maar is skuldig verklaar.

Jesus het nie gesterf, omdat Hy ooit iets verkeerds gedoen het nie, maar omdat Hy reg gedoen het. Dit is wat ons moet navolg, ons moet altyd reg te lewe, volgens die Woord van God, uit dankbaarheid en gehoorsaamheid.

En dan die swaarste vir ‘n christen, wanneer iemand iets verkeerd teen jou doen of as jy moet opstaan vir wat reg is volgens die Woord van God, dan moet ons in Jesus Christus se voetspore volg. Al word ons beledig en kry swaar of word selfs in die tronk gegooi, omdat ons in Jesus se voetspore volg, moet ons nie terugdeins nie.

Geliefdes ons moet nie deelneem aan die sondige wêreldse praktyke nie!
• As iemand jou vloek moet nie terugvloek nie.
• As iemand jou vra vir omkoopgeld, moet dit nie doen nie.
• As iemand jou beledig omdat jy getuig van wat die Bybel sê, moet nie terugdeins nie.
Jesus Christus se onderdanigheid aan die owerheid toe Hy onskuldig veroordeel is, was nie ‘n teken van swakheid of onmag nie, inteendeel, ons lees met sy gevangeneming het Jesus die volgende gesê: Mat 26:53 “Of dink jy Ek kan nie my Vader om hulp vra nie?
Hy sal dadelik vir My meer as twaalf legioene engele beskikbaar stel.”

Ons word nie verlos en gered omdat ons in Jesus se voetspore volg en doen wat Hy vra nie, nee, ons word verlos omdat ons glo in wat Jesus Christus vir ons gedoen het aan die kruis en met sy versoeningswerk.

Kom ons volg ons Herder en die Bewaker van ons lewens deur in gehoorsaamheid in Sy voetspore te volg!
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Die volmaakte bouplanne vir die volmaakte huis.

Donderdag 9 Maart 2023
Lees: 1 Petr 2:2-2:10 ‘83 “4 Kom na Hom toe, die lewende steen, wat deur die mense afgekeur is, maar deur God vir die ereplek uitverkies is. 5 Laat julle as lewende stene opbou tot ‘n geestelike huis, om ‘n heilige priesterdom te wees en geestelike offers te bring wat deur Jesus Christus vir God welgevallig is. 6 Daarom staan daar in die Skrif: “Kyk, Ek lê in Sion ‘n hoekklip, uitverkies vir die ereplek. Wie in Hom glo, word nooit teleurgestel nie.”

Ek het gelees van ‘n groot boukontrakteur wat ‘n dubbelverdieping huis gebou het. Hy het ‘n subkontrakteur gekry wat die steenwerk moes doen. Die eienaar van die huis het die bouplanne ‘n paar keer gewysig. Toe hulle die eerste verdieping klaar gebou het, het alles goed verloop, maar met die tweede verdieping wou niks werk nie. Na ‘n lang ruk het hulle agtergekom hulle het twee verskillende stelle bouplanne. Toe hulle die oue weggegooi het, het die bouwerk sonder probleme verder gevorder.

So is dit dikwels met die kerk van die Here. Die bouplan vir die kerk is die Woord. Daarom moet die Woord noukeurig bestudeer word en ons moet daarvolgens die geestelike bouwerk van die kerk doen.

Hoekom is daar dan soveel verskillende kerke, denominasies? Dit is sekerlik omdat alle christene nie die “Bouplan” dit is die Woord biddend, in afhanklikheid, in gehoorsaamheid, in totale onderworpenheid aan die Woord lees nie. Daar is net een Verlosser Jesus Christus en daar is net een geestelike gebou en dit is die ware kerk.

“Wat was ‘n sluitsteen in ou geboue, en wat ‘n hoeksteen? Wanneer ‘n boog gebou is, soos by ‘n poort of selfs ‘n brug, was daar ‘n wigvormige steen in die middel wat skuins na beide kante
toe gekap was. Dit voeg dan die twee dele van die boog van weerskante saam tot ‘n eenheid. Hierdie steen as sentrale fokuspunt van die boog, was dikwels versier. Sonder hierdie steen
tuimel die twee dele van die boog ineen. Paulus en Petrus sê dat Jesus hierdie SLUITSTEEN is.” (https://bybelverskille.wordpress.com/2019/02/26/155hoeksteen/)

“Maar wat was dan ‘n “hoeksteen”? Dit was ‘n groot, perfek gekapte steen wat as deel van die fondasie van die gebou heel eerste op die hoek in presiese plek geplaas is. Al die afmetings en rigting van die mure van die gebou is dan van hierdie hoeksteen geneem sodat die hele gebou haaks en perfek gebou kon word.” (https://bybelverskille.wordpress.com/2019/02/26/155hoeksteen/)

In Ef 2:20 lees ons “Julle is ‘n gebou wat opgerig is op die fondament van die apostels en die profete, ‘n gebou waarvan Christus Jesus self die hoeksteen is.”

Jesus Christus is beide die Hoeksteen en die Sluitsteen. As ons vanaf Jesus Christus werk as die Verlosser en die Hoof van die Kerk, as ons die Woord volg as die volmaakte bouplanne van die kerk, as ons die bouwerk biddend onder leiding van die Heilige Gees doen, as ons alles doen tot eer van God die Vader, dan sal die kerk waarlik die lewende geestelike gebou wees wat Jesus Christus self van gesê het in Mat 16:18 dat die poorte van die doderyk sal die kerk nie oorweldig nie.

Geliefdes maar ons moet ons volgens 1 Petr 1:5 die volgende laat welgeval: “Laat julle as lewende stene opbou tot ‘n geestelike huis, om ‘n heilige priesterdom te wees en geestelike offers te bring wat deur Jesus Christus vir God welgevallig is.”
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Alle christene is een familie

Maandag 6 Maart 2023
Lees: 1 Petr 1: 22-2:3 ‘83 “22 Noudat julle julle in gehoorsaamheid aan die waarheid gereinig het om mekaar as broers ongeveins lief te hê, moet julle mekaar dan ook van harte en vurig liefhê. 23 Julle is immers weergebore, nie uit verganklike saad nie, maar uit onverganklike saad: die lewende en ewige woord van God.”

Die voorreg van ‘n familie. Dit is ‘n baie groot voorreg om in ‘n familie gebore te word waar daar liefde en respek en omgee vir mekaar is. Om ‘n pa en ma te hê met broers en susters wat vir mekaar omgee is ‘n genade van God. Om deel van so ‘n familie te wees waar julle mekaar werklik liefhet vul jou met groot dankbaarheid en blydskap.
Hoe word jy deel van so ‘n gesin of familie.
Eerstens deur ‘n pa en ‘n ma uit wie jy gebore word.
Tweedens as jy ‘n wettig aangenome kind van so ‘n familie is.

Elke ware christen is deel van so ‘n besondere familie. Ons almal wat werklik in Jesus Christus glo en Hom liefhet en dien, is deel van die gesin van God. Ons is deel van die geeste-like familie. Ons is broers en susters deur ons Here Jesus Christus. God is ons Hemelse Vader.
Hoe word jy deel van die geestelike gesin van God?
Eestens en laastens deur die wedergeboorte.
Hierdie wedergeboorte word duidelik aan ons beskryf in Joh 3:1-16.
Jy word deur die Heilige Gees wedergebore om te kan glo in ons Here Jesus Christus as ons Verlosser en ons Koning. Soos daar twee ouers nodig is om fisies gebore te kan word, is daar by die wedergeboorte die Heilige Gees en die Woord.
1 Pet 1:23 “Julle is immers weergebore nie uit verganklike saad nie, maar uit onverganklike saad: die lewende en ewige woord van God.”

Ons eerste geboorte was ‘n geboorte van die natuurlike liggaam. ‘n Natuurlike liggaam verouder en sterf af. Soos ‘n pragtige blom net ‘n tyd lank bestaan is dit ook met ‘n mens die geval. Jy blom vir ‘n tyd en dan word jy ook oud. Orals in die Bybel, vanaf die toringbou van Babel in Gen 11 tot met die groot Babilon in Open 17-18 het die mens se pogings tot ewige heerlikheid gevaal.

Ons tweede geboorte was ‘n geestelike geboorte, die wedergeboorte deur die Heilige Gees.
As ons eenheid in die kerk wil bou ons fisiese en natuurlike sake en middelle, sal dit faal.
As ons eenheid in die kerk egter bou op die eenheid van ons wedergeboorte, sal dit groei.

Elke ware gelowige het dieselfde Heilige Gees wat in hom/haar woon en werk. Rom 8:9
“Julle word egter nie deur julle sondige natuur beheers nie, maar deur die Gees, want die Gees van God woon in julle.”
• Alle christene het net een Vader. 1 Petr 1:17
• Daarom is ons een groot Geestelike Familie.
• Daarom moet ons mekaar as broers en susters, ongeveins lief hê, vurig liefhê.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Losgekoop met die bloed van Christus

Vrydag 3 Maart 2023
Lees: 1 Petr 1: 18-19 ‘83 “Julle weet tog dat julle nie met verganklike middele soos silwer of goud losgekoop is uit julle oorgeërfde sinlose bestaan nie. 19 Inteendeel, julle is logeskoop met die kosbare bloed van Christus, die Lam wat vlekloos en sonder liggaamsgebrek is.”

Losgekoop is vir ons as christene vandag ‘n verstaanbare, teologiese term. Ons is losgekoop met die bloed van Jesus Christus van ons sondes. Jesus Christus het vir ons sondes betaal met sy bloed. Maar ons sal die begrip nog beter verstaan as ons dit lees in die konteks van die tyd waarin Jesus Christus geleef het, dit is in die eerste eeu na Christus. In Jesus Christus se tyd was daar baie slawe. ‘n Slaaf het ten volle aan sy eienaar behoort en ‘n eienaar van ‘n slaaf kon met die slaaf doen net wat hy wil. Hulle kon die slawe gebruik en misbruik soos wat hulle wou.

Hoe kon’n slaaf weer ‘n vryman of vrou word? Daar was twee maniere:
Eerstens Hy kon geld bymekaar maak en ‘n losprys betaal, of
Tweedens, iemand anders moes die geld vir hom betaal.
As ons nou dink, daar was na berekening, ongeveer 60 miljoen slawe in die Romeinse ryk.

Die Israeliete het goed geweet wat slawerny was. In Egipte was hulle slawe wat hande-arbied moes verrig. God het hulle egter bevry deurdat Moses hulle uit Egipte gelei het. Daarna was hulle weer slawe toe hulle weggevoer is na Babilonië toe, maar God het hulle weer daar bevry deurdat Koning Kores van Persië hulle teruggestuur het na Israel. (2 Kron 36:23) Nou is Israel weer slawe maar onder die Romeine, dit is ook in die tyd wat Jesus gebore is en geleef het.

Ons was ook slawe van die sonde, MAAR ons is losgekoop van ons sondige bestaan.
Tit 3:3-7 “3Vroeër was ons ook onverstandig, ongehoorsaam, op die verkeerde pad, verslaaf aan allerlei begeertes en singenot; ons het ons lewe in kwaadwilligheid en jaloesie deurgebring; ons was haatlik en het mekaar gehaat. 4 Maar toe het die goedheid van God ons Verlosser en sy liefde vir die mens verskyn. 5 Hy het ons verlos, nie op grond van iets wat ons vir ons vryspraak gedoen het nie, maar op grond van sy eie ontferming. Dit het Hy gedoen deur die wedergeboorte wat die sonde afwas, en deur die Heilige Gees wat nuwe lewe gee. 6 God het die Heilige Gees oorvloedig op ons uitgestort deur Jesus Christus ons Verlosser. 7 So is ons dan deur sy genade vrygespreek en het ons erfgename geword van die ewige lewe wat ons verwag.”

Verlossing of losgekoop beteken dus om vry te word deur die betaling van ‘n bedrag of prys.

• Vir ons as sondaars wat slawe van die sonde was is daar betaal met die bloed van Jesus Christus, een maal vir altyd.
• Ons is losgekoop met die kosbare bloed van Christus, die Lam wat vlekkeloos en sonder liggaamsgebrek is.
• Geliefde, jy wat luister en hierdie boodskap lees.
  • Glo dit wat die Bybel verkondig.
  • Leef uit dankbaarheid in afhanklikheid van God.
  • En jy sal die ewige vreugde van God in en deur Jesus Christus ervaar.

Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com

Watter rol speel die Bybel in jou lewe?

Maandag 27 Februarie 2023
Lees: 1 Petr 1: 16 ‘83 “Daar staan immers geskrywe: “Wees heilig, want Ek is heilig.”
’20 “Daarom staan daar geskryf: “Wees heilig, want Ek is heilig.”

 Watter rol speel die Bybel in jou lewe?
 Hoe belangrik is dit vir jou om die Bybel elke dag te lees?

Die Woorde: “Daar staan geskrywe…” dra baie groot gesag. Dit beteken daar is vir die gelowige ‘n baie groot opdrag en troos in hierdie woorde.

Die Woord was vir ons Here Jesus Christus van so groot belang, dat hy die Satan daarmee tereggewys het, met sy versoeking in die woestyn, lees ons in Mat 4. Telkemale as die Satan Jesus probeer versoek het met ‘n verleiding van kos vir sy honger, om sy Vader te versoek en om aan Hom rykdom te gee, het Jesus hom geantwoord met wat daar in die Bybel staan.

Die Bybel is daar vir ons as ‘n verdediging teen die aanslae van die wêreld.
Ef 6:17 “Sit verlossing as helm op en vat die swaard van die Gees, dit is die woord van God.”
Maar…
Die Bybel is nie net daar vir selfvedediging in die wêreld nie, maar die Bybel is ook vir ons ‘n gids om ons in hierdie donker sondige wêreld te lei…

Ps 119:105 “U woord is die lamp wat my die weg wys, die lig op my pad.”
2 Petr 1:19 “En dit het vir ons die boodskap van die profete nog meer bevestig. Hierdie
boodskap is soos ‘n lamp wat in ‘n donker plek skyn. Julle sal goed doen as julle in sy lig bly totdat die dag aanbreek en die môrester opkom in julle harte.”

Die Bybel is ook jou geestelike kos vir elke dag.
Dit is trouens wat ons Here Jesus Christus self gesê het.
Mat 4:4 “’n Mens leef nie net van brood nie maar van elke woord wat uit die mond van God kom.”
1 Petr 2:2 “Soos pasgebore kindetjies smag na melk, moet julle smag na die suiwer geestelike
melk, sodat julle daardeur kan opgroei en die saligheid verkry.”

Die Bybel reinig, was ons ook skoon, elke dag.
Nou ons weet dat ons skoongewas word deur die bloed van ons Here Jesus Christus van ons ons sondes, maar die Woord wat elke dag gelees word, reinig ons ook deurdat ons daardeur leer hoe ons moet lewe. Dit is die geopenbaarde wil van God. Dit is wat God ons leer hoedat Hy wil hê dat ons moet lewe.
Ef 5:26,27 “ 26 Dit het Hy gedoen om die kerk aan God te wy, nadat Hy dit met die water en die woord gereinig het, 27 sodat Hy die kerk in volle heerlikheid by Hom kan neem, sonder vlek of rimpel of iets dergeliks, heilig en onberispelik.”
• Kom ons gee die Bybel opnuut prioriteit in ons lewens, deur die Bybel elke dag te lees en te bestudeer.
• Kom ons leef volgens alles wat God in die Woord aan ons leer.
Kom ons bid saam
Ds Gerrit Kruger: Gereformeerde Kerk Centurion: Sel 082 964 5595: gskruger1@gmail.com