Skrywer: admin (Page 9 of 328)
Skriflesing: Jakobus 5 (2020)
Teksvers: Jakobus 5:7-11
Die Heilige Gees het vir Jakobus geïnspireer om geloof en dade hand aan hand met mekaar te laat loop. In Jakobus 5:1-6 word daar in besonder gefokus op die eindtyd, die laaste dae, voordat die wederkoms van Jesus Christus gaan plaasvind.
Gedagtig aan die laaste dae, word gelowiges aangemoedig om regverdig op te tree teenoor mense waarmee hulle te doen sou hê. Jakobus 5:7-11 fokus daarop dat gelowiges in woord en daad gelowig sal volhard ten spyte van lyding of wat ookal.
Gelowiges word opgeroep om in die laaste dae nie vals te sweer nie. Verder word riglyne aan Christene in die laaste dae gegee wat om te doen as hulle siek is, as hulle swaar kry, as hulleself sou sondig of as iemand anders sou sondig.
Skriflesing: Romeine 11:33-36 (2020)
Teksvers: Romeine 11:36
Ons jaartema kom uit die loflied van Romeine 11 dat alle dinge uit God voortkom, dat alles deur Hom gemaak en onderhou word, en dat alle dinge tot Hom bestaan. Hierin sien ons die volkomenheid van die werk van die drie-enige God.
Die Vader is die begin en die oorsprong van alle dinge. Uit Hom het alles wat bestaan voortgekom. Deur die Seun is alle dinge geskep, en word alles onderhou.
So ook rig die werk van die Heilige Gees alle dinge tot God in heiligmaking. Die gevolg: Aan Hom is al die eer en heerlikheid tot in ewigheid.
Hierdie woorde van ons jaartema is nie net ‘n mooi beskrywing van die werk van die Almagtige Drie-enige God nie, dit is in besonder ‘n bemoediging in swakheid en herinnering van ons eie broosheid, dit is ‘n aansporing tot diens en vertroosting van ons eie onvermoë, dit is ‘n versterking in nood en ‘n fondament van ons bestaan, dit is ‘n hoop vir ons siel en ‘n versekering van ons geloof.
Alles wat ons is en het is uit God. Ons is uit God gebore. Hy het ons ‘n nuwe skepping gemaak. Hy het ons in die lewe geroep sodat ons uit Hom die lewe ontvang. So is ons ook deur God onderhou. Deur sy genade en trou leef en bestaan ons. Hy is die Beskermer en Bewaker wat nooit sluimer of slap nie, deur wie ons is. Maar net so leef ons met die doel van ons bestaan tot Hom gerig. Alles wys na Hom en tot Hom.
Dit is juis hierdie woorde wat ons so diep tref, dat God alles en in almal is, wat ons soos die apostel van verwondering laat uitroep: so geweldig die pen ondeurgrondelik is die wysheid en kennis van God! Daar is niemand wat God se gedagtes kan ken of verstaan of iemand wat Hom kan raad gee nie. Daar is niks wat ons besit uit onsself wat nie deur God aan ons gegee is nie…
Ons besef dit veral wanneer ons deur moeilike tye gaan of as ons na ‘n swaar beproewing terug kyk en die hand van die Almagtige daarin raaksien.
Mag hierdie jaar, en die res van jou lewe ‘n wekroep wees om gedurig hierdie loflied te sing en neurie, om dit te oordink en herkou.
Dan is daar net een uiteinde: om AAN God al die roem en eer te bring. Om Hom te loof en te prys. Nie net vandag nie, nie net hierdie jaar nie, maar tot in alle ewigheid.
Lourens (vdm)
Skriflesing: Rut 4
Teksverse: Rut 4:14, 15