Aan die einde van die jaar voel baie mense uitgeput en afgetakel deur die eise van die lewe. In sulke tye is dit veral noodsaaklik om bestek te neem van ons verhouding met God. Te dikwels kry die eise van die lewe die oorhand, tot so ‘n mate dat ons verhouding met God daaronder lei. 

Paulus se boodskap aan die gemeente in Thessalonika, is dat elke gelowige selfs in uitdagende tye in hul geloof moet volhard en op God vertrou. Paulus lê ook klem op die rol wat ons as ‘n gemeenskap van gelowiges in mekaar se lewens moet vervul, wanneer hy skryf: “…bemoedig mekaar, en laat die een die ander in geloof opbou, soos julle inderdaad doen” (1 Tessalonisense 5:11). 

Paulus sluit aan by die heiligmaking van gelowiges, dat ons nie in ons geloof moet stagneer nie (Filippense 3:12-14), maar dat ons heiligwording met Hom nastreef in ons lewens (1 Tessalonisense 5:23). Hierdie heiligmaking is nie ’n menslike prestasie nie, maar die werk van die Heilige Gees, wat ons menslike bestaan omvorm. 

Dit is daar waar die samehang tussen gees, siel en liggaam duidelik word. 

Die teks verduidelik dat gees, siel en liggaam nie as afsonderlike komponente beskou moet word nie, maar as die volheid van God se werk in ons lewens. 

Die gees: Hiermee word verwys na ons bewussyn van God en die werking van die Heilige Gees in ons verhouding met God. Christus het hierdie herstel gebring deur sy kruisdood, wat ons weer in ’n regte verhouding met God stel. 

Die siel: Dit is die unieke bepaler van jou menswees – wie jy is. Dit is jou menslike selfbewussyn, die lewe binne jou wat nooit ophou bestaan nie. 

Die liggaam: Dit moet beskou word as die huisvesting van ons gees en siel. Ons moet deur ons liggaam as’t ware God verheerlik (1 Korintiërs 6:19-20). 

Anders gestel, dit is nie moontlik om in ‘n volle verhouding met God te wees sonder die samehang tussen gees, siel en liggaam nie. Sonder die Heilige Gees, kan ons nie ‘n persoonlike verhouding deur ons gees met God hê nie (Romeine 8:12-17); sonder ons unieke menswees en ‘n gesonde siel sal ons nie kan verbly in die Here nie (Matteus 11:28-29), en indien ons nie ons liggame as offer aan God bied nie, bring ons God in oneer en is ons ongehoorsaam (Romeine 12:1). Daar is ‘n verband tussen die gees, siel en liggaam in ons verhouding met God. 

Daarvoor het ons Here Jesus self na hierdie wêreld gekom en mens geword, Hy is Immanuel – God met ons. Hy het ons volkome herstel en weer verbind aan God. 

Daarom, wanneer ons in hierdie tyd van rus en besinning binnegaan laat ons strewe om ‘n hernude verhouding met God te volg- in gees, siel en liggaam. 

“En mag Hy, die God van die vrede, julle volkome heilig maak, en mag julle gees en siel en liggaam geheel en al onberispelik bewaar word by die wederkoms van onse Here Jesus Christus!” 1 Tess. 5:23 

Oudl. Werner Human 

Die almagtige Here red sy kinders uit die ergste krisis 

Skrifgedeelte: Eksodus 13:17-22 Fokusgedeelte: Eksodus 13:18, 21-22 

Die krisis waarin Israel beland het, met die see voor hulle en die Egiptiese magte wat hulle van agter inhaal, het klagtes van twyfel en ongeloof ontlok. Moses kry egter van God die versekering dat Hy hulle sal verlos, tot verheerliking van sy Naam. Daarom word die Israeliete opgeroep om nie bang te wees nie. Hulle moet net stil wees en die verlossing aanskou. Daarby moet hulle mooi kyk, want hulle sal die Egiptenare nooit weer so sien nie. 

Mens kan dieselfde ding op twee maniere sien. Wie in ongeloof na die aardse omstandighede kyk, kom een of ander tyd in ’n krisis. Wie gelowig daarna kyk, word stil en sien hoe God in sy almag daaroor seëvier. 

Vroeër het die Israeliete gesien hoe hulle eie seuntjies in die water van die Nyl sterf. Nou sien hulle hoe die sterk manne van Egipte in die waters van die Skelfsee sterf. Die Here red hulle uit die hand van die Egiptenare. Intussen sien hulle die magtige daad (hand) van die Here oor die Egiptenaars. 

By ons kom so maklik twyfel oor God en sy almag om ons werklik in krisisse te help. Twyfel kom so maklik by die oproep tot geloof, veral as jy nog niks sien nie. Nou het Israel weer gesien. Dan vrees hulle God en glo weer in Hom. Die evangelie van ons Here Jesus Christus word gedra deur sigbare getuies. Boonop word dit ook deur die Heilige Gees in ons harte bevestig deur sy Woord en sakramente. Laat ons dan ook bid: Gee my geloof om alleen in God te glo wat my in sy genade en almag uit die grootste krisis van sonde, ja die dood en hel verlos het. Laat ek dankbaar in u jubel. 

Ds. SA (Sarel) Cilliers (Emeritus) 

Uittreksel uit Dagstukkies van die Almanak 2025. Beskikbaar by die kerkkantoor @ R130