Gereformeerde Kerk Centurion

Die webtuiste vir die Gereformeerde Kerk Centurion.

Page 2 of 298

Halleluja! Gelukkig is jy wat gaan deel hê aan die bruilofsfees van die Lam

Maart 17, 2025 /

Skriflesing: Openbaring 19:1-10(2020)
Teksvers: Openbaring 19:7, 9

Openbaring 19:1-10 fokus op die bruilofsmaal van die Lam waarby ons betrokke sal wees as “die bruid” en as “die uitgenooide gaste”. Deur die nagmaalsfees wat ons vandag hier op aarde vier, word ons herinner en aangespoor om uit te sien na die vreugdevolle bruilofsfees van die Lam wat nog voorlê in die toekoms. Ons onthou en glo, deur ons deelname aan die nagmaal, dat Jesus Christus vir ons geoffer is as Lam tot versoening met die Vader en tot verlossing van ons sondes. Ons sien uit na die heerlike bruilofsfees wat met die wederkoms van Jesus Christus gevier sal word. 

Mag jou hart en gedagtes vol wees met die drie maal herhalende en vreugdevolle “Halleluja’s” van Openbaring 19:1 – 4. Jesus Christus, kom. Hou dan bestendig vas aan die Here Jesus se reddende, verlossende, versoenende en genadige offer as Lam van God. Halleluja! Jesus Christus het die oorwinning betaal. Hy het die prys ten volle betaal. Nou wag ons op die bruilofsfees van die Lam wat nog sal kom. 

Die HERE is my Beker en Erfdeel

Maart 17, 2025 /

Skriflesing: Psalm 16:1-11 (2020) 
Teksvers: Psalm 16:5 

Die meeste van ons het ‘n testament wat ons erflating beskryf. Maar het u al ooit gedink wat gaan jy erf as jy doodgaan? 

Ja, natuurlik is daar vir elke gelowige kind van die Here ‘n erfenis wat “onverwelklik, onbesmet en onverganklik” is soos beskryf in 1 Petrus 1. Hierdie erfenis is nie iets nie, dit is Iemand. Dit is die Here self. Hy is ons erfdeel. Daarom kan Dawid so heerlik getuig en bly wees, want hy erf die Here. 

Daar is egter ‘n tweede beskrywing wat Hiermee saamgaan: die Here is sy Beker. Ons wil vanoggend hieroor nadink, wat beteken dit om die Here as beker te ontvang… 

Die amp van gelowige is diens aan God 

Maart 14, 2025 /

Artikel 2 van die Kerkorde van die Gereformeerde Kerke lui soos volg: 

“Daar is vier soorte dienste: die van die bedienaars van die Woord, die van die professore aan die Teologiese Skool, die van die ouderlinge en die van die diakens.” 

In elke gemeente is 3 van hierdie dienste nl. bedienaars van die Woord, ouderlinge en diakens. Let daarop dat ons praat van dienste. Dit beteken dat die amp ’n diens is van Christus. Hierdie ampte gaan oor die regering en versorging van die kerk. Die amptelike werk is diens tot eer van God. 

Daar is egter ʼn amp waarin elke gelowige staan nl die amp van gelowige. Almal in Christus word tot hierdie amp geroep. Die ampte van herder en leraar, ouderling en diaken se doel is om almal in die amp van gelowige toe te rus om God te dien Ef 4:12. Die fokus val dus op die gelowige. Ons is Christus se kinders wat Hy innig lief het, so lief dat Hy sy lewe vir ons afgelê het. 

In Ef. 1:4 lees ons dat God ons voor die grondlegging van die aarde uitverkies het sodat ons heilig en onberispelik voor Hom kan lewe. Ons is Vader dankbaarheid verskuldig vir ons verlossing. Paulus skryf dat ons as gelowiges konings, profete en priesters is. As koning moet ons ons opdrag van Gen. 1:28 nakom om oor die skepping te heers. Volgens Matt 28: 18-20 moet ons as profete God se Woord verkondig met ons dade en met woorde. As priesters moet ons biddend voor God lewe soos beskrywe in Rom 12:1,2. 

Hierdie amp is ’n heerlike amp waartoe die lewende barmhartige God ons geroep het en met die Heilige Gees ons elke dag toerus om die amp uit te voer. 

Ons sien vandag met groot vreugde die tekens van God se onbeskryflike groot liefde vir almal wat hy tot amp van gelowige geroep het. Hy het Sy Seun oorgelewer sodat ons heilig en onberispelik voor Hom kan wees. Gaan dan in die vreugde van Sy verlossing om God te dien en sy Naam te eer. 

Oudl Jaco Wattel 

Leeutemmer: Mag die Koning Ewig Leef!

Maart 10, 2025 /

Skriflesing: Daniël 6:1-29 (2020) 
Teksvers: Daniël 6: 6, 11, 21-22 

Watter eienskappe kenmerk jou lewe? Is jy iemand wat saggeaard is, of dalk baie geduldig? Daniël was gekenmerk as iemand wat onberispelik is in sy werk, niemand kon ‘n vinger na hom wys nie, maar hy het een “swakpunt” gehad. 

Sy lewe was ‘n volkome toewyding in geloof aan die lewende God. Dit is juis waaroor die verbitterde politici hulleself troos, dat hulle Daniël kan te na kom, omdat hulle weet sy geloof is onwrikbaar. 

Ons staan vanaand stil by die getuienis van Daniël se lewe as leeutemmer. 

Die Here roep tot verootmoediging voor Hy ’n bevryder stuur

Maart 10, 2025 /

Skriflesing: Rigters 6:1-10 (2020)
Teksvers: Rigters 6:8a

Israel was op hierdie stadium so oorweldig deur hulle vyande dat ’n normale lewe nie moontlik was nie. Die Here het dit oor hulle laat kom as gevolg van hulle sondes. Toe hulle om bevryding uit hierdie nood bid, stuur die Here nie dadelik ’n bevryder nie, maar eers ’n profeet. Hy kom ook nie met die goeie nuus van bevryding nie, maar met ’n bestraffing oor hulle sondes. So wys die Here ons dat Hy bekering voor bevryding wil hê. Daarom moet ons, voordat ons die nagmaal-fees van vergewing van sondes deur Jesus Christus geniet, eers ter voorbereiding besin oor ons sondes. 

« Older posts Newer posts »

© 2025 Gereformeerde Kerk Centurion

Theme by Anders Noren — Up ↑