Gereformeerde Kerk Centurion

Die webtuiste vir die Gereformeerde Kerk Centurion.

Page 273 of 345

Soos goud gelouter!

Februarie 28, 2020 /

Skriflesing: 1 Petrus 1:1-12
Teksvers: I Petrus 1:6,7

Dit is nogal ‘n hele proses om die goud uit die gouderts te haal. (1 metrieke ton erts lewer net tien gram suiwer goud!)

In kort gebeur die volgende: Nadat die erts fyn gemaal is word dit met water (deesdae ook met sianied in die oplossing) gemeng om geskei te word. Met die hulp van sinkstof word die goud uit die oplossing gehaal en die residu word met verdunde swaelsuur behandel om die ander metale te verwyder.

Die ru-goud (staafgoud) word na die raffinadery gestuur waar dit in die smeltkroes van tot 1150 grade C verhit word om dit nog suiwerder te maak – die louteringsproses! In die proses dryf die metaalchloriede bo-op die goud en kan maklik afge-skep word. Elke keer wat die proses herhaal word, word die goud suiwerder, om so 9, 18, 24 karaat of selfs beter goud te verkry.

Laai af

Rotteresies

Februarie 28, 2020 /

Dit is of die lewe net al hoe vinniger en vinniger raak. Om by te bly raak al hoe moeiliker, want daar is nie genoeg tyd in die dag om alles te doen wat jy moet nie. Jy voel later soos ‘n rot in ‘n hok wat in ‘n plastiese wiel hardloop, al vinniger en vinniger en dit voel of jy op pad is na nêrens. Dit kan ‘n mens soms moedeloos maak. Dit kan soms maak dat jy nadink oor die sin van die lewe, die doel van die lewe. Is dit die moeite werd?

Prediker 2:26 lees ons dat alles is ‘n gejaag na wind, AS jy nie werk in afhanklikheid van God nie. Gaan sit ‘n bietjie rustig en bedink jou lewe. Wat is die doel van jou lewe? Wat wil jy bereik? As ‘n mens geluk najaag of rykdom of eer, is jy op die verkeerde pad. As jy werklik wil lewe tot eer van God in afhanklikheid van God, dan het jy die regte doel in jou lewe.

Die prioriteite in ons lewens moet reg wees. Prioriteite gaan oor die verhoudings in ons lewe. Om tot eer van God te lewe is om God eerste te stel in jou lewe. Daar is basies drie verhou-dinge in jou lewe en dit moet in ‘n bepaalde volgorde beskou word.

  • Eerstens jou verhouding met God.
  • Tweedens jou verhouding met jou man/vrou/kinders/naaste.
  • Derdens jou verhouding met jou werk.

As hierdie drie verhouding in plek is, dan is daar doel in jou lewe, is dit nie ‘n dolle gejaag na wind, ‘n rotteresies wat geen doel het nie.

Verbly jou in die Here en dien Hom in jou lewensbestaan, in jou verhouding met jou naaste en in jou werk. Moet nie jou werk eerste stel en daarvan ‘n afgod maak en jou man/vrou/ kinders/naaste afskeep nie. Stel God eerste en dien Hom en al die ander sake sal in plek val.

Pred 2:26

“Vir die mens met wie se lewe God tevrede is, gee Hy wysheid, kennis en blydskap. Maar die een met wie Hy nie tevrede is nie, kry die taak om op te gaar en bymekaar te maak en dit dan te gee aan een met wie God tevrede is. Ook hier kom dit dus tot niks. Dit is ‘n gejaag na wind.”

Ds Gerrit

God straf ons sondes en daarin is God absoluut

Februarie 22, 2020 /

Skriflesing: Job 34:10-30
Teksvers: Job 34:10b

Ons lees in 1 Kor 8:1:

1983 “Kennis maak verwaand, maar liefde bou op.”
1953 “Die kennis maak opgeblase, maar die liefde stig.”
NIV “But knowledge puffs up while love builds up.”

Dit is so belangrik om kennis te hê van onsself, ons eie sonde en ellende en hoe God daarmee handel en wat ons daaromtrent moet doen.

  • Sondag 2 handel oor die OORSPRONG van ons sonde.
  • Sondag 3 handel oor die OMVANG van ons sonde.
  • Sondag 4 handel oor die STRAF van ons sonde.

Dit handel hier oor die Regverdige Oordeel van God oor die mens. Job het aanhou sê dat hy onskuldig is. Job wou homself teenoor God handhaaf. Hy het al daarmee begin toe hy sy geboortedag vervloek het. Daar was redenasies met God en raad van sy drie vriende, maar uiteindelik het hulle stilgebly voor God.

Ons gaan na drie sake kyk:

1 God is nie onregverdig nie.
2 God straf die sonde.
3 God is barmhartig EN regverdig.

Laai af

Goeie werke het ewigheidswaarde!

Februarie 22, 2020 /

Skriflesing: Op 14:1-13
Teksvers: Op 14:12 en 13

God wys aan ons in die Openbaringsboek by wyse van simboliese taal en beelde hoe die toekoms van die kerk en die wêreld lyk tussen die koms en die wederkoms van ons Here Jesus Christus. Ons kyk die toekoms in en sien hoe lyk die hemel en die hel. En dit is skrikwekkend! Met ‘n volheidsgetal van 7 sien ons hoe die toekoms afspeel met die 7 kandelaars (visitasie) die 7 seëls, die 7 weë, die sewe basuine en eindelik ook die 7 skale.

Hiertussen verweef is 7 saligsprekinge. Die eerste het ons reeds met die openingswoorde gehoor. Vandag staan ons stil by die tweede met die tema: Goeie werke het ewigheidswaarde!

Laai af

2 MILJOEN BYBELS PROJEK

Februarie 21, 2020 /

2 Kor 2:14 “Maar aan God die dank! Hy voer ons altyd saam in sy triomftog omdat ons een is met Christus. Deur ons versprei Hy die kennis van Christus oral soos ‘n aangename geur.”

Die doelstelling van die Bybelgenootskap van SA (BSA) is “om bekostigbare Bybels te voorsien vir elkeen in hul eie taal en in geskikte formate, sodat almal die lewegewende boodskap van die Woord mag ervaar.”

Ter viering van die BSA se 200 jarige bestaan word R200m ingesamel om 2 miljoen stelle Bybels en Bybelgebaseerde geletterdheidboekies gratis aan mense beskikbaar stel wat dit nie kan bekostig nie.

GK Centurion het die 2020 Bybelprojek in Okt 2019 geloods met die doel om R100 000 in te samel en aan die einde van Feb 2020 is alreeds R60 000 aan die Bybelgenootskap oorbetaal. Ons loof en dank die Here daarvoor!

Ons wil u weer aanmoedig om die projek te ondersteun deur of kontant in die wit kassies (met die bogenoemde kenteken op) by die deure te gooi of in die GKC se rekening in te betaal met verwysing “Bybelgenootskap”.

Beywer julle veral deur prediking, Bybelstudie en doelgerigte gebed vir ‘n persoonlike verhouding met die Here, sodat Hy deur ons die kennis van Christus versprei en ons aktief deel sal wees van Sy triomftog. Beywer julle daarvoor dat die Here waarlik ‘n realiteit in julle lewe sal wees sodat watter bedrag julle ook al gee, dit sal wees uit ‘n blymoedige hart en uit ywer vir God se Koninkryk.

Hennie Dekker van die BSA gaan op 1 Maart na afloop van die aanddiens in die Geestelike Opbou met ons gesels oor die BSA se 200 jaar bestaan, werksaamhede en die 2 miljoen Bybelprojek.

Die Evangelisasiekommissie

« Older posts Newer posts »

© 2026 Gereformeerde Kerk Centurion

Theme by Anders Noren — Up ↑